（八十） 懷舊單位
有人問我，睇咁多次樓，有無邊間真係經典中嘅經典，我突然諗起一間，不過，呢間，係嗰時入行聽我師兄講嘅，我自己就一路都唔敢去。
間屋又唔係有咩靈異恐怕突然嘭一聲跳出黎嗰隻，之但係，聽完嗰位師兄講，我真係無膽上去開眼界。
而呢間屋，亦有好多同行知架喇，而當佢地帶客上去睇樓嘅時候，通常都叫個客自己入去睇，睇完熄返燈出黎。而自己，都係企晌出邊樓梯口好。
我興幸我無參觀過呢個單位，每次提起，我都覺得陣陣心寒。
呢個單位位於土瓜灣一幢唐樓,無lift嘅。幢樓好舊架喇，好多客都係想買黎等市建局重建翻新，我師兄當時有個客話想睇，佢就自己一個上去走一轉諗住做定功課先。
行樓梯上到去，一開門，第一個反應係：「嘩！乜…乜咁舊嘅？」
嗰種舊，唔係間屋新舊個舊…而係，懷舊個舊。
佢話，一入去好似返咗去七、八十年代咁。全屋傢私物品無郁過全部晌到，但嗰d枱枱櫈櫈全部都係酸枝傢私黎。（唔知咩係酸枝傢私嘅90後可以去google一下先）雖然係好大塵，但係擺放得好整齊，就連食飯枱嗰四張櫈都拍得井井有條。
呢位師兄第二個諗法就係…「唔通上手係收藏家？」
但即刻又諗到：「咁…又做乜唔拎走？」
太亂了，一時間好疑惑，然後，佢再見到大廳有塊屏風上面黐住咗好多好舊嘅相片，全部都係黃色同黑白色嘅，單人又有，團體又有，全部都好似係阿爺年代嘅相咁。
師兄唔敢望太耐，繼續行入去，呢個單位大約４００呎，兩房一廳，入到去廚房，佢見到有舊式電飯煲同火水爐，仲有個超大型米缸，佢仲話洗手盤到見到幾個黃色惠康膠袋，而嗰個袋嘅款式，真係舊到見都未見過…
d用品全部都好似歷史博物館先會出現嘅嘢。
師兄繼續走入第一間睡房，佢見到入門口個位有部生晒鏽嘅衣車，然後，行入多一步，擰向右邊，佢見到有個人企晌到！
「嘩！」師兄嗌咗出黎。
彈一彈後，回一回神，先發現…原來係牆上面掛咗套衫…
套衫又真係擺得幾衰下，師兄話，係成套衫連褲咁掛起咗晌牆上面…而呢套衫，係「馬姐」衫黎…即係以前梳起唔嫁嘅嗰種女傭服飾，白色大襟衫同黑色吊腳褲…
此地真係不宜久留，師兄諗住快手去埋最尾一個房間，望多一圈就算。入到去，佢見到一張碌架床，而碌架床下面有兩個喼…應該係叫做藤造嘅喼…
好衰唔衰，好奇心驅使下，佢抽咗其中一個喼出黎…當時佢其實心諗：「個喼又好似幾靚幾特別，話唔定可以當古董賣。」
然後，佢打開個喼…
然後，佢嚇到即刻冚返埋去，推返個喼入床下底，９秒９迅速離開呢間屋，口中不斷講住有怪莫怪。自此佢亦無再上過連個單位。
喼入面…佢究竟見到d乜？
佢同我講嗰陣，雖然我唔係親眼睇到個喼（好彩），但從佢臉上面嘅表情我都已經好真實咁感覺到佢當時嘅恐懼…
喼入面，一打開，佢見到一束用布包得好整齊、好靚嘅長長辮子…
再到後來，佢先聽人講起，原來馬姐過身後，d朋友為咗紀念佢係會保存住佢條辮落黎留為紀念…
咁，師兄見到嘅嗰條辮…
.
.
不能只有你看到，Tag frd 子一齊寒。
#真人真事 #離奇 #鬼故 #鬼 #靈異 #不可思議 #離奇家遮 #恐怖 #香港 #小說 #短片 #口耳相傳的香港鬼故事
ig : donotsayhello
———————————————
口耳相傳的香港鬼故事 1&2，各大書局有售。
馬姐衫 在 Majeh 馬姐的故事- 校園篇之冷衫的重要性 - Facebook 的推薦與評價
Majeh 馬姐的故事. 校園篇之冷衫的重要性. Timeline photos · May 19, 2016 ·. View Full Size · Redbean Chui Yan Chan and 52 others like this. ... <看更多>