《三級慎入》
講明先，今日講嘅嘢可能已經好多人知，特別係一班日本通，但我真係咁大個仔第一次試，仲要係誤打誤撞，冇辦法唔分享下畀一班毒男，女仔可以迴避呢個post，怕妳哋全部unlike我。
由於我今次去日本住嘅地方比較遠，第一日凌晨喺新宿落車之後，我一早鎖定去嗰啲漫畫喫茶屋度過，無奈打算去嗰間喺我落車嘅大對角，又凍又拖住個喼，唯有求其搵間啦，點知見到兩三間都要行樓梯，個喼咁重唯有放棄，終於搵到一間叫金太郎，有電梯，2400yen（約165 HKD）可以由當時凌晨2點幾住到第二朝12點，仲想點呀？
入到去先喺櫃枱Check-In，跟住佢會比個類似超級市場購物籃你，裡面有6張獨立包裝濕紙巾，仲有一個避孕套😱😱😱，心諗咩料呀？唔理咁多，坐電梯上一層放低行李再研究，一開房門又乾淨又闊(以類似網吧角度去睇覺得大，用酒店角度當然細），夠位打開個行李，嗰張係可以調較高低嘅梳化床，前面部電視可以上網，睇DVD或者真係睇日本電視節目，真心講張床係舒服，有齊叉電設備，美中不足係中央冷氣，好在佢個籃仲有一張薄毯。
一早知道呢類地方可以拎漫畫同埋DVD睇，仲有得沖涼，只係唔知原來金太郎係主打睇AV，大約20個DVD櫃，有19個都係擺AV，仲要分晒類呀CLS，得一個櫃真係擺電影，每次嚟限睇6套，聶瞳話晒都係文人嚟架嘛......梗係唔睇啦，即刻返上房瞓覺.....
雖然已經係凌晨，但仍然有好多人嚟，我見到隔離房嗰幾個仲要係西裝友，後來問返日本朋友，佢話呢班人好多係OT到過晒尾班車時間，唯有喺度過一晚，反正有得沖涼，見到佢哋個籃擺足6隻AV，都唔知話佢哋疏肝定係慘。
呢度任何角落都賣緊飛機杯，櫃枱有，電梯口有，連廁格都有，另外有嘢食買，但你可以自由出入，行出去7仔，Lawson買嘢食返入去都得，如果你係一個男仔，太夜嚟到東京覺得租酒店好浪費，呢度其實係一個唔錯嘅選擇，當體驗下都冇壞。
好喇，大鄉里出城報告完畢，多圖，可以慢慢睇下感受個環境，BTW，金太郎係好多分店，新宿有，上野又有，梗有一間喺左近。
#人哋啲外遊資訊好正經
#點解我介紹啲咁邪惡
#地道所以全部日本人
#要預咗店員無法用英文溝通
