五年前的今天，我依偎在肥媽身邊，聽著隔床兩個阿婆為了我、妳一言我一語的爭寵著！
我在肥媽耳邊輕輕的說：「妳睇吓妳個阿肥幾受歡迎？不過，無論啲阿婆幾鍾意我，我最愛嘅人始終係妳！」肥媽聽著，偷偷笑了.....
【兩個阿婆】(30.8.2015)
肥媽隔鄰床嚟咗兩個阿婆！
兩個都因為跌倒，入嚟暫住一個月！
A婆婆，86歲，老年痴呆，講嘢成日重重覆覆；至愛叫我「阿姐」，最高峰一分鐘叫我卅次！
B婆婆，88歲，醒目奇才，講嘢成日牙尖嘴利；至愛叫我「阿妹」，最鍾意瞓唔著同我傾偈！
每晚我放工去到肥媽度，一入到房，肥媽未叫，佢哋兩個首先爭住叫我！
之後，就要接連答佢哋一大堆問題.....
「啱啱放工呀？幾多點呀？食咗飯未呀？買咗嘢嚟呀？妳媽媽等咗妳好耐喇！妳晚晚都嚟，唔駛同男朋友拍拖咩？」
佢哋，更會不時為咗我而嗌交.....
A：「阿姐，妳食咗飯未？點解妳個肚唔大嘅？妳睇，我個肚好大㗎！」
B：「睬過妳呀！人哋都未結婚，個肚點會大？」
A：「阿姐，妳幾多歲呀？有冇四十幾？」
B：「撞鬼妳呀！人哋頂龍咪廿幾歲！」
我話自己就嚟卅八，兩個都唔信！繼續拗.....
一晚，A婆婆忽然講：「阿姐，呢度有冇話梅檸檬賣？我好想食！」
我未答，B婆婆即回應：「黐線㗎！邊會有得賣？不過講起我都好想食！」
我開口：「冇得賣！但我有！妳哋係咪想食？」
包甘草檸檬，係Joey送俾我！
兩個雙眼即時發光.....
第一次咁齊心：「想！」
好！一人一舊，即時靜哂！
五年後的今天，2020年8月30日(日).....
這些就是過去我過去十四年多的生活！
日間上班對住公公婆婆，夜晚放工和放假又對住公公婆婆！
不過，我好enjoy！
因我喜歡和長者相處，亦經常能逗得他們好歡喜！
而最重要的原因，是我有個至愛的肥媽讓我擁著！
如今，一切已經逝去.....
肥媽，妳還記得我嗎？
