《黃金花》影評
「黃金蝦代表啲咩？」
（含劇透，慎讀）
—
—
—
—
—
—
—
—
我覺得，《黃金花》係所有諗住／已成家立室嘅人，都應該去睇嘅一部電影。
—
「媽媽叫咩名？」毛舜筠問。
「黃金蝦。」凌文龍答。
—
呢段對話，係趙學而《黃金花》主題曲MV嘅片頭，我自己聽咗呢首歌好多次，亦對電影嘅呢一幕非常在意。
—
如果有得比你揀，我諗你會希望第日自己個仔女唔係醫生，就係律師，或者，至少佢應該做到佢自己想做嘅事。
—
如果有得比你揀，你會希望你嘅老婆永遠都可以KEEP住年年廿五歲，青春可人，健健康康。
—
可惜，現實大多數都係殘酷嘅。
—
如果《一念無明》可以幫助社會去除對精神病患嘅標籤，咁《黃金花》就可以提高我哋對於自閉症或者智力障礙人士嘅關注，原來佢哋／佢哋嘅家庭都好慘，我哋作為「正常人」，應該盡力愛護同包容。但係，《黃金花》想講嘅，係更加深刻嘅家庭責任。
—
睇完套戲三個月，記憶大抵已經模糊，但其中一場戲就令我頗深刻。話說黃金花同仔仔去街市買菜，撞到師奶江欣燕，咁女人相遇自然會傾計，佢哋嘅話題都離唔開小朋友，因為小朋友就差唔多係佢哋生命嘅全部。江欣燕半埋怨半講笑咁話自己個仔好難養，又反叛又乜又盛，跟住有其他人答咀，話捱多幾年，捱到小朋友定性成熟就無問題，要頂住，而果個時候，毛舜筠正正就喺江欣燕嘅旁邊。
—
如果難捱有個限期，而限期之後會有好嘅回報，我諗，大部份嘅人都唔介意捱苦，因為佢哋等緊嘅係未來豐碩嘅成果。
—
江欣燕同毛舜筠係一個隱然嘅對照，前者只需要為個仔捱幾年，未來可能就係康莊大道；而後者就唔知要捱幾耐，甚至根本唔會有限期，亦唔會有改變，正如黃金花所講，佢希望「白頭人送黑頭人。」
—
一啲父母辛苦二十年之後，個仔長大成人，應該會養番自己，「養兒成老」，見到佢哋有成就，作為父母亦會相當開心。而黃金花用咗廿年時間，花費咗比一般父母多幾十萬倍嘅心力同身力，換嚟嘅係啲咩？
—
「黃金蝦。」
—
原來極端努力去到最後，自己個仔連自己個名都講唔到出嚟，一生人要個仔記住兩樣嘢，只係兩樣嘢，原來都咁難。如果要將小龍同其他小朋友做對比，我諗無一個父母會唔心up。
—
但係，其實人從來都唔應該拎嚟做比較，唔應該比較佢哋會考差幾多分，佢哋份工搵差幾多錢，佢哋個老婆邊個靚啲，有無車，有無樓，每個人都有佢自己嘅人生，都係獨立嘅個體，一切都唔應該做比較。
—
如果有得揀，父母應該都會希望自己個小朋友健健康康，但如果真係唔健康，係咪應該放棄佢呢？你有放棄小朋友嘅權利，但小朋友無選擇唔出現喺呢個世界嘅機會，係你選擇佢哋要嚟到呢個世界上。
—
《黃金花》最大嘅啟示在於，如果你希望組織你嘅家庭，希望擁有你嘅下一代，就必須承擔當中嘅「唔好」，然後先有資格享受當中嘅「好」。毛舜筠同呂良偉喺戲中就係另一個對照，有人選擇堅守到最後一刻，七日廿四小時全天候照顧，希望比自己個仔最好嘅家庭；有人選擇逃避同離開，唔睇個仔不特止，仲嫌老婆煩，走去搞女人，將爛攤子留低比自己嘅老婆承擔。《黃金花》劇情上加入咗刺殺等奇情嘅環節，但原來毛舜筠唔係想挽留同呂良偉嘅感情，佢只係想小朋友有番自己嘅爸爸。
—
生兒育女嘅責任究竟係啲咩呢？所謂結婚長相廝守嘅價值又係邊度？《黃金花》呢套電影最大嘅意義在於，將呢啲現代人可能已經遺忘咗嘅東西，重新刻入觀眾嘅腦海入面。生仔可能會係智障或者傷殘嘅，你嘅老婆亦會隨年月變老，唔再靚，會皺皮，但當你選擇唔做安全措施，當你選擇同愛人講結婚誓詞嘅時候，你就要負番應該要負嘅責任，唔理未來係好係壞，幾辛苦都好，你都要承擔。
—
呂良偉喺套戲入面都係姓「黃」，我唔肯定毛舜筠嘅原名係「金花」，定係「黃金花」，但觀乎戲名《黃金花》嘅字體設計，又好似真係叫「金花」。夫姓婦隨，豈又唔係家庭價值一個極大嘅體現？
—
（如果你咁有心機睇到嚟呢度，一篇觀後感其實要寫嘅時間真係頗長同相當費心力的，正如呢篇野都過左一千五百字了。如果你覺得文章係寫得好嘅，我一個人嘅力量真係非常有限的，唔好吝嗇你嘅like同share吖，甚至幫手推薦比朋友知道原來睇戲之後係可以有反思的，一齊傾，一齊分享同感受。網絡的力量可以很少，一篇千文字可以只像一粒沙，但同時亦可以很鉅大的，依靠的就是你，你，和你，感激不盡！）
—
黃金花 Tomorrow Is Another Day
凌文龍 Siulung ling
Teresa Mo 毛舜筠
Golden Scene Co. Ltd. - Film
本地製作有限公司
Chan Tai Lee
雄叔叔 Old School
黃金花影評 在 港唔斷戲- 《黃金花》影評「黃金蝦代表啲咩？」 （含劇透 的推薦與評價
2018年4月12日 — 《黃金花》影評「黃金蝦代表啲咩？」 （含劇透，慎讀） — — — — — — — — 我覺得，《黃金花》係所有諗住／已成家立室嘅人，都應該去睇嘅一部電影。 ... <看更多>