繼羅致光響電台節目連「唔禁堂食都唔知有咁多人要室外工作」都嗡得出之後，又到張建宗響回應一名中大歷史系畢業生難搵工時妄言：「洗碗都係工作經驗，青年人要做好期望管理」。而我作為一個中大歷史系畢業生，當然忍唔住要回應下。
首先，我個人並唔覺得大學生就一定唔可以洗碗，所謂職業無分貴賤之餘，工資亦係由市場決定：假如有日洗碗人工係高過普通寫字樓工幾倍人工，咁有歷史系畢業生走去洗碗我亦唔覺得係咩世界末日、道德淪喪──我之前都有個師弟走咗去做三行，仲幫共媒01寫埋分享添啦。反而張建宗用洗碗黎做比喻，好明顯就係有種「洗碗就係低下工作」嘅偏見，都幾政治唔正確。
至於大學生係咪應該「屈就」去洗碗呢，我係覺得完全無問題。
當年我畢業果陣無耐遇著911，有段短時間我都去咗工廠摺衫：雖然辛苦程度同洗碗有距離，但12個鐘頭一更連加班唔比坐低，耐唔耐仲要幫手搬貨開箱，我諗都唔可以話我完全無基層工作體驗。
問題卻在於，你想做基層工作啫，唔代表人地想請你。
.
響果段摺衫歲月，我係曾經經歷日日比人鬧嘅日子──明明就係幾個簡單工序，手腳唔協調嘅我就係唔夠其他叔叔嬸嬸做得好做得快手，個工頭都唔止一次講：「唔係未請倒人，一早炒撚咗你」。
喂唔好以為洗碗唔駛要求學歷，就代表係一份阿豬阿狗都做得嘅工先得假，你估洗碗洗得快、乾淨之餘，又要唔打爛嘢、兼夾精神上又要忍耐得住長期反覆乏味嘅工序咁容易架？而家都唔知幾多後生仔響屋企都唔洗碗，然後你估個僱主有無耐性慢慢等你Train Up成為熟手洗碗工？
又講番我份摺衫工，因為有其他計劃，結果我咗一段超短時間就辭職轉工，然後個工頭又唉聲嘆氣話：「一早知大學生做唔長架啦，結果又要由頭請過人……」Overqualified之所以難請你，就係因為知道你係響度「騎牛搵馬」，愈高Quali嘅人愈養唔熟走得愈快，結果請你洗碗只係浪費佢地時間，最尾寧願等長少少時間搵個真係有心長期做洗碗工嘅，都唔想請你呢啲姐手姐腳嘅大學生。
總括黎講：張建宗個問題就係在於只考慮到勞動方嘅機會成本，但完全忽略咗僱主方一樣佢自己嘅僱用成本；同時工作能力嘅高低並唔可以用單一標準去衡量，響某啲工種入面，一個無受教育嘅人絕對可以爭贏大學生。
當然，我都唔排除響勞動市場入面，總會有基層工作可以「接納」倒大學生去做嘅，但另一個問題又黎勒：如果作為一個政府，竟然走去鼓勵大學生去搵一份唔需要大學訓練亦都可以做倒嘅低技術工作，咁究竟你個大學教育係咪出咗問題呢？
即係呢種講法其實都唔止出自張建宗，以前羅范椒芬曾經講過「讀完教育學院唔代表出黎一定要教書」、獅子山學會亦講過「唔好以為讀完社工就一定可以做倒社工」，佢地會將搵唔倒工嘅責任推比大專學生本身，但卻唔明白社會完善唔倒工作分配，令大專學生畢業各尊其職，又或者至少每人都搵倒自己希望做嘅工作，呢個其實就係政府嘅問題。
極端啲講，花咁多錢訓練一個大學生結果你叫佢出黎洗碗，你個政府而家係浪費緊公帑；大學生做唔倒高增值或者提升社會文化水平嘅行業，你個政府係拖慢緊香港嘅發展速度；就算撇除政治立場，單從經濟學角度黎講，呢班狗官都應該立刻下台。
