【#狂迷投稿】文：電影人在野 《#凶靈祭》
// 無限接近真實的恐怖 //
好耐無體驗過後勁強勁既電影，尋晚訓教既時候順手熄燈，諗起上身女鬼係唔知咩位爬出黎個樣...我開番燈，碌多半個小時電話先訓。
.
如果話拍鬼故唔使恐怖都得，未免就同連登仔講「買股票目標唔一定為賺錢」咁虛偽。而事實上本電影既行進力量，就同《閃靈》／《驅魔人》一樣強大，利用偽記錄片手法，帶你進入泰國人滿天神靈既世界。
.
行進既過程或者緩慢，但有效，呢種沉浸式既觀影，令你一步步走入薩滿＞惡靈既世界觀，由第一鏡開始，一輪空鏡，展示山、石、廟同供品，一連串有效既符號，構成左強而有力既氣氛，令你知道大自然個種無情同恐怖，最後睇住少女如何一步步走入邪魔中，所以全套電影真係JUMP SCARE 既位得一個，但氣氛壓到我啟動左「過濾模式」（用手遮到得番字幕）既就不下十次。
.
演員亦係不可多得，假演難做，但真係更加難做，女主角薩滿「念」既撲素同對答，真係好似司徒法正走入深山搵高僧黎訪問咁，但同一時間，「念」係處理「人」事上既無力、關懷同愛，都有無限度既展示，絕對係現力派。
.
從來未試過咁清新、脫俗既感覺，韓國仔既拍法、泰國仔既鬼故，溝埋一齊既威力，居然比老鼠斑有過之而無不及，甚至比我既初戀更加詩情畫意，所謂「舉頭望明月，低頭思故鄉」，係我受嚇完第二日再深思番呢套野，我感覺到兩種東西
.
1: 絕望
「天地不仁，以萬物為芻狗」
電影開首有講，萬物有靈，但只有人既自大，相信自己可以操控命運，相信自己可以違經背道，係人倫人力既強大下控制一切，以為可以將命運改嫁比他人。
然而，神靈根本DONT GIVE A FUCK，佢審視你既態度同你被上身既邪靈根本一致，人類既維度極其量只能係佢既喜怒下苛且過日，而最後一場，係真神下凡大屠殺、定係邪神上身反撲，毫無分別。所以《兇靈祭》隱隱表達出克穌魯既味道，叔叔很喜歡。
.
２：溫水煮娃既庸懶
.
觀眾都認為角色好蠢，點解唔早D求救、點解唔早D離開、點解XＸＸ點解YＹＹ。
因為人性就係庸懶，君不見年中多少人係大災難現場，唔係舉機拍，就係駐足睇，係大難臨頭以前，每個人都以為自己係幸運離得開既一群。
同時，就好似《驅魔人》中既媽媽同女兒，點解出事第一日唔搵神父？因為搵神父係「觀眾視點」，但角色受限於佢既教育、性格、身世，身陷於無能而求救不能。
媽媽點解唔早D行動？因為心有鬼，因為有內疚，因為有害怕...因為直到大難臨頭，先識得割捨。
.
觀眾好喜歡聰明於一切，聰明過導演、劇情、佈局...但要行入去，你先理解到每個人做緊乜野。
.
同場加映：
★加入狂友fb群組【 #狂氏電影綜合症候群 】
★*// http://bit.ly/32xJWLp //
★直接交流 × 影患有救！
電影人在野 在 電影人在野 的推薦與評價
曾經好多次講過，多人電影，就要有多人電影既呈現方式，DC永遠學唔精既一樣野，就係試圖將90分鐘既力度去交代十數個有血有肉既角色，個後果要不平面，要不胡亂。 但趙婷做 ... ... <看更多>