《終於…要對Fifa說 不了》
自從2016年買咗PS4，Fifa算係我每年必買嘅Game之一。
經歷咗Fifa16、17、18、19、20。
去到即將推出嘅fifa21，我似乎終於要講聲「再見」。
其實唔玩一隻驚，唔使太多理由，「生活忙」已經足夠。
但Fifa始終陪伴多年，點都有啲情意結。
要對佢說「不了」，唔係咁易。
但只要諗起「UT」(Ultimate Team)呢個Mode，或多或少都令我下定決心。
其實呢個Mode係好聰明，好聰明咁令EA賺大錢，抽一抽都無咗5舊水。
你想擁有 心宜球星，咩TOTY Messi、TOTSSF 牙朗、Icon油雞…等等…
唔做下課金戰士，
一係就做課命戰士（狂打weekend league）。
明明已經畀錢買咗隻Game，
有時都唔明，點解仲要課金去抽球員。
但都算啦，可以砌一隊自己嘅Dream Team，的確係好玩嘅。
由Fifa16好單調咁打Division、
到17有更多特別卡Ver、SBC、Weekend league（我記得好唔人道…星期六日，兩日打40場…痴線，隻手打到震晒。）、
18就ps4都有icon用…
等等等等…
坦白講，我都仲接受到…
但之後嘅19同20…由其是20…有好多嘢我覺得已經偏離咗軌道。
一隻PS4 game，愈來愈似一隻手遊。
手遊嘅特性係咩呢？
就係「逼你每日都要玩。」
當然，係經營策略上，唔係錯。
但對一班Game迷嚟講，未必係好事。
我見好多玩家，每日要逼住做「任務」，打友誼賽掛機；
為咗Weekly Objectives，逼住砌隊巴西隊去贏兩場；
又有任務搞到你要同隔離隊，互刷入球。
大家喺90分鐘練就嘅，唔係扭波技術，
而係L3 控個龍出嚟畀人射空門嘅時機呀！
咁叫打機咩？
仲有中期，要做任務去拎球員，咩87全能中場Acuna、後期嘅95伊巴謙莫域。
有啲易做嘅我都由佢，但有啲條件真係苛刻到呢…
隻86 Future star 辛尼奧路，
要你贏波而餘，再用「吊高波」去助攻。
你知唔知，如果對面都係識玩嘅話，你要「吊高波」去助攻有幾難呀，仲要贏波。
一個唔好彩，「吊高波」助攻成功，但90分鐘畀人追和。
無啦，咩9都無晒啦！再打啦7頭！
於是點呀？
大家都想對手渣啲囉。
好多明明實力有D3、D4嘅玩家，都跌去D9、D10，為嘅係方便解呢啲19任務。
然後去到D9、D10，再好努力咁用87Mendy橫傳助攻去換隻89Mendy。
最叻就係自隊兩粒，希望對面畀你解任。
點解打機要打到咁痛苦…？
而之後，就係「Special Card」嘅問題。
太多Special Card，我又再算啦…
本身嘅totw、toty、tots、UCL都唔夠，再年年加咩Winter refresh、libertadores、headliners。
而我自己覺得，喺fifa16、17嘅年代，特別卡係一種對球員嘅「獎勵」，佢表現好，先有特別卡，令更多人想抽到佢哋，成為自己嘅Ultimate Team。
而家？？？
成為特別卡，完全無理由同根據，EA話事，佢鍾意就變你做特別卡。
你模組好用，啲人想抽，你就會係特別卡。
好心啲叫你做「flashback」，一開始係紀念啲老將，畀佢哋回春。
去到後期，阿豬阿狗都可以Flashback可以Moment。
是但啦，EA心諗：「PAC過90，有4星weak foot 同Skill move你咪用囉。」
都都都都算啦！但Fifa20後期根本係終極失去平衡。
Special Card，正常加1、2點能力值。
但20後期，根本張張就係神卡，76卡一變就92。
我有嘅95+卡多都倒落SBC都燒唔晒。
你上星期辛苦拎返嚟嘅特別卡，下星期立即變垃圾。
同埋即使我係祖雲達斯球迷，
你畀張95Danilo我？？Danilo值95？？
你對唔對得住其他右閘呀！
加上我覺得「Weak foot」、「位置」同「Skill move」，呢啲數值係球員嘅特性。
但啲Special卡話改就改！
雲迪克可以打前鋒，全世界都可以雙五星，單蹄馬變雙槍將！
係呀，係好開心，咩卡都95，亂玩都成堆95。
打Online人人都95。
然後我問自己…
「我喺度玩緊啲咩呀…？」
我真係好迷茫…好似每星期都要硬性打幾場，
每日2AM前做sbc，
放手？你又有種「人有你有」嘅心態，
愈打…愈多卡；
愈多卡…愈唔想打。
咁多年嚟，我的確喺Fifa入面搵到好多快樂。
但同時隻Game嘅變化，亦令UT呢個模式去到盡頭。
你問我fifa20，我唯一覺得EA有個位幾好，
就係零課都大把勁卡用，係過癮。不過咁追落去對身心唔太健康。
你可能問：
咁…咪打Offline囉，唔好玩UT囉。
可惜，Fifa嘅Offline，咁多年嚟，真係無咩改進…
如果你玩Pro Club嘅話，就可以一戰。
Pro Club成班Friend係好玩啲。
但呢樣嘢…又引伸去到另一個話題…
記得Fifa16嘅時候，成班friend有個Whatsapp Group…
有差唔多7個人。晚晚都UT打Friendly。
到Fifa20…呢個Group已經沉底咗兩三年。入面同我打Friendly嘅，得返一個。
生活上嘅變化，
對於打機，好多人都無辦法下優先放棄。
或者喺Fifa18嗰時…我玩足成年終於得到92Icon Del Piero嘅剎那間，
已經係Fifa帶畀我最幸福，亦都應該終止嘅時刻。
IG: cheungson88
https://www.instagram.com/cheungson88/
你的一下Follow，我的無上成就
fifa18 在 FIFA 18 -- Gameplay (PS4) - YouTube 的推薦與評價
FIFA 18 gameplay on PlayStation 4.Welcome to GamePlayStation, where Gameplay + PlayStation = GamePlayStation! Here at this channel we offer ... ... <看更多>