【支持本Page營運，請加入成為Patreon會員，謝謝！】
【許智峯流亡與黃之鋒坐監：抗爭犧牲就係有唔同層次，一視同仁你對得住死咗同坐緊監嘅義士咩？】
正於香港面臨無理審訊同拘禁嘅許智峯，以出訪丹麥為藉口保釋離開香港，最終宣佈流亡海外，結果惹來一番論爭，響度都講講我嘅睇法。
我從來都覺得，每一個人類都係複雜嘅構成，壞人做好事究竟讚唔讚好？好人做壞事鬧唔鬧好？呢個並唔係一條加減數咁簡單。
許智峯曾經係我響網上嚴厲批評嘅垃圾會飯民議員，因為佢成日都唔開會唔投票，當日搶政務官手機並唔係乜嘢政治迫害，而係單純比政務官捉倒飯民成日偷懶嘅行蹤紀錄，因而老羞成怒嘅表現。但去到612之後，許智峯就成個人變咗，或者可以講終於搵倒個最適合佢發揮嘅舞台──只要你成日都出現響抗爭前線，就必然搵倒佢嘅蹤影；
而且唔同胡志偉「我要見指揮官」、林卓廷721比黑社會打、譚文豪比水炮車射完之後全部都無以為繼、甚至可能落過幾次現場就消失得無影無蹤嘅政棍、亦唔同楊岳橋劉細良呢啲只響鏡頭前打卡，鏡頭後就匿哂響班記者同fa後面嘅安全範圍，許智峯係無論抗爭嘅最高潮或者最低點都永遠見倒佢企響最易被拉嘅前線，受過無數次差佬嘅騷擾、侮辱同濫捕，呢樣係我尊敬佢嘅地方。'
所以今次佢流亡海外，可能佢有措辭不當；有人翻佢舊帳拎佢一個月前先話自己無畏無懼嘅留言黎嘲笑，我仍然選擇從寬處理不忍苛責，原因就在於佢之前對抗爭嘅貢獻同犧牲實在唔小，仲要好多係我親眼見住嘅。
但掉番轉，我覺得黃絲嘗試將許智峰流亡海外吹捧成一件值得誇獎嘅事、甚至認為係抗爭嘅一部份，我就覺得好有問題。孔子曾經講過：「以德報怨、何以報德？」意思係如果你用恩惠黎報告同你有仇怨嘅人，你又可以用乜嘢黎報答恩人呢？其實呢個概念亦都可以應用響今次黃之鋒判監同許智峯流亡呢件事上面。
無錯，許智峯要拋棄香港，冚家流亡的確好慘，但流亡就係流亡，並唔會因此變成咗抗爭；就算你流亡之後繼續打國際戰線，又或者聲援香港抗爭者，走佬就係走佬，我地唔應該將呢個行為吹捧成為英雄──否則你又點對得住響香港比人打死、捉咗番大陸、同埋坐緊監嘅義士？
就等如當日梁天琦同黃台仰一個選擇坐監，一個選擇流亡海外，我唔會走去學以陶君行為首班黃屍走去嘲諷黃台仰響國外風流快話（但同一班撚人今日就走去吹捧許智峯，龍門搬到去外太空），但客觀上就係，梁天琦受嘅苦，遠遠比黃台仰受嘅多；如果將黃台仰嘅犧牲吹捧成同梁天琦一樣，咁就係對梁天琦犧牲嘅一種藐視。
所以或者唔同抗爭者都有為呢場運動付出同犧牲過，但我地要對佢地公平，就要清楚犧牲都有唔同等級：
最大犧牲嘅，係果班經已失去性命、被挾上大陸嘅無名義士，因為佢地連我地可以追憶嘅名字都無；
第二，就係陳彥霖、周梓樂、梁凌杰為首，為抗爭犧牲咗自己生命嘅人；
第三，就係而家仲響獄中受緊苦嘅無名義士，正正因為佢地無知名度，響「窮人含撚」嘅香港法律制度面前往往係判刑最重、響獄中迫害最慘嘅一班；
第四，就係正響獄中受刑嘅知名人士，包括梁天琦、快必、黃之鋒、鍾瀚林、黎智英、周庭、林朗彥等等，無論我同佢地政見有幾大分歧都好，坐得入監倉，就係香港嘅英雄，要給予崇高嘅敬意；
第五，先至係因為政治迫害而流亡海外嘅政治人物；
至於其他根本無事無幹，自己怕死匿去外國果班黃標KOL，並不在犧牲之列。
大家要搞清楚，我地讚頌嘅從來都係，流亡海外嘅政治人物對抗爭嘅付出，而唔係流亡本身，流亡係一件無可奈何嘅事，但唔撚係抗爭囉唔撚該。所以我對於果班身處外國，揸撚住枝咪猛撚叫人快啲離開香港，將移民美化成「抗爭」嘅黃標KOL真係感到非常嘔心：
屌你響個安全地方每個月靠幫班黃屍打飛機，作啲佢地想聽嘅故仔、搞埋移民生意收緊幾十萬甚至過百萬一個月，抗爭條撚咩！你話你為生活糊口無問題，話自己係抗爭者，係侮辱咗「抗爭」兩個字囉！即係身處香港、響網上開名屌尻林鄭習近平，冒住隨時被國安拘捕風險嘅本人，都唔撚敢話自己寫文開咪同前線義士嘅抗爭相提並論啦！
成日都話，香港人，尤其係班黃絲，最撚鍾意就係濫情。好似之前梁啟智之流不停響度吹捧段崇智有幾愛學生，又話係唯一願意去前線見警察嘅校長云云，歪曲事實之餘（真相就係見完差佬無結果就想走人，係現場抗爭者迫佢向警方方向行先會被射TG），好勒你吹到咁撚大，去到今日中大又報警引狼入室又恐嚇學生唔好擅自舉行集會，你梁啟智之流咪連提都唔敢提囉！唔覺得擦鞋擦得好撚樣衰架咩？
黃屍最鍾意講「你對唔對得住死去嘅義士」，如果今日你不停吹捧許智峯果篇矯情到有啲肉麻嘅高調聲明，將許智峯流亡海外呢個舉動等同於其他正響香港受緊苦、甚至已失去性命嘅義士，咁你地就真係對唔住佢地嘅付出同犧牲。
