【飯民退場臨立會前，請處理好最後兩舊自己搞出黎的蘇州屎：拉死《垃圾懲費》及《全禁電子煙議案》】
人大傳出風聲，話要考慮重新再一次DQ本身早已容許佢地加入臨立會嘅郭榮鏗郭家麒楊岳橋同梁繼昌四人，結果引發飯民打算以集體總辭作為回應。由於飯民所謂「總辭」大前提都仲係要等人大最終決定DQ果刻先會做，所以執筆一刻都仲未知道佢地最尾究竟係辭定唔辭。
問題係一日佢地未辭職，一日佢地都仲係臨立會議員，所以我好希望大家唔好放鬆對臨立會飯民表現嘅監察──因為飯民留響議會並唔係一事無成咁簡單，而係正響度同政府同流合污，推緊兩個賣港動議：垃圾徵費同全禁電子煙。
響上個星期三同五，飯民響無人留意嘅情況下沾沾自喜宣佈響臨立會贏咗兩項勝仗，分別係響《垃圾徵費》議案上面突襲成功包攬正副主席，並「成功爭取」法案委員會依照上屆立法會進度繼續審議而非推倒從來；另外就係響《禁電子案》法案委員會上面迫使建制派數十位議員「疊友」加入，並想「重施故技」，要求該議案遵從上屆進度繼續富議。
好多唔熟悉議事程序嘅人可能會覺得事不關己，甚至可能會有錯覺以為飯民做得好，但實際上呢種「策略」卻係完全破壞程序公義，等如大開方便之門予特衰政府隨意通過惡法：
要知道過往立法會之所以屢屢拉布成功，就係因為根據議事程序，每新一屆立法會由於都會響議員名單上有所變動，所以上屆審議到中途嘅議案就要推倒重來重新審議；但係今屆臨立會卻係一個特殊情況：特區政府認為佢係一個延任議會，所以容許議員自行選擇究竟係繼續上屆立法會進度審議議案丫，定係依循慣例推倒重來。
本來作為反對派嘅飯民，任何可以拖延立法進度嘅手段都應該要用上，所以最佳策略就係要求法案審議推倒來來。但係難得突襲《垃圾徵費》議案委員會嘅飯民，卻竟然堅持要繼續審議法案，務求盡快將議案推上大會並予以通過。
飯民呢種做法對香港造成兩個極大損害：
一、明明臨立會就係一個非法議會，入面嘅議員係無任何民意授權，所以如果你係支持民主的話，應該係否決哂所有議案先符合民主公義價值。
二、臨立會嘅成立係基於政府強行推遲選舉而出現，換言之佢係一個同上屆立法會完全無關嘅僭建物。過往飯民之所以拉布成功，就係由於每次議案只要拉布拖到會期最尾，所有議案要重新黎過。
三、而家飯民就係打算無視自己接受人大委任根本無民意授權、無視程序公義堅持要依上屆立法會進度繼續審議《垃圾徵費》議案，咁即係代表乜呢？佢地而家比嘅藉口就話係因為「要將議案盡快推上大會進行拉布」，但現實卻係政府係可以隨意調動議案先後次序，根本對於阻延惡法毫無作用！
但掉番轉，強推《垃圾徵費》同《禁電子煙》就係變相接受咗「上屆議案未審議完畢，可以延至下屆繼續審，今年延任審唔完，下年延屆繼續審，一直審到上大會三讀通過為止」。
四、但最大鑊嘅卻唔止係咁。其實我已一直警告，《垃圾徵費》依照現時建議模式，亦即要求住戶同商戶購買政府提供嘅垃圾袋倒垃圾，最終係必然係有唔少市民選擇偷偷地落街倒垃圾──然後會點？咪臭係比咗個藉口政府以「監察市民非法傾倒垃圾」為名，裝到周街都係天眼同閉路電視囉！
五、喂當日抗爭打陣地戰，知唔知幾多義士都係靠走入啲橫街窄巷掩護之下先走得甩？然後你班飯民今日為咗你地口中嘅所謂「環保」走去支持垃圾徵費？喂當日幾多義士冒住被捕坐幾年監嘅危險將當日飯民有份支持嘅電子燈柱鋸落黎，然後你班飯民而家又想搵個藉口比政府豎立更多監察市民一舉一動嘅天眼同CCTV？
六、可能有班深黃傻粉又會撲出黎護航話「車而家立法會政府就乜都夾硬黎架啦，飯民點做又有乜所謂？」錯！我都先唔好講飯民成日企響政治道德高地譴責建制派呢樣果樣，但連最基本嘅程序公義同民主原則都唔守係無恥到極點；
更重要係，其實無論《垃圾徵費》定係《禁電子煙》建制派入面都起緊內鬨。因為以自由黨為首嘅商界本身都好抗爭垃圾徵費會為老闆增加營運成本；而電子煙則牽涉到好多報販生計，所以其實兩邊都仲係爭持緊。
好難得今次飯民真係變咗「關鍵一票」比著你係佢地會點做？當然係好似當日《逃犯條例》修訂一樣，聯商界，打土共，借力打力拉死政府議案──但呢班飯民卻唔係咁諗：佢地覺得一切嘅嘢都唔夠垃圾徵費同埋禁電子煙重要，就係寧願破壞程序公義、比個藉口政府全面監控香港人，都堅持要同土共合作，盡快將兩個議案付諸表決，協助政府迅速立法！
七、即係我真係唔知好彩定唔好彩，就正正響飯民打算暗渡陳倉出賣市民之際，共慘黨就黎個大石責石蟹，一嘢DQ四條飯狗政棍。而家呢班飯民肯定萬念俱灰，無心戀戰，但即使係咁，我仍然要響呢度嚴正提醒佢地：《垃圾徵費》同《禁電子煙》兩件蘇州屎，唔該響你地被完全逐出議會前執番乾淨佢：
響《垃圾徵費》上面，立刻用盡一切辦法響法案委員會否決議案，阻止佢死灰復燃；至於《禁子電煙》案，則應該全力支持將審議過程推倒重來──唔單止係因為自己搞出黎嘅爛攤子應該自己收拾，亦係因為貫徹番當日你班飯民「捐狗窿」話要「寸土必爭、阻延惡法」嘅承諾！
