純文字嘅碌落去就有，想睇埋啲相嘅，入 Medium 睇啦。
Medium Link: https://link.medium.com/MXZiEmgkw0
//
2019 年 10 月 4 日，日曆上用黑色字寫上嘅一日。
朝早各傳媒已經吹風，話特首會同行政會議召開特別會議，決定引用「緊急法」，頒布《禁幪面法》。儘管心情沉重，但亦抱住一絲希冀，香港政府唔會真係傻到食砒霜杜老虎。
結果，大約喺午飯時間，已經有林鄭月娥下晝三點出席記者會作出宣布嘅消息。幾千個打工仔響應號召，喺中環快閃遊行，彷彿發出最後嘅呼聲。
- - -
除咗已經大概知道底蘊嘅《禁幪面法》，坊間同時流傳會對青少年實施宵禁令。有一個講法，係引用《侵害人身罪條例》，若有 16 歲或下嘅人士被忽略，而受到肢體損害，則其父母或監護人可以被定罪，最高判監十年。
此間人心惶惶，辦公室根本冇人專心工作，甚至專登開電視等睇林鄭記招。當知道政總已疏散職員，各人亦聚焦公司幾時提早放工。如果香港經濟或生產力下滑，都全賴特區政府所賜。
不過，政府最終只係宣布主菜，即係引用「緊急法」，頒布《禁幪面法》。配菜「青少年戒嚴」暫時未見身影，雖然教育局向家長發出通告，要求在學子女校內校外都不得配戴口罩之舉，亦已經令人嘩然。
如果你問我政府嘅記招重點係乜嘢，我好肯定答你一句：政府堅決否認香港進入緊急狀態。林鄭喺引用《緊急情況規例條例》時咬文嚼字，認為香港當前嘅狀況係「危害公安」 (另一適用情況為「緊急情況」) 。做乜要咁騎呢？好明顯係要向外國領事館以及外資企業交代，以免西方國家以為香港進入緊急狀態，隨時可能實施資本或外匯管制。因為咁樣會拖垮金融市場。
市場既反應亦都漸轉溫和，恒生指數由下晝開市直插冇水花唔見咗 500 點，逐步回穩至收市只跌約 300 點。初步睇，林鄭嘅語言偽術係鎮得住個場嘅。
- - -
不過，傍晚時份情況急轉直下。講緊嘅，係市面上出現搶購糧食嘅現象，商場及店舖紛紛提早開門落閘，以及公共交通工具陸續停止服務。
港鐵既已榮升「黨鐵」，車站陸續關閉已經係常態。咁賴叔要由港島過海返九龍，趁金鐘站仲有服務，拿拿臨趕車都得卦？
殊不知灣仔站顯示西行列車三分鐘後抵達，實質上要十分鐘後先到，而金鐘站往荃灣月台早已無顯示下班車嘅時間，月台亦冇任何職員維持秩序。直到我按捺不住，質問臨時替工嘅保安員，佢哋都答唔出職員喺邊、仲有冇車過海，我決定都係跳上去中環嘅列車，轉乘天星小輪。
呢一晚，中環靜似鬼城。
冇耐之後，新聞報道金鐘站停止服務。亦即係話，晨早就冇車，不過黨鐵就係由得乘客自生自滅。
- - -
一心諗住過咗海就係神仙，畢竟巴士、的士、 Uber 都總有一架喺左近。但我錯咗，尖沙咀巴士總站空空如也，的士站連人龍都冇，因為根本架架的士都冚旗揀客或唔做生意， Uber 就明顯供不應求，一車難尋。
好啦，咁最叻坐地起價嘅紅 van 總會提供服務卦？冇。去九龍東嘅小巴，提早收車。其時只係晚上九點幾。星期五呀屌你老母。
零零舍舍有一條線維持服務，係佐敦入元朗嘅紅 van 。嗰下我明白，鄉紳父老嘅庇蔭，係乜撚嘢一回事。
去到佐敦嘅另一邊，目送返市區機場巴士離開。其他乘客話，架架車都頂閘，車廂內嘅乘客亦唔移入較後位置，冇得迫上車。後來吉車返廠，最多只接載親友，剩低男女老幼，街坊遊客，徬徨無助咁唔知點樣返屋企或者返酒店。
有說運輸署下達指令叫巴士公司、紅色小巴商會等提早收車。你可以美其名話用意係保障司機安全，但實質上，你收車唔係會預告幾點尾班車嘅咩？八號風球懸掛前兩小時加班到懸掛後因應情況先至話提供有限度服務喎。天氣變幻莫測，而示威者一直有跡可尋，唔會襲擊平民百姓乘坐嘅巴士同小巴 (蓄意加速撞向人群嘅另計) 。
嗰下我相信，政府存心，係存心，要懲罰冇乖乖地、日光日白就返屋企嘅市民。
街邊有三個大陸中年婦人遊客相擁而泣，我諗佢哋都唔知道自己做錯啲乜。放心，你哋並唔孤單，幾百萬香港人都唔知為乜，要接連遭受梁振英同林鄭月娥兩個人渣管治。
於是，歸家之路變成長征，由尖沙咀行到佐敦再去油麻地。沿路其實好平靜，或者係因為街上面一個警察都冇，又或者因為最激烈嘅抗爭時間已經過咗。我只係見到吉野家同美心代理嘅咖啡店櫥窗自己跣低咗，搞到一地都係。如果周柏豪喺度，可會流連 15 分鐘，欣賞一下玻璃碎片嘅美態？
- - -
途中，朋友間流傳另一個訊息：深圳特警會喺午夜 12 點之後來港緝拿示威者，帶返深圳梅林扣押，如果仲留喺條街度就會被捕。我心諗，又嚟嚇鬼呀？ 10 月 1 日之前，路透社夠話駐港解放軍人數短期內多咗一倍啦，結果呢？
往後適逢重陽節長假期，香港人可能又一次要好似 10 月 1 日咁，渡過一個邊度都唔使去嘅「假日」。事關黨鐵已經事先張揚星期六 (10 月 5 日) 全日停止服務，連同旗下一啲大型商場都暫停營業，市民想趁假期消遣或消費都可能要好似我呢一晚返屋企咁，過五關、斬六將。
咁嘅情景，實質上同實施戒嚴有乜嘢分別？我覺得冇。特區政府口口聲聲話香港並無進入緊急狀態，但係就將民怨推到沸點，同時透過停止公共交通工具及商場嘅服務去限制市民嘅正常活動，根本就係口講一套、做又另一套，同林鄭月娥一邊擺出對話嘅姿態，另一邊容許警隊繼續濫捕同濫暴一撚樣。
與此同時，林鄭喺記者會上亦拒絕透露，若果香港局勢未見回穩 (其實佢同成班建制派根本就唔想件事完) ，嚟緊仲會有咩措施應付。記者都提出咗好多尖銳嘅問題，例如話打開咗「緊急法」呢個「潘朵拉的盒子」，往後係咪會限制通訊，例如禁止上連登或使用 Telegram ，以至延長拘捕嘅時限等等。
雖然林鄭喺言語上嘗試淡化呢啲質疑，但係「青頭仔破處」嘅道理，大家都會明白。「緊急法」同實彈一樣，只會一用再用，而且範圍越來越廣泛。何況法庭已經拒絕就《禁幪面法》提出嘅司法覆核，政府已經確立咗一套方法，令來自民主及文明社會嘅普通法制度，徹底為獨裁極權服務。講白啲，政府擺出嘅態度，其實就係「唔係你死，就係我亡」。呢種管治嘅方式，絕對值得寫入教科書，警惕後世。
駐港解放軍人數 在 美国之音中文网- 【解放军驻港总部与九龙塘军营十一动向引 ... 的推薦與評價
自从香港爆发反送中运动以来，解放军驻港部队人数已增加超过一倍，从之前的3千到5千人增加到目前估计约一万到一万两千人，驻港解放军与武警待命人数达到空前规模，十一 ... ... <看更多>