《一燈照隅》陳心遙
《信報》2018年5月23日《視線所及》專欄
網上一窩蜂議論保粵。幾年前一度洗版嘅短片，廣州人製作嘅《舌尖上的粵語》又再度被瘋傳。有KOL同專頁出Post出片苦口婆心叫大家要關注。啱啱仲見到萬能Key《希特拉的最後十二夜》配上撐粵嘅內容。一時之間，好似大家都熱血起來。
有冇用？當然有，多一點關注都係有用。但可想而知，過兩個禮拜大家就會回到「日常」生活入面，或者俾第二個議題籠罩住；教育局嗰篇文章唔會下架，粵教中嘅學校唔會多咗，你嘅小朋友依舊唔知道咩係電單車、冷氣、扮晒嘢；只會知道摩托車、空調、裝逼，奇怪係講「裝逼」、「牛B」冇問題，講「仆街」就係粗口；香港護士要背誦普通話詞語；香港大學生唔通過超難普通話測試就畢唔到業。好多中小學生其實都唔睇「臉書」。你換咗張相「我母語係廣東話」，佢哋其實係睇唔到㗎，佢哋睇緊「抖音」。
先幾日同一位家長傾偈，佢話其實有學校支持改番粵教中，但反而家長卻聯署反對，覺得學中文順便學好普通話一雞兩味仲好。一直流行嘅講法係：廣東話唔學都識㗎啦，喺學校不如學好普通話仲實際啦。事實係點？大家睇到最近喺廣州或者香港嘅小朋友街訪，或者坐餐廳搭港鐵，聽下學生之間點傾偈，你咪知囉。
嗰位律師講得啱，呢一代人貪圖享樂；冇為社會打好基礎。曾經嘅輝煌，經濟又好、文化又好，其實有如沙丘堡壘一樣脆弱，海市蜃樓一樣短暫；翻一個巨浪，轉一回天色，就消失無蹤。幾十年嚟，連一套有系統嘅粵語教科書、一本完整而權威嘅粵英詞典都冇，因為做最底層根基嘅事，要無私奉獻嘅人手、要不求回報嘅投資；正正係乜都講求收益或光環嘅香港，最缺乏嗰兩樣嘢嚟。
所以請大家好好珍惜好多傳承粵語文化默默工作嘅人：教師、學者、IT人、評論人、記者、歌手、演員、電視電影編導、電台DJ、配音員、翻譯員、傳譯員、出版人、編輯、作家、音樂人、漫畫家、YouTubers、棟篤笑藝人、劇場工作者、粵劇粵曲工作者等等等等。佢哋未必有名有利，水平又未必去到世界級，但係佢哋先係香港粵語文化嘅中流砥柱。
是故最好嘅撐粵語方法，就係支持佢哋工作，自己願意花錢去消費，花時間去了解；仲有教導下一代去認識，即使佢哋而家未必有好大嘅興趣。但積少成多，聚沙成塔；好比一人提一燈，照亮自己嘅暗角，世界自然會光亮起來。
#一燈照隅 #粵語 #我母語係廣東話 #信報 #陳心遙
