【閃電傳真機】
近排雷暴警告密密發出，閃電老是常出現，希望可以一嘢劈落啲仆街度，可惜無。頻繁嘅閃電，只係喺馬路上做成個特殊現象。
嗰日時近七點，天未全黑，最後一絲掙扎住唔落山嘅陽光，喺密雲後隱隱約約咁滲出，慘白嘅天色就同身後乘客嘅臉色一樣。出咗大老山隧道向馬鞍山進發之際，突然一下閃電劃過，前面部Jazz馬上重Brake收慢，我雖然保持足夠距離，但確實估唔到佢會喺呢個位突然急煞，反應慢咗一慢，Dup到車內所有人都向前衝，安全帶測試再一次過關。
見到後面部車都停得切後，總算平安過度。前面部Jazz急煞一嘢之後，又無進一步收慢，反而加速前駛，令我成頭黑人問號，會唔會係忽然打噴嚏之類呢？我保持住更加遠嘅距離，保持防衛心前進。去到石門附近，同樣嘅劇情再一次演出，唯一唔同嘅係隔離中線有部Audi參演，好彩今次距離遠咗，煞車都煞得鬆容啲。
乘客都問佢哋玩咩，我隨口答：「可能怕呢區影快相掛。」靈光一閃，可能呢個真係答案，每次閃電閃過，都好似快相機一閃，唔通佢哋因為咁而煞車？
愈諗愈合理，愈諗愈唔合理。
合理嘅係真係好多人被影快相後會慣性煞車，彷彿即時改過可以改變已經發生嘅結果；唔合理嘅係，閃光一出根本已經影咗，煞得再快都無用，個自然反應就好似膠劇啲人飲毒酒中伏後，先至話大力掉酒杯再話「杯酒⋯⋯有毒」，快啲去死啦，你已經死了。見快相機閃之後煞車，同樣係咁無聊又無用嘅無意識行為，而因為閃電而煞車，更加⋯⋯我唔識講，呢個似乎係智力問題。
平生不作超速事，夜半閃電也不驚。閃電也好，影相也好，超得速就唔好怯啦。
#我的你的紅的
#的士 #快相 #雷暴警告
