星期四係 Story 同你哋分享我去睇輔導，朋友知道後都紛紛走來關心我，係度好多謝大家嘅好意，感謝您哋嘅愛。
睇輔導唔代表我失常，亦唔係我想尋死。只係呢三年幾經歷生育後嘅生活變化，我留意到我嘅情緒經常大起大落，每個月都有幾日極度超級低落。再加上最近親人生病及後離世，我每隔幾日就會自己坐係度喊，有時仲會訓得唔好同好想逃避現實。雖然仍可如常生活同工作，但我嘅精神狀態好似失去平衡咁，一時極度積極，一時感到人生沒有意義，完全是走向兩個不同的極端.....
我想搵個出口，所以我選擇脫離我一貫食嘢減壓逃避負面情緒嘅習慣，主動尋求輔導服務。
講到去睇輔導，好多人都未必有勇氣踏出呢一步，其實我當初都唔敢打電話去問，因為自覺「有乜理由我會處理唔到？」但放下自我再諗下，其實我走去港大讀佛學輔導嘅碩士課程就係因為我相信輔導係可以幫到自己幫到人。既然我有呢個信念，而呢個係我需要輔導嘅時候，就應該比個機會自己去搵人幫手。暫時我已經做咗4次網上輔導（因疫情嘅關係）和兩次面對面嘅輔導，我相信輔導嘅過程係可以讓我一步一步更了解自己，同埋帶領我去梳理思緒和舒緩情緒。
最後，附上其他網友分享佢哋經歷輔導中和後嘅打氣說話。如果你有情緒困擾，好鼓勵你給自己和輔導服務一個機會。踏出第一步是最離的，但正如網友所講勇於去面對自己嘅不足和軟弱，絕對係勇者嘅表現。
P.S. 有人問我係邊度睇，輔導服務有好多種，我選擇咗慈山寺佛法輔導中心，佢哋用以佛學為基礎嘅輔導方法 Dharma Therapy 來提供輔導服務，因為我自己讀緊所以就揀呢個。費用全免，但要排期。同埋唔一定係要佛教徒先可以去的，有唔少服務對象都係無信仰或者有其他宗教信仰的，仲有係唔會迫你信佛嘅。🤣圖中嘅心靈小書籤係響中心度抽的。
#佛學輔導 #DharmaTherapy #給自己一個機會
#輔導 #Counseling #BuddhistCounseling
———————
👉🏻支持我嘅性教育工作：patreon.com/veralui
———————
Facebook: sallystoy.vera
Instagram: sallystoy.vera
性事情趣分享 YouTube: sallystoy
家庭生活 YouTube: veralui
我哋鋪頭：sallystoy.com
