［交趾奇趣錄］分配中心開幕，要舞獅的！
舊文都講過左上角嘅字，Khai Thuong 係開張，Trung Tam係中心，Phan Phoi 係分配。
咁前面個「揮春」（？）寫嘅， Khai Thuong咪開張，Hong phat就係鴻發。其實明顥係中文，呢個四字詞在越南好常見。
當然我在越南會避免講，「呀呀呀呢個都係中文」，唔好咁大中華膠。但真係事實。越南嘅情況同韓國差不多，去中國化，亦都去漢字化，其實好多文化傳承冇咗。舊文都寫過（http://bit.ly/2TqFzxX），濟洲一個景點，叫주상절리，就咁叫Jusangjeolli，其實係「柱狀節理」，但韓國人已經唔知原本意思，知都只係會用音去記。越南情況都一樣。
有云去中國化先有助國家堀起，本土意識，仲有話中國近年（OK，近幾十年）形象唔好，畫清界線最好。呢個真係戇鳩到極點。先唔好講台灣香港，都叫做同源。但你睇日本，一樣保留漢字，人地有冇當日本係中國附庸？係相反，大把小朋友以為圍棋係源自日本添，話拉麵「金色不如歸」杜鵑鳥好優雅添—咁就梗係讀書少，冇聽過「不如歸去」啦。正如有人屌北京奧運「開幕式」係垃圾中文，但日本人講「告別式」就好有意境咁咯。
呀，除咗舞獅，仲有切燒豬，真係有個越南女人嚟斬到肉汁四飛，而你香港食嘅乳豬好似都唔少係越南，不過係急凍嚟。我嗰日食過嘅，就非常好食。
除咗舞獅，仲有拜神上香。咪講笑，當地人（同埋員工）十分重視，就入鄉隨俗。公司嗰邊仲問我係咪教徒呀，會唔會唔食肉呀之類，回曰我係貝碧托夫百無禁忌。其實有影相但費事貼，真係搵幾件道士嚟開壇作法，搞大半個鐘！咁當然我唔使睇佢地睇足大半個鐘。但有啲當地員工真係會跪足大半個鐘的。原因係始終越南係戰亂後嘅國家，個分配中心又郊外，當地人但凡呢啲嘢開張，都會搞壇咁嘅嘢先安心。我就百無禁忌照上香，人上我上，當然你唔上都唔會有人迫你。
—————-—————-————
版務：嚟真的了，應該3月會有不少搞作。呢度啲文應該會繼續，但埃汾會搞收費專欄，亦都搞收費chatroom（講明先，主要係我廣播，多過回你，否則好唔得閒），甚至會搞Patreon（但未諗到有乜嘢私你地，我又唔會send露點相，當然你肯每個月幾百蚊睇我露兩點我都好歡迎），另外仲會搞個Instagram（放心，貼金融圖啫）。Stay tuned．人人冇心機work from home 時，埃汾就逆市出擊了。身體力行別人恐懼時我貪婪。其實呢度啲文都會繼續，但問心你都知，就梗係優先服侍咗有課金班忠實讀者先啦。詳情之後解
呀！仲應該會有女助手！遲下介紹佢出場！會出鏡的！但佢有啲怕醜！大家唔好嚇怕佢！
