【呢十幾年周圍變左好多，好懷念以前既mk時代】
「喂借啲note比我抄吖」
「得啦😎👍🏻bb陣間天地堂去邊度hea？」
「皇室堡？銅鑼灣地帶」
「又係呢啲...」
「咁唔係去邊度呀？」
上到大學之後我同男朋友有幸讀埋同一個學系同一班，每日放學之前都要諗去邊，周圍hea等上夜晚嗰堂。可能人大左成日諗返起以前，老師成日話：「你勤力啲讀到大學就好似天堂咁架喇」，無錯上到大學自由度真係大好多，可以做曬以前中學唔比做既事：染頭髮、紋身、走堂、帶電話、唔使著校服.....但以前好多娛樂，根本唔使為左去邊hea諗到頭痕，至少mk時代既種種都比依家新奇又好玩。
以前冇咩娛樂，但我地總會搵到啲野玩。仲記得中三第一日上堂已經問未係男朋友既佢：「你咩台架？」，然後偷偷地趁呀sir寫緊黑板就喺櫃桶用摺機send sms或者睇下《yes!》。之後到左高中愈來愈大膽，朝早遲左到就會睇下男朋友返黎未，同佢慢慢食埋早餐先行返學；放學即刻放頭髮、縮裙，約埋其他同學一齊特登搭車去旺角蒲旺中。嗰陣周圍都係小本經營既鋪頭，食撈麵、影貼紙相係指定動作。
返到屋企大家開始忙於更新xanga、qooza，狂加背景音樂同特別效果、閃字。見到人地買左新銀包post上去不知幾羨慕，雖然細個冇咩錢，不過捱幾個月燒賣都想買到個個追捧既牌子，咩地圖袋、Roxy衫同拖鞋、agnes b側揹袋、PC銀包等等，那些年既潮牌覺得拎出街好威好型架！所以嗰陣同朋友有好多共同喜好，見既時間仲多過屋企人，咩柒野都比對方知道曬。
唔知點解對住佢地好似咩都傾得咁，可能仲細個唔會諗話咩佢害我定我害佢嗰啲，做朋友都係交出真心。我仆街佢係第一時間嘲笑，我屋企人有事佢係第一個安慰我既人，我平時唔食人口水尾而佢係唯一一個。放學返到屋企都唔會放過佢，嗰陣人人未有手機，唯有揸住固網電話煲足成晚電話粥，兩個人就算拎住電話唔講野亦唔會覺得尷尬，反而會一手拎電話，一手爬飯、去廁所屙尿、沖涼、訓覺，比屋企人鬧先會收線。
去到畢業後，Year 1啱啱入大學要參加Ocamp，組爸組媽對自己極度熱情，入營嗰幾日氣氛好高漲，大家成個學系頓時變為一個大家庭。初頭都好開心架，但又有幾多個組既感情係可以keep到去year2、3、4？未入ocamp手機狂震，一打開個mon成千個msg，單係Load已經hang左好多次機；今時今日手機震起可能係一句「中秋節快樂呀！」，甚至「______已離開群組」。
返到學校，做group project先會同同學合作，開group、分工、各有各做、合拼做一個ppt、present、quit group，大家之間既友誼好似威化餅咁脆弱，有幾多真係完左project會再約出黎玩？每日先只得嗰幾個鐘返學，聽起黎好舒服咁，不過人人依賴電子產品，手上一部手機，就算上堂大家都只係喺度玩手機轉珠捉怪，想知道佢既野要睇fb，想同佢傾八卦要透過wtsapp。假如最後5分鐘先見人落黎拍卡，同同學既交流甚至只會限制於食飯、連機打機、唱k、reu。落堂如果冇住hall就真係食埋飯就返屋企，或者去銅鑼灣行商場等夜晚堂...
放眼望到成條街變曬做金鋪、連鎖鋪、大集團，先醒覺當mk時代先會做既野竟然變成過去。或者呢啲改變除左因為社會慢慢失去mk味之外，仲係因為人大左，唔再天真，先至愈來愈懷念嗰個單純又無害既環境。
哈哈，其實做老屎忽太念舊都唔係好事黎既，畢竟好多野都唔同曬，縱使以前既一切都好美好，但社會係一直喺度變，我地改變唔到，人既感情唔變就得啦😌
tag一個由以前到依家仲好好感情既人啦😳
