//支持本page請Click入內文比Clap，Medium會員請直接Click入去睇內文，謝謝！//
根據香港人抗爭時間表，10月28日於梳士巴利道舉行「追究警暴 連繫穆斯林 守護民眾 與記者同行」集會」。同上週民陣九龍大遊行一樣，又有一班散水黨走出黎話千祈唔好勇武搞禍件事，但事實上根本唔到你揀──當個集會仍然處於和理非階段時，警方已急不及待發射催淚彈驅散群眾。當差佬話你聽和理非無用，勇武抗爭就成為唯一出路。
其實同上星期係好相似，尖沙咀嘅衝突隨住警方嘅鎮壓，抗爭者且戰且走將個戰場慢慢帶到佐敦、油麻地、最後以旺角作為主戰場。只不過由於個集會無掛民陣牌頭，人數規模少好多，所以主要都係響彌敦道激戰，而土瓜灣紅磡、深水埗都只係停留於零星衝突水平（夜晚黃埔總算多番啲人），亦因為咁，警察早響晏晝已放膽拉多好多人。
同時亦延續上星期嘅策略，抗爭者經已摸索出一個最有效率嘅抗爭路線：借住集會聚人先同警方打一輪陣地戰，然後且戰且走伺機反攻。去到傍晚吸收聲援嘅街坊造大聲勢沿途進行裝修、私了同破壞港鐵站，最後入夜就開始散水。呢種做法嘅好處係即使抗爭隊伍被打散咗仍然能夠各自為戰，同時亦避免咗因為堅守陣地而被大圍捕嘅風險。靈活聚散更加有時候會營造倒相對優勢，無論係下晝圍剿少數警察、定係晚上打爛警車玻璃都係例子。
但掉番轉，警察亦一連兩星期由過往濫打濫捕、極其血腥嘅恐怖執法，一轉而成以無限催淚彈放題驅散群眾；直至入夜之前，只係選擇性作突擊式拘捕，其餘大多數時間都係同抗爭者玩貓捉老鼠遊戲──響呢兩個星期，抗爭者、警察雙方響彌敦道交換位置嘅次數，保守估計都超過30次。另一方面，多謝網友提醒，尋日有成百幾人被捕，明顯係拉唔倒抗爭者嘅時候，就拉普通路人同街坊補數，仍然係致力削弱一般人對勇武抗爭嘅支持，將勇武派邊緣化。
即係呢兩個星期係比我Feel倒，唔知係受到邊一方面嘅壓力、差佬係刻意減少響鏡頭前面嘅濫暴行為，而瘋狂發射催淚彈就係其中一個取代方法。但問題卻係，高層想改善形象，前線卻係難理，結果響今日仍然係唔難搵倒相當肉酸嘅鏡頭，包括向老人、傷殘人士同少女施暴；對已制服人士施加無必要暴力，甚至未作警告下開槍，然後仲要向住行駛中車輛發射催淚彈導致巴士司機不適──即係無論係藍屍定係散水黨，想場抗爭民意逆轉真係難於登天。
只係今個星期抗爭者仍然係重覆犯咗上星期嘅輕敵問題：當夜晚見倒警察好幾次追捕都空手而回，之後仲要響比人擲雜物下上警車落荒而逃，心情開始鬆懈；響嘗試幫中銀裝修時花費太多時間，在場亦無人有警覺性做哨兵，結果比警察響十至十二點呢段時間突襲成功，響中銀門口一舉拘捕多人，連帶響附近再拉一堆──響度真係要再講一次，戀戰唔緊要，但所有抗爭者應該要明白，愈近深夜為你掩護嘅街坊就愈少、危險性就愈大；必須時刻保持高度警覺：怕死，有時係會救你一命。
不停響同一戰場上進行爭奪，警察抗爭者雙方都唔再堅持大規模決戰，而係轉移找尋性價比最高嘅戰法──亦即代表開始進入持久戰階段。由於發生嘅狀況將會不停重覆，於是意志比較薄弱嘅人就會開始質疑：「重重覆覆咁搞勇武抗爭，除咗比人拉仲有咩意義？」
「勇武抗爭有咩用」呢個問題我經已答咗無數咁多次，呢度亦唔想再重覆；但有關「重重覆覆有咩意義」呢個問題，唔好忘記對面陣營嘅藍屍建制派、甚至警察都一直問緊──持久戰嘅意思從來都係，邊個捱唔倒去最後一刻，邊個就係輸家，而輸家就係會被一敗塗地被徹底清算，就係咁簡單。
問題就係有班以燒藥丸為首嘅散水黨，而家就響度不停吹噓「勇武衝擊無用論」，成日開口埋口借住副總統Mike Pence嘅反暴力發言，話如果再搞勇武衝擊，美國政客就會放棄香港，會令《香港民主及人權法案》過唔倒、美國政府以後亦唔會再幫香港云云。
即係呢啲近乎呃細路嘅無恥語言偽術，真係睇到我爆火；但基於寫到呢度字數都差唔多，留番下次先屌，響度我只引黎智英最近親身前往美國會見參議院多數黨領袖Mitch McConnell，同埋其他政客後嘅一段節錄：
//問：示威暴力升級，美國政界對香港抗爭看法有轉變嗎？
答：他們提醒我們別再在武力上升級，但他們亦了解到香港年輕人面對警暴，發生衝突是無可避免的，但千萬不要造成致命暴力，否則會逆轉民情，導致運動的失敗//
1. 別再在武力上升級：即係現有勇武抗爭級別，包括裝修、私了、火魔法，皆為美國政界可接受範圍
2. 千萬不要造成致命暴力：即係打還打，唔好打死人，呢個就係美國政界對香港抗爭嘅底線
作為成日叫人唔好暴力衝擊嘅代表黎智英，佢親自筆錄總結美國政界嘅意見應該無假啦掛？即係當美國佬都講到明只係忠告香港人武力唔好再升級、唔好採用致命武力，而係諒解發生衝突無可避免，你班散水黨就唔該收皮啦！
只有堅持到底，才可獲得最後勝利；不譴責不篤灰不割席。共勉之。
龍運巴士路線時間表 在 [12/08/2023前] LWB 龍運巴士A47X To Airport (GTC) 往機場 ... 的推薦與評價
Route 路線 : LWB 龍運巴士 A47X Direction 方向: To Airport (GTC) 往機場(地面運輸中心) Date 日期: 28/01/2023 Departure Time 出發 時間 : 04:30pm ... ... <看更多>