冇個人思考，上足24小時連登都冇用
之前講過，抗爭以無責任體系主導，好易出事，今次想繼續講以七分資訊三分毒素嘅思想操縱模式，後果有幾恐怖。大體上，呢啲文章都好有道理好真實，但似是而非嘅行為引導，係相當危險，如果大家只係因為佢話自己係乜乜身分而信，缺乏仔細分析，就有可能增加大家犯錯機會，妨礙大家從抗爭中逐步成長。雖然話跟住呢啲文章建議去做，都可以係當做實驗，但香港有幾多時間做實驗試錯，大家心中有數，而可以思考完至去試，又何樂不為呢。
用戶褪色午夜殘片之所謂建議有以下三大問題：
一、佢為捉到鬼之後嘅處理方式提供僅僅兩個選擇，「一係打佢一身，一係拉比狗隊」
危險嘅地方，就係有前設，令大家自以為經過思考至去行動。呢種引導方式，基本心理學都有教，就係預示效應。實驗係咁，測試者會睇咗一篇形容A係好人同B係壞人嘅文，然後再按指示分析其他人，結果測試者大多數都會傾向有條有理咁分析出似A嘅就係好人，似B嘅就係壞人，亦即係話，係自以為理性咁直接跌入陷阱。如果成個post就係一個實驗，咁大家會唔會已經成為測驗者？
而且，捉到鬼，點解我地唔可以有第三個選擇？點解我地唔即刻綁起佢，然後搵記者過黎影住盤問，再靠記者去做fact-check？香港媒體仍然未死，記者個個勇武，以上兩個選項根本係大伏黎。捉鬼還捉鬼，捉完絕對唔好私了，私了只會挫傷大家士氣，完全唔會振奮人心。
二、佢回應警察最驚邊類快閃襲擊嘅答案係「越多血咪越驚，同普通市民一樣姐嘛」
危險嘅地方，就係佢又鼓吹暴力。首先呢個問題，都唔知係咪扯貓尾，大家唔好以為大多數人都係一般網民，或者以為啲廣東話打得好怪至係敵人，要買起香港人嘅良知，從來唔係難事。煽動大家打到一個休班警見血，即係打到一個普通市民見血，血流如注，呢個就係佢地最想要嘅效果。
一路以黎，大家嘅文宣都不停用鮮血去突顯警察嘅殘暴，就好似冇咗隻眼嘅急救員，同埋畀警察按喺地下按到一地血嘅抗爭者，大家都知道，血係同警察相連嘅象徵。當血係由正義一方製造，重係喺非抗爭嘅地方製造，中共就會連抹黑大家嘅工夫都慳返。
三、佢初初講啲好似好內部嘅嘢，但越寫越普通，純粹利用權威身分煽動大家
危險嘅地方，在於佢完全冇提供到身為高級督察先至有嘅資訊，其實寫到中段已經冇貨，咁到底佢嘅高級督察身分有乜特別？而且，到底點解佢要辭職，幾時辭職，呢啲都唔需要諗？更重要嘅係，如果大家冷靜落黎，撇除佢個身分，其實佢嘅觀點係咪真係咁獨到？見係所謂警察就盲推，真係認真睇曬內容至推嘅有幾多人？
佢慫恿大家攻擊休班警嘅進路，其實只係講返啲睇過《BONES》或者《SHERLOCK》都識嘅所謂法證知識，然後就話「最怕一年一百幾十單，到時有證據都冇人手」，咁都係中point？佢話警察最忌係遊客同記者，初頭好似好sound，但之後講落去根本就係百搭嘅，咁又係中point？佢話警隊「專揀遊蕩既人，甚至捕係廁所門口，唔用武力，唔比警告，一上黎就拉你然後迅速帶走」，呢啲大家抗爭咗兩個月，唔係都想像得到？佢話「共產黨其實好怕出解放軍會被美帝有位入」，呢點大家都已經聽到慣，唔係都已經聽到耳熟能詳？
———
佢講嘅嘢好普通，大家都已經提過，而佢著重鼓勵嘅捉鬼私了同埋快閃襲擊，我地一但做咗，就會萬劫不復。溫和一派，一路認為我地仍然佔有道德高地，而勇武一派，則一路都係擺出守勢而非主動進攻，咁香港人就會互相割蓆。而最麻煩係，襲擊休班警，會帶出乜嘢訊息？著起制服鎮壓，係代表政權鎮壓，但收咗工都襲擊，係咪有必要？處理一個香港警察，就可以換一個中國武警，咁樣係咪大家想要嘅結果？
呢個post三千幾個正評，係極有問題，極之危險。得罪所謂連登，我從來唔介意，如果香港人唔肯接受自己分析能力真係唔高，保持謙虛，練習思考，咁我地滅族都係遲早嘅事，應該嘅事。中共擅於分裂，擅於蠱惑人心，製造矛盾，係好高章嘅對手，因此我從來都認為中共嘅打壓就係香港民族嘅升級訓練，亦係大自然嘅淘汰機制——如果大家衰喺自以為是，咁即係唔配有自由，唔配有國家，咁一齊死咗佢都唔緊要，同香港人同生共死，我無悔無怨，因為我無法令社會一齊精進，分工合作，我都有責任，難辭其咎。
希望大家唔好再單純因為身分而推post，戒咗呢樣嘢佢。「唔理係咪警察，覺得中point，照推」驟聽好合理，但係你本身specify呢句，其實都已經係令人懶咗去做fact-check。成日話啲人亂吹風，連機組人員分享返上頭指示都要批評，連登呢個平台咁樣免曬fact-check，大家又若無其事，當係執到寶，會唔會太自相矛盾？連登正正就係一邊叫人fact-check，一邊自己唔用腦fact-check嘅後真相年代產物，無責任體系之弊，莫過於此。
我唔係上開連登嘅人，blog同page都係自己由2012年獨力經營至今，雖然匿名，但思想流變，自問絕對比呢啲所謂連登用戶有跡可尋。如果抗爭要繼續以無責任體系方式為主，我會繼續努力，但真係有警察無辜受傷嘅時候，請大家記得輸，係永遠都係輸喺自己身上，以後唔好再互相追究，唔好再諉過於人。
預示效應 在 您不知道的有趣心理學－預示效應（Priming） 近日YouTube ... 的推薦與評價
其實這種效應在心理學稱之為「預示效應」，人們如何對日常生活中常見、或是他們不太留意的東西，產生對判斷力或裁判標準不同程度的影響。這種影響力可大可 ... ... <看更多>