聽意佬講,由於百多年前阿根廷有大批嚟揾真銀嘅意大利同西班牙移民,所以到目前為止呢度仍然有好多佢哋嘅後裔。
雖然冇喺度開支散葉嘅打算,但覺得對自己身處嘅地方多了解總算係件好事。
政治大學我肯定讀唔嚟,但活於亂世,教曉我好多事情......
實地體驗:4月初嚟報到時,美金兌換阿根廷披索匯率為1:20,現在10月竟然貶到得返1:40!到底呢個被譽為拉丁美洲最歐化嘅國家,曾排行全球第七大經濟體;宏觀廿年,近境呢半年嚟發生咗咩事?
我哋住喺首都,算係本國最繁華嘅城市,不過亦係最龍蛇混雜嘅犯罪熱點。雖然住喺人稱治安比較好嘅區域,但每日睇到有關搶劫案或因財喪命案嘅新聞,加上日頭自己一個返學而穿街過巷時街上混亂情況,我冇可能唔提心吊膽。
香港人買唔起樓會被稱或自稱為窮人;喺呢度,窮人嘅指標係冇飽飯食甚至冇瓦遮頭。最新國內窮人百分比已達到27.3%,即每4個人有一個未必日日有飽飯食甚至已轉行做咗職業乞衣/劫匪。
有別於7仔,呢度嘅便利店到咗夜晚會用鐵絲網圍住,客人要買啤酒汽水或增值就喺個特設嘅窿仔遞錢俾收銀員。往機場公路塞車,的士車廂内嘅乘客密密傾電話中,突然有摩托車片過,用槌仔敲碎車窗順便敲埋乘客個頭,為的就係搶嗰部電話咁大把。越來越多床褥出現喺街角,清道夫唔會收走佢哋,因為夜晚會有一家大細嘅乞衣日頭出去執完垃圾食後晚上返去大本營瞓覺。街道上,起初以為9成嘅路人都咁專心行街唔玩電話,原來喺街攞手機出嚟㩒㩒吓俾電單車或單車經過秒剎搶咗都俾唔切反應,已屬十常八九嘅事情。賊仔狠到喺中學門口僕啲學生放學去搶電話,連公公婆婆嘅手袋都唔放過。
易地而處,換轉係我,兩公婆平均每月份工加埋揾得唔夠二萬蚊,喺布市租屋最平要一萬,不過每一年就有加幅40%,超市所有必須品及糧食平均每月加價5-10%。通貨膨脹加上過高嘅稅賦,咁不如我都去搶算罷了。
同意佬喺餐廳撐枱腳据扒,突然有個皮膚拗黑,披髮仲長過哥哥嘅身影撲埋嚟!隔住塊玻璃,那張多久未有剃鬍鬚的臉,歷經滄桑嘅眼神,一手抱著嬰孩用唇語示意:「可否給我一塊麵包?」
生於亂世,人民唯有三旬九食。
俗語有云:窮途就等於末路
到底末路盡處是否仍可見曙光?
還是趕到盡頭都追不及夕陽嘅霞光?
阿根廷,爭氣吧!
阿媽阿婆自小就教我哋亂丟食物會折福。
我只係一個另類背包客,走咁多公里嘅路,所見所聞,今趟令我體會到:
吃得飽,穿得暖,就是一種福氣。
攝於 Plaza de Mayo, Buenos Aires
#SunsetInArgentina
#阿根廷的黃昏
#布宜諾斯艾利斯實地報導
同時也有10000部Youtube影片,追蹤數超過2,910的網紅コバにゃんチャンネル,也在其Youtube影片中提到,...