《智能作曲》陳心遙
《信報》2017年11月22日《視線所及》專欄
聚會入面見到舊同學，傾咗一陣關於人工智能嘅事，原則上大家都同意：AI將會取代人類大部分嘅工作。在座嘅同學都覺得自己嘅專業工種都有機會俾機械人同機械腦搶咗嚟做。
我話我還好，創意文字工作仲未咁容易被取代。雖然已經有第一個人工智能嘅詩人「小冰」出現，仲出埋詩集《陽光失了玻璃窗》。見過一首佢寫嘅一段詩：「我的心兒像冰雪後的水，一滴一滴翻到最後，給我生命的上帝，把它吹到縹緲的長空。」有紋有路，呃到人㗎。不過寫電影劇本同寫歌詞，我暫時未見到可以用電腦搞掂住。
作曲就好難講。特別係流行曲，有作曲家就向超級電腦輸入披頭四、巴哈等等著名嘅歌曲，再分析邊啲音樂成分嘅組合，更加吸引聽眾嘅注意。一部超級電腦，佢學嘅聽嘅，一定會多過人腦，由佢將歌曲重新組合，理論上唔難寫出一般人覺得搶耳又琅琅上口嘅歌，即係香港人口中嘅K歌；而你完全唔覺得係抄襲。其實一般人都做到，譬如曾經有人聲稱穿越咗去一個約翰連儂冇被殺嘅平行宇宙，仲偷咗一盒披頭四新專輯嘅卡式帶，叫Everyday Chemistry。一聽，披頭四嘅歌迷就會即刻聽得出，首首都係由佢哋拆夥後嘅單飛作品混音輯寫而成。
外國有研究話，流行曲係俾創作力同想像力相對低嘅人嚟聽。聽落好似侮辱緊你同我，但諗番轉頭，身邊作曲嘅朋友一定收過唱片公司嘅order：「要有咁K得咁K，咁hook要好搶耳嘅。」無奈嘅事實就係，真係呢類歌先會大hit，為歌手帶來知名度同收入。
又係理論上，如果人腦只係滿足於搶耳嘅旋律，琅琅上口嘅歌詞，我可以咁講，電腦而家已經做到Song On Demand；你輸入你想要嘅曲風詞風，仲有你心儀歌手嘅聲音，電腦可以即時作一首全新嘅俾你聽，甚至嵌入埋你示愛對象個人名都得。四大天王幫你唱情歌溝女不是夢。
咁人腦呢？至少我哋可以唔滿足於K歌， 可以有更高創意上嘅追求，可以聽不安於規律嘅曲調，敢於貼近生活，貼近時事嘅歌詞；趁電腦應該仲未有能力，有深愛鄉土嘅情懷，有嫉惡如仇嘅憤怒，表現愈係唔跟慣例，情感愈係濃烈澎湃，電腦就愈難以模仿。
一位同學指着另一位同學嘅小朋友話：我哋呢代都仲搵到啖飯食，到佢哋第時大個咗就難講喇。將來係點，的確好難講。但我好肯定，將來嘅命運，絕對係現在你同我每一個人，夾手夾腳可以改變嘅。
#智能作曲 #人工智能 #人工智能詩人 #微軟小冰 #披頭四 #巴哈 #K歌 #流行曲 #信報 #陳心遙
ai寫歌詞 在 [問卦] 有沒有用ChatGPT寫詞挑戰周杰倫的八卦? - 看板Gossiping 的推薦與評價