原本呢個聖誕節要為電視劇開工, 拍攝好幾場重頭法庭戲, 但突然排廠景時提早喺上星期完成晒, 所以臨時得閒, 一於last minute決定起行, 跟住屋企人嚟東京實行四日三夜快閃之旅, 除咗瘋狂shopping, 感受濃厚嘅聖誕氣氛之外, 當然就係不停搵食...要搵最吸引最美味嘅好嘢食! 😋😋😋
今次喺東京一共食咗九餐, 當中有指定動作: 每日喺自己嘅酒店Hyatt Centric Ginza食早餐, 而其他都係有特別介紹又或者自己恨食嘅...
曾經摘過星嘅意大利餐廳Ristorante Aso, 本身係大宅一間, 有庭園加古樹, 充滿歐陸風情, 環境氣氛靚絕。食物方面亦令人稱心滿意, 尤其對於鍾情pasta嘅我, 今次揀嘅Stella dinner set六道菜中有兩道菜係pasta, 一道加上魚子醬而另一道更加咗黑松露, 夠晒睇頭! 🤗🤗🤗
至於連續兩年攞到米芝蓮二星嘅銀座福樹簡直係令人出乎意料, 佢雖然地方細細, 只坐八位客人, 佈置毫不起眼甚至有啲雜亂, 但主廚小野寺對每道菜所花嘅心思心意就絕對睇得出兼食得出! 尤其生熟雞泡魚撈葱同埋蟹膏蟹肉蒸蟹蓋, 真係驚為天人, 難怪五萬yen一餐都要好早book定先食到, 真心勁! 👍🏼👍🏼👍🏼
講開蟹, 仲有一間喺日比谷嘅蟹膳專門店蟹工船Kanikosen亦係無得彈, 一人一隻北海道大毛蟹, 用唔同整法嚟食唔到部位, 啖啖都係新鮮肥美嘅蟹肉, 真係令人回味無窮...嚟到東京如果唔試, 即係入咗寶山空手回, right? 🦀🦀🦀
其實喺日本又唔一定餐餐都要食星級嘅, 好多民間美食我都一樣咁嚮往, 鰻魚飯烏冬拉麵sukiyaki就係一有時間會心思思想食嘅, 今個trip都唔例外, 結果我相信呢一連九餐起碼食肥我好幾磅, 返嚟又有排減啦! 😅😅😅
話時話, 如果嚟緊WKK Travel搞番個日本星級美食之旅, 由我同大家一齊出發去食去玩, 有冇興趣先?
後記: 最近我都追緊木村套「摘星廚神」, 睇到日本人對美食嘅熱誠, 認真同追求, 絕對唔講得笑...為咗顧客一句oishii desune, 不論有星無星, 都不惜廢寢忘餐, 甚至不惜一切! 呢種精神放於任何地方, 用於任何事情, 皆值得大家學習! 💪🏼💪🏼💪🏼
#WKKTravel #HyattCentricGinza #RistoranteAso #銀座福樹 #蟹工船Kanikosen #摘星廚神
