［今日寫呢啲］首先都係死唔斷氣講iBond，本人就抽9中9，用埋埃汾太同埃汾妹戶口。100%命中，仲要彈無虛發。所以都真係有少少學問，計到數的。（當然唔係抽9中6就係運氣）
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
咁，大家最關心，永恒最關心，都係嗰幾樣嘢。升定跌，買乜，幾時買幾時買，咩位買咩位賣。埃邦就冇頭兩個問題。先解答幾時賣：答案，if not now，when？至於咩位嘅，睇文吧。但講真，一手咪爭一兩舊水頂盡，雖然夾埋都成千銀嘅。你話派息會多咗？好似係。「但有冇計埋個discount rate 又高咗先？」。Patreon有講
然後又係嗰個問題，你真係幾億身家一萬幾千用嚟點煙，你就有資格唔抽。但得罪講句，我目測唔抽嗰啲，好多都仲窮過我。時間？我3個戶口玩晒都係10分鐘之內（好似5分鐘），況且，你可以在公司開會時做（＊）。機會成本嘅，講咗啦，14日，3%，你自己年度化。我就唔知你有乜投資可以冇風險有呢個回報。個個講撚到自己股神咁呀，「我拎啲錢去買安踏 Microsoft 唔好？」。「如果跌呢？」
講返市，美股就較悶，雖然Microsoft靜靜地已經2萬億市值，之前任你買。生意悶但穩陣，雲端收租佬，但又未大到算壟斷，唔會畀人搞（Windows IE呢啲就一早搞過），況且我一路都覺得Microsoft係同政府（唔止美國！）關係最好嘅Big Tech，舊派人作風。況且啲業務真係冇咁敏感。
另外，Facebook都係創新高嘅，下一個里程碑就係到佢入four comma club（1,000,000,000,000），挑戰1萬億市值。原來而家都9700。
香港嘅？明顯啲科企又翻生，希望今次真。心水邊隻？文入面有講。提示係我都係鍾意大嘢。另外，長長和系長實1113長和1都強，領展823都新高。仲買唔買得過？文入面講
當然仲有，就快大過Adidas嘅安踏。啲數真定假？貴唔中貴？又係Patreon講。但我係十幾蚊買的，而家執十幾倍。單係呢下功力你已經要去訂啦（雖然銀碼唔大。萬幾變廿萬咁啦）。學你呢網友咁呢隻贏幾千嗰隻又輸返幾千，幾時先上到岸？
每日一圖嘅，兩個都講債息。第一個圖畀你睇到條yield curve點郁，點解呢排銀行股冇運行（花旗之前11連跌！都幾誇張，雖然只係陰啲陰啲，夾埋都未夠20%）。第二個圖，畀你見到通脹同債息真係正相關，但相關性唔算好強，同埋啲data 係cluster 嘅，七十年代嘅在一堆，近年嘅又另一堆，入面細解
Good Read就好睇。第一篇講台灣，彩票同埋散戶炒股。見到啲賣出頭獎彩獎嘅區呢，嗰啲證券行嘅友，就炒得特別狼死，亦輸得特別多。原因？覺得旺地啩。STEM嘅嘢
第二篇係Patreon CEO專訪，幾好睇。由佢初心講起，到佢講明唔想做色情（電子雞要搬家？不過人地話唔係色情），公司策略，唔想搞演算法。當然仲有最重要嘅：點解公司唔使畀蘋果抽30%—雖然佢嘅解釋大家未必滿意
是真的，你在Patreon訂月費，12蚊美金，大約100港紙，我落袋大約85。其他去咗邊？除咗Patreon，就係Paypal。當然銀行都會舔啲。但蘋果似乎係冇抽到。「定暗啞底收咗你唔知？」
＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝
（＊）唔係開會有乜做？我以前開會寫Patreon或Facebook啲文添，但後來唔會，因為太顯眼。因為我打字又快，又大力，啪啪聲咁，好可疑的。另外，有啲常識都知，你打英文同打中文嘅聲完全唔同，大家會奇怪你做乜打咁多中文。加上我寫文時會好似標童上身咁（拿，呢啲就係flow，心流呀！），分分鐘老細叫都唔知，或者一路打一路口upup一路笑。所以都係唔好。
