《尚氣與十環傳奇》crossover Pokémon 大亂鬥？
～鍾意Pokémon動畫、大電影和電腦遊戲的朋友，當這電影結局高潮，進入大羅世界時，那些白色九尾狐、火鳳凰、麒麟獸、雞翼豬、醒獅獸⋯，與及最後的神獸大戰，真係好似進入了Pokémon 世界，仲係一個大亂鬥的世界，不過係畫面又黑又亂嗰種亂鬥，睇到頗不舒服。完全唔好Pokémon的朋友，明就明，唔明問XX啦。
～ 雖然見到好多正評，不過一直期望不大，幸好去了D2睇，算值回票價啦，但個人感覺唔值爛番茄指數咁高分，可能西方人口味好唔同。故事方面尚算完整，不過有些細節位交代不足，千歲的文武為何愛得咁深，甘願放棄一切來得太簡單，尚氣除了父子關係著墨較多，但個人性格描寫不足，始終受電影長度限制，只能體諒不能描述得太深刻。
～ 成齣戲感覺是舊，邂逅一幕好曹達華、于素秋，格劍格出愛，巴士一幕同棚架一幕好成龍年代，武指本身也是來自成家班，巴士一幕算係好睇，棚架一段老實講有點長同悶，因為之前看過不少了，而且那些年無電腦特技幫手，搏晒命真打真撻的處理，睇到肉緊好多。憶妻成狂的橋段都係睇過唔少，也是意料之中發展，最估唔到嘅反而係結尾玩Pokémon大亂鬥。
～ 梁朝偉最搶戲毫無疑問，香港觀眾應該都係支持佢為主。睇完成套戲都係入唔到男主角，唔係因為佢似某人，是因為佢哋戲真係麻麻，嗰樣同偉仔又真係唔似父子，反而網上有改圖，話佢似鄭子誠個仔有說服力好多。
～ 之前《花木蘭》被指「玉華」，但仍然可以上映，今次《尚氣》直情無得上，在「玉華」領域無限擴張的時候，迪士尼還是專心外國市場罷。
#尚氣與十環傳奇 #Pokemon大亂鬥
