講兩句星期四上畫嘅《江湖無難事》
—
《江湖無難事》嘅有趣，
在於佢高度嘅致敬，
而致敬對象竟然係護旗手彭浩翔導演。
—
除咗煞有介事嘅繡球騾仔，當中最明顯嘅致敬在於彭浩翔嘅成名作《買兇拍人》，故事入面飾演導演嘅張達明同職業殺手嘅葛民輝要補拍殺死「雙槍雄」嘅VIDEO，所以就搵咗同「雙槍雄」一樣樣，由詹瑞文飾演嘅郭偉賓進行一次「TAKE 2」，角色死咗都要繼續拍片，鬧出一連串嘅黑色笑話。
—
而《江湖無難事》，角色就變成咗「製片」同「導演」，兩個對拍戲有異常熱誠，鍾情於林正英僵屍電影，目標係進軍奧斯卡嘅年青人，因緣際會之下得到黑幫大佬嘅賞識，可以拍一套正正式式嘅電影，點知喺電影嘅開拍前夕，女主角兼大佬嘅情人意外死亡，兩個人被迫要用「死人」拍戲，極盡黑色幽默。
—
真正嘅喜劇，其實底嗰浸都係悲劇。喺無稽荒謬嘅表皮之下，《江湖無難事》講嘅係一個電影從業員艱苦求存嘅故事，兩位男主角加入黑社會，出賣自己嘅肉體，接受諸多無理嘅要求，為嘅都係可以一圓自己嘅電影夢，係《AV》入面嘅天佑同又南，係真正嘅電影發燒友。而喺戲外，電影除咗致敬彭浩翔之外，仲可以見到諸多香港舊電影嘅影子，例如喜劇之王、色情男女等等，當中好多細節並唔係直接挪用，而係沉澱過後去蕪存菁，再寫出新嘅情節，編導們都係真真正正電影嘅發燒友。
—
觀影嘅過程中，我一方面驚異台灣竟然會出到一部咁樣嘅電影，一方面慨嘆同慚愧，點樣一部致敬味咁重嘅電影，會出自鄰國台灣，而唔係我哋自己人拍。
—
電影除咗致敬以外，仲大玩錯摸，包括戲中戲中戲嘅錯摸，性別嘅錯摸，感情嘅錯摸，人生嘅錯摸，而最大嘅錯摸，莫過於係編導們應該估唔到，曾經風光，打正本土旗號嘅導演，而家已經係不折不扣嘅護旗手，喺金錢巨輪嘅輾壓之下，電影人嘅尊嚴並唔似兩位男主角咁樣企硬，轉眼間可以蕩然無存。
—
也許《江湖無難事》只係痴心錯付，但佢的確紀錄咗香港電影曾經嘅美好。以戲論戲，作為喜劇電影，佢嘅製作水平比香港近年任何一套喜劇都仲要好，而可能，呢樣嘢先係對香港電影一個最大嘅諷刺。
香港舊電影 在 香港電影（舊片） - YouTube 的推薦與評價
[Vietsub - DST] [Full HD] L for love L for lies · 犀利人妻（電影完整版） · 一屋哨牙鬼(粤语) · 香港粤语电影【化骨龙与千年虫】(粤语) · 向左走向右走. ... <看更多>