每到熱焫焫嘅七月，都會諗起那年同樣七月係斷食營避暑嘅日子。
拍到斷食營真係好夠運，當初決定去台南拍斷食營，都思考良久先敢報題。大佬呀，飛台南入營七日返一隻故仔（最後拆咗兩隻）、入營幾千蚊一個人、果度深山野嶺call白車都要等好一段時間、斷食有冇危險我自己都唔知。幸運地過到題，然後個營已經full了，死纏爛打下，哀求「我瞓走廊都得架」下刪三百字，終R得加位。幸幸運地得到加位，又邊有攝影師肯七月天時暑熱同我去日日瞓地板、冇冷氣冇嘢食（只能promise佢買定一箱杯麵），幸幸幸運地又有人陪我癲。
炎夏入營，蘇爸蘇媽常掛係口邊話玉井係「鄉下地方」，所有人都要打地鋪，設施很簡樸，我本來仲以為會冇馬桶（最壞打算）。以為嘆開冷氣嘅城市人會熱到喊咁口，點知玉井風涼水冷，夜晚開風扇仲要加張被。
入營後被沒收電話，每朝天光唔再從警報式鬧鐘聲中驚醒，而係蘇媽時而活潑、時而溫柔的呼喊。每日要做早操、瑜珈冥想、理論堂、出去散步，覺得攰就隨時瞓，覺得悶又可以同人傾吓計。營友入面十幾歲至七八十歲都有，最神奇係大家都會搭到嘴傾計。冇電子操縱、冇太多物慾、大家好純粹地面對對方，弟弟被屋企人安排嚟，口講唔慣冇得打機但每日準時出席都係佢；同房姨姨係曾經患癌康復後嚟；最老嘅伯伯係同我一樣好奇心而嚟，但大佬呀七十幾歲呢個好奇都好大風險；仲有逆齡媽媽呃個囡嚟台灣美食旅行結果突然入營嘢都冇得食、移台港人為屋企人戒煙而嚟。每日都聽唔同人嘅故事，好有趣。
雖然檸檬鹽水真係好難飲，我形容唔到個味，總之係史上咁難飲，飲親都會打冷震。伴隨無盡嘅肚瀉都係個難忘經歷，我仲邊瀉邊拍，攝影師後期剪唔知有冇想作嘔。拍莎拍到被虐打咁（如圖八）仲有入營後坐骨神經痛又開始嚟料，有日係痛到瞓唔到，蘇爸蘇媽輪流幫我按摩。呢度啲愛係會多到瀉，多到我覺得唔斷食入嚟放吓暑假都開心。（如果想避世的話真係個好地方）
但最最有愛都係出生入死嘅攝影師港怡，每朝四點起身準備影日出，因為佢唔知邊個日出係最靚。一齊跟大隊斷食，餓到暈都一齊捱，人仔細細周身gear從無怨言。
港怡真係最好❤️ @kkkongyi
最後七日斷食輕咗四公斤，但出營食個無老鍋、繼續食吓垃圾食物就打回原形了。所以要減肥就乖乖節食做運動，唔通斷一次食包你成世瘦咩！
P.S. 圖二、十
入營前因仲趕緊稿，係迂迴曲折的山路車程上，依然寫稿，最後到達前完成，send比同事。但最意料不及係，網絡訊號早係車程一半時已斷（堅深山），結果寫好嘅稿處於唔知對方收唔收到局面，好幾日散步都偷攝影師電話四圍行山搵訊號。
#每日一trip
