這兩天不少食肆老闆都找我表示對六次換氣率的新要求非常擔心,我未做飲食業之前係土木工程師,等我盡量用人話解說一下到底係乜嘢情況。
其實所有持牌食肆喺出牌嘅時候都要達到一個換氣率的法定要求,要求是每一個人每1小時要有17立方米換氣率。 我哋做餐廳點會識呢啲嘢所以從來都係請出牌顧問同埋工程公司去處理。 然後每年我哋續牌嘅時候都要比一次錢請呢啲通風顧問公司幫我哋簽一啲文件。 而家食環署其實係要求我哋比多一次生意佢(其實每年續牌你一定要聘請一個的)去以下呢個網站登記確認你是否有六次換氣率。https://www.fehd.gov.hk/tc_chi/licensing/CateringPremisesAir.html 我都問過幾間呢啲公司,大概會收幾千蚊睇吓你間舖頭大細啦。 佢哋會去實地視察同埋幫你睇圖計數,如果已經足夠六次,其實已經搞掂。夠六次嘅機會大唔大呢? 其實本來嗰個每人每小時17立方米呢個法定要求經過換算之後大約就係4-5次,好多時你真係裝嗰部抽風機會裝大啲所以好可能唔覺已已經夠6次。 (情況有啲似你屋企400尺本來裝一匹冷氣都夠,但係裝匹半安心啲)
然後100萬嘅題目: 如果真係唔夠6次點算? 係咪要執笠? 答案係唔需要執笠。 如果你個工程顧問同你講你唔夠六次,然後比一個報價你要洗三幾十萬做工程加裝抽氣系統,我可以好坦白話俾你聽佢係一個騙徒。唔需要的,(亦都根本不切實際因為淨係入則批則都搞兩年),食環署只係需要你安裝UVC紫外線殺菌機, 按你嘅座位面積大細你個承辦商幫你簡單計一計要買幾多部機,例如如果你係一個2000尺, 你可以買一部足夠2000尺有效範圍嘅機, 或者買兩部有效範圍1000尺的殺菌機。 就係咁簡單搞掂。 而家好多供應商都想賺呢筆錢所以好多呢啲機供應,有啲過萬蚊一部但係最近最平我見過$1600,其實計得到數過到關就得唔使買名牌子貴野。
所以成件事可能幾千蚊已經搞掂,只要喺四月尾之前搞掂就得(即係有兩個月時間),唔係想像之中咁困難,希望可以減低大家嘅擔憂。
#麻煩盡量share等小店都知道呢個信息
Search