【七宗罪 之五】
「我係一個職業賭徒。唔係，應該話，我係一個全方位賺錢機器，我願意為賺錢，去做任何事。」 Ace 張開眼，這是他第一句說的話。
「E？呢到係邊到？我點解係到？我明明記得，上一秒，我仲係賭場...點解...？」 Ace極努力回想一秒之前發生的事。
已是七天時間了，只是Ace自己不知道。
在他面前，出現一位科學家。「我同你講，你本身死左㗎喇，係我，令你復活。你唔使明我講乜，總之，七日前你係一個殺人犯，殺左人，比人打死左，我救返你。」
科學家揚開枱上的白布，指著布內一條黑貓屍體，說：「我地同人打緊仗，你知啦？對手用左好多方法，諗住去打贏呢場仗，包括去研究神秘力量。」
「佢地乜方法都研究，甚至用漫畫嘅內容，去研究武器。例如：控制蝙蝠、麻雀，等佢地帶住啲小炸彈去炸軍艦；又例如，用原力做個小光波炸彈出黎，放出去嘅威力，可以毁滅一個城市。哈，我以為漫畫笑下就算，咁都研究？真係浪費時間。我地軍方就好唔一樣，實事求事。你睇？」
科學家接著，拿出一幅照片，道：「人地研究天方夜談，我地研究新派科技。早兩年，我軍有支步兵隊，入左森林，發現一個部落，入面有好多我地解釋唔到嘅能力。例如：有個可以反映人內心恐懼嘅符籙、有可能吸收人青春嘅磁石、仲有種對我軍好有用嘅技術... 呢個技術，就用左係你身上測試。」
Ace：「你指... 復活？」
「大約係。不過，其實係移植。貓，有9條命，你知啦... 而村民有個技術，可以將貓嘅9條命，轉去人到，令到移植者有9條命。」科學家翻開貓屍，打開頭骨，指著說：「秘密，就係呢個貓嘅腦下垂體。枱面呢隻黑貓，可以話係你嘅救命恩人，佢比左佢嘅9條命你，你之前死左一次，應該仲有8次...」
科學家停一停，露出詭異的眼神，再接著說：「其實我唔係想救你，你只係實驗品。反正你剛好死左，殺人犯無人會異議。順手拎你做實驗，又咁啱成功左。」
Ace呆了一呆，驚叫插嘴道：「咁我要比你切開研究...？」
科學家大笑：「哈哈，你可以放心，我要嘅係技術，唔係你。有左技術，就可以發展不死戰士。你同我去見一次國家元首，報告我嘅成果，你就可以自由...」
科學家果然沒有反口，隨後，Ace跟隨他見國家元首，被其他軍官指指點點一陣子後，便再次得到自由，可以離開。
離開研究院前，科學家私下叮囑Ace：「你要留意，除非係貓到移植嘅腦下垂體爛左，否則你都應該仲會有8次復活。不過，會復活，但唔會令你復原。你如果斷手斷腳，唔會生返出黎㗎。」
Ace支支吾吾回應了，便離開研究院。得到復活機會，他知道，不能再浪費在賭博上了。「我一定要賺錢，唔可以再浪費人生。」
不過，講易行難，怎樣賺？這幾乎是數十億人每天都在思考的問題，如果輕易做到，一早便解決貧窮問題啦？
Ace決定出去打工，做礦工。掘了整天煤，賺到8元。習慣賭數千元一局的Ace，覺得很不是味兒。「認真打工賺幾元，以前賭一局都一年人工啦，唔係路...」
走在回家的路上，他看到一個廣告。Ace 頓時大悟，心中盤算起一項賺錢大計來。
為實行這項大計，他從新聯繫上暗戀自己十多年，樣貌平凡的小梅。很快，兩個多月，便結成夫妻。Ace每天早出晚歸，打三份工，小梅知道丈夫辛勞工作，也不願花費，更在家紡織，幫補生計。勤儉半年，兩口子儲了5000元。
這天Ace，終於開口對小梅：「其實，我有9條命。之前死左一次，仲有8次.....」一五一十把被殺、復活的事，都告訴了小梅。
小梅是個簡單人，總之丈夫平安無事，無論他怎樣奇怪、犯過什麼錯，也沒所謂。
Ace慢慢向小梅道出，這個盤算很久的賺錢大計：「呢個城市，有20間保險公司，我想為我自己買保險。我問過，我呢個年齡，5000元保費一年，可以買到5萬元人壽保險。受益人，係你。我死左，佢賠錢之後，我復活。唔係呃保險呀，我真係死㗎，只係... 我，會復活之嘛！哈哈」
小梅有點擔心，因為她心中徹底地沒有相信過Ace曾經復活，如果要以死來呃保險，根本說不出有任何信心。「不如唔好亂黎啦… 好似你話齋，咁難得先執返條命，為錢，好似唔太值喎。不如…」
Ace很清楚小梅的憂慮，其實，甚至連Ace也沒有把握。「我明你怕乜，但係，我唔想再窮喇。我本來就已經死左，仲有乜輸先？」說罷，衝出門口，直跑到保險公司，買了一份5萬保額的保單。
回到家，Ace清楚吩咐小梅，他只能復活，不可復原，所以無論如何，也不能解剖，亦要保持屍首完整。由於他不懂游泳，故此揀選了以意外溺水的致死方式。一來，只要發現得早，屍體幾乎100%完整；二來，對於不懂游泳的他而言，較不痛苦之餘，執行起來也較可信。
他們到了一個工廠旁的海邊，Ace假裝要出海釣魚，坐了租回來的小船，飄到海中心。
小船翻到，小梅大叫「救命呀！我老公唔識游水㗎，快啲救佢呀！」工廠工人紛紛跳下水，游向Ace，當日海浪大，用了差不多20分鐘，才把Ace救上來。再半小時，醫生來到，證實Ace已經死了。
有了醫生證明，很快便發出死亡證，小梅也能認領屍首。保險公司方面，一確實死亡，五天已經出保險支票，第七天中午，支票兌現。當晚，Ace在家中醒了過來。
「成功喇！！我都話得㗎啦！！Yes！！5萬到手未？ 到嗱？哈哈哈哈！好呀！」Ace開心得尖叫起來。小梅看到Ace甦醒，眼中也高興得流下眼淚。
這是Ace第二次復活，第一次以死來賺保險賠償。
由於沒有電子記錄制度，所以Ace只要去另一家保險公司投保，再在另一個海邊溺斃，另一位醫生簽發死亡證，計劃已經可以天衣無縫。
第一次成功後，Ace可以說是再接再厲，把5萬的保險賠償，全都放在另一家保險公司，為自己投保人壽，而這次保額，已達50萬。過後，再次遇溺、死亡、賠償、復活。
一如預期，Ace的死亡賺錢計劃，再一次成功。
一次又一次的死亡計劃，令Ace及小梅的身家資產，高達1250萬。這時，Ace已經第七次復活，第六次以死來賺保險金。
1250萬，在當年，已經是超級富豪級數。
「再來一次吧！」Ace遊說小梅說。
「其實我地已經好有錢，做乜仲要再落去呢？況且，已經無保險公司會受咁大保額㗎。而家最多買30萬，保額賠償300萬，我地都有1250萬啦，多300唔多，賺少300唔少呀… 不如唔好啦，你下次第八次㗎喇...」無論怎遊說，小梅也不同意。
過了三個月，小梅在孤兒院當義工，遇上8歲的小孤兒M。由於小梅一直希望自己可以有個小孩，看到乖巧的M，十分喜歡，當晚回家，便立刻詢問Ace，要求領養M。
可是，Ace不喜歡小朋友。小梅多次詢問，Ace都一直不同意。「你可以唔同意我賺多次保險，我都一樣可以唔同意你領養M。養個小朋友，係使錢，唔係賺錢，養黎做乜...」
說到這裡，Ace突然止住了。「好啦好啦，唔好唔開心喇，比你領養啦，聽日拎紙我簽啦一於。」小梅聽後，歡喜若狂，翌日立刻去申請領養手續。不過，她不知道，原來Ace心中另有盤算。
「我下次都已經第8次，之後無得再死，咁點賺錢好？估唔到，小梅會點化我。領養個小朋友，有乜好？梗係無啦… 哈哈，不過，等M大少少，我就可以幫M買大額保險，之後... 又有錢賺！小梅呀小梅，你成世人都咁簡單，又點會諗到，我同意領養，係因為咁呢……哈哈哈哈……」Ace心中反覆沉思著。
「唔係喎，反正都係，小梅都可以買保險喎。如果我同小梅一齊出意外，會賠得仲多。到時賠晒比M，我復活之後，換個身份，又可以變做M嘅親人，到大少少，輪到M死，再有多一次保險賠償，又可以拎返晒啲錢，計落，咁身家可能上到2000萬。」Ace一邊想，一邊笑，並開始部署這項大計劃。
就這天，Ace約小梅到沙灘漫步拍拖。「第日M搬埋黎住，就無得拍拖㗎喇。我地今日去玩下？行下沙灘？」
小梅跟隨Ace多年，也沒有真正外出拍一次拖，自然甜絲絲的跟了Ace到海邊。「E？果到有隻艇仔，咁多年，我出海去死就試過，拍拖爬艇仔反而未喎。一唔一齊試下坐艇仔浪漫下？」Ace說。
「好呀！」小梅主動拉著Ace，一同推艇出去。
到了海中央，Ace突然伸出手，推小梅落海，並按住她的頭。將要溺斃的小梅，終於聽到Ace開口說：「我買左我地兩個嘅保險，受益人係M。連埋我地本身嘅身家，好快，M就會變到好有錢，放心，我會復活，變左Ace嘅孖生弟弟，去照顧M。之後，輪到M買保險，咁我就可以好快拎返晒啲錢！」
在水中央，小梅根本無法呼吸，「你可以復活...我呢...？」死前的一刻，留在小梅腦中的，就只有這問題。
解決了小梅，Ace開始破壞小艇，假裝意外。不多久，艇身入水下沉，Ace亦落到水裡了。滿臉笑容的Ace，繼續盤算其賺錢計劃：「今次第8次復活，之後無得再復活，賺埋呢次，就要靠M嘅保險喇。計落咁就有2000萬，正！哈哈！岸上面嘅人開始發現有意外，出海喇，半小時先黎到救我，啱啱好救唔到，死去。一切盡在計劃中！復活埋呢次，剛剛好...」
就在這時，Ace的腦中突然閃過科學家與那隻黑貓屍體的畫面。
「黑貓屍體？Shit！佢死左，咪即係佢已經死左一次？咁我咪得8條命，唔係9次囉？吓！咁我今次咪無得再復活？仆街喇！」「救命呀！救……」Ace慢慢的沉沒在海中心，再也沒有醒過來。
律師來到孤兒院，簽署文件。善心的院長，對修女們說：「有誰想到，這個剛被領養的8歲小女孩，會繼承1250萬身家，與及600萬保險？以後，呢個小女孩，唔使再受苦了。」
說罷，看著M那一臉無知的微笑，大家的心，都暖和起來。
【七宗罪 之 貪婪】
