荷蘭「驚險」第一針
（更多歐洲/荷蘭生活資訊，立即到https://www.patreon.com/allyblahblah）
本身今日要推出《十個唔住荷蘭嘅理由》，但因為琴日喺荷蘭打咗Pfizer 第一針疫苗，有不良反應，唔少讀者私底下問起。所以決定分享一下自身嘅經歷。
荷蘭本身係跟出生年份去安排打疫苗嘅日期。只要你係有喺當地市政府登記地址，不論你係唔係荷蘭/歐盟嘅公民，都可以打疫苗。由於係90後嘅關係，安排得比較「遲」，七月先有得打第一針。身邊好多年紀較大嘅同事都已經打晒，而且冇咩不良反應，最多只係打針嘅手比較酸痛，休息一兩日就冇事。
琴日寫完論文，食完壽司，就去咗打疫苗嘅場地。荷蘭雖然整體抗疫政策備受爭議，但係政府辦事嘅效率相當唔錯。由場地安排、人流管制、設施等等都做得非常唔錯。而我打嘅係Pfizer。
先講明一下，我喺荷蘭係有打過針嘅。而且前後打過三次（其他疫苗），一般會喺家庭醫生嘅診所度打針，由專業嘅護士處理。每次打完身體都冇咩不良反應。
不過今次打肺炎疫苗有啲唔同。因為打針嗰位醫護好明顯非常唔專業。點解咁講呢？
一. 佢冇帶手套
二. 打針前後冇消毒過我手臂上嘅皮膚
三. 打完針之後塊膠布貼錯位置 （呢個我有另一位同事遇過）
呢個時候，我真係忍唔住俾一個掩面嘅emoji 🤦🏻♀️
打完針之後，要去指定嘅等候區，坐15分鐘觀察情況。其實我一坐低嗰下，已經覺得有少少唔對路。並唔係好大嘅不良反應，只不過係個頭有少少meh嘅感覺。
然後我就發短訊俾屋企某人，佢同我講最好同醫護講一聲。我決定靜靜地觀察多一陣，真係唔舒服再同醫護講。
10分鐘之後，我發覺個頭真係有啲唔舒服，而且整個人反應非常遲鈍（你知啦，我平時好精靈㗎嘛），然後我就舉手示意，其中一位醫護走過來一聽到話我個頭有啲唔舒服，即刻叫另一個醫護推輪椅過嚟，送我去醫療區（因為驚我會行嘅途中暈倒）。當時我整個人遲緩到，電話跌咗落地，都唔識執返。
其實到呢一刻，問題都唔係好大。去到醫療區之後，醫護同另一位醫生安排我瞓低，要抬高對腳，等啲血流返去個頭到。同時醫護都幫我量血壓同做檢查，確保身體上冇其他不良嘅反應。
呢一刻，雖然我個腦袋好清醒，但係身體好明顯非常遲緩，講嘢好吃力。過多幾分鐘之後，我把聲開始震。
然之後，全身震。
並唔係好大幅度嘅震，只不過係好明顯手手腳腳同埋個身會控制唔到，不停微微地震。咁一震，就震咗差唔多成個鐘。
全個過程，有醫護喺身邊陪住，前後都有兩個醫生入嚟檢查。佢哋不斷地教我呼吸（用鼻吸氣3秒，用口呼氣6秒），亦都會刻意問問題，令我分神，從而令我唔好咁緊張。其實當時我都已經懷疑自己係唔係有panic attack 🤷🏻♀️ ，即刻打電話俾屋企某人叫佢飛的過嚟。
某人過到嚟之後，保安安排佢入醫護區見我。其實係到咗呢個時候，醫生先至同某人講，我有嘅係 panic attack，本身疫苗對我身體嘅副作用唔大。
結果就係醫護、醫生同埋某人一齊陪住我，過多一陣身體震嘅幅度逐漸減弱，可以坐返起身，再過多一陣就可以自己企起身同埋行路。
點解會發生panic attack， 我都唔知道。可能係近排寫論文壓力大，又或者係心理作用。返咗屋企之後，基本上除咗打針隻手非常酸痛，冇咩特別唔舒服。雖然幫我打針嗰位醫護真係好唔專業，但照顧我嘅另一位醫護同醫生真心不得了，非常好人同有耐性。整體來講，拉上補下，不過不失啦。
又：我明白香港同荷蘭大眾對打疫苗嘅睇法好唔同。唔希望因為今次嘅經歷，而俾人誤解我唔鼓勵打疫苗。歐洲喺過去一年半疫情非常嚴峻，即使而家好多措施放鬆，因為對於社會上其他人嘅不信任（唔願意戴口罩、唔保持社交距離等等），打疫苗係對自己健康嘅保障。另一方面，如果要出入其他歐洲國家，打咗疫苗會方便好多。本身細細個氣管非常差，童年回憶就係不斷出入醫院/診所「聞氣」。所以如果你俾我揀要疫苗副作用定係再次經歷呼吸困難，我會選擇前者。
#抗疫
#疫苗
#香港人
#香港人在荷蘭
#荷蘭生活
#歐洲生活
