文字有價，大家入去 Medium 度睇我會開心啲。不過咁有公共性嘅文，我又唔好意思唔全文畢錄方便大家喺度睇。
- - -
其實我忍口忍咗好耐，忍到六月九日冇過港島，忍到連文都唔寫，廢事同其他人爭 airtime 爭 bandwidth 。反正寫其他嘢都冇收視，儲定稿過幾日出好過。
但係人就係咁得意嘅動物，越是忘記，越是記起。即使我真係一篇評論或者報道都冇睇過都好，淨係睇 Facebook 上面大家轉載時加上嘅 tagline 或者三言兩語，都係難免會受到觸動或感染嘅。
開場白唔講咁多。我淨係想講，大家唔好死。
我明，我明，大家好嬲。 103 萬人上街吖嘛，政府當晚十一點幾就發出新聞，一百幾十字，概括都係四個字：「話鳩之你。」然後 2019 年 6 月 12 日，備受爭議嘅《逃犯條例》修訂就會進入二讀程序。
咁但係嬲呢，係解決唔到問題嘅。你嬲，你發洩，掟爛晒屋企啲杯碟，咪又係要掃地，咪又係食飯冇碗裝飯？同樣地，你嬲，你上街，同執行人員起衝突，甚或者衝擊佔領一啲公共場所，最終咪又係畀人清場、抬走、起訴？
唔好誤會，我唔係叫大家乜嘢都唔好做。但係經過幾年嘅洗禮之後，我 somehow 明白到「和理非」嘅意義。「和理非」，係一個唔傷害自己又表達到不滿嘅方式。呢種聲音，夠大、夠響的話，係會傳遞到一啲真正能夠左右香港前途嘅人嘅耳中。
Sorry ，唔係耶穌或者佛祖。我討厭政治同離地咗好耐啫，唔代表我入咗宗教界嘅。
我意思係，香港嘅命運，從來，係從來都唔掌握喺香港人手中。大家真係唔好畀民主派班政工作者撚化，話咩民主回歸，建設民主中國。香港嘅主權係由英國交到中國嘅手上，而香港人講廣東話嘅聲音，根本唔夠英文同普通話嘅音量咁大。 1997 年，香港就係喺香港人冇選擇嘅情況之下落入中華人民共和國手中。
22 年之後，香港仍然扮演住外資進出中國嘅窗口。大陸人要去外國投資，或者直接啲講，「走資」，好多時候都仲係依賴緊香港呢個渠道或「通道」。同樣地，美資英資歐資，尤其是金融機構，仍然以香港作為亞洲時區嘅樞杻。
如果套用民間智慧、市井講法，香港就好似山林道一個代客泊車嘅車位咁，代客泊車嗰位哥哥仔，同睇場集團幕後嘅老闆，係特區及中央政府，但係車位嘅用家，就真係聯合國廁所：乜撚都有。個車位點用，使用規則係點，如何收費，你估下係睇場決定，抑或係需要同用家一齊傾？
講白啲，香港呢個城市嘅命運，一早就人在江湖，柏木由紀。唔係，係身不由己。中國揸住呢隻仲叫做會生下金蛋嘅老雞，都算係捏住咗西方社會自由進出中國經濟體系嘅咽喉。如今中國喺貿易戰同美國打到火紅火綠，科技巨企華為被制裁，華為太子女孟晚舟被捕。形勢唔算一面倒，但係，香港喺環球局勢風雲變色之下，無可避免地好似孟晚舟咁，成為賭枱 (或談判桌) 上嘅籌碼。
係，我講咗幾段廢話，都係想講，修訂《逃犯條例》最終嘅結局，同大家衝唔衝、流唔流血，都冇關係。大家出咗嚟行，外國嘅使節見咗林鄭月娥， what next ？香港市民醞釀罷工罷課， Big 4 會計師樓同匯豐、恒生、渣打容許員工彈性上班或在家工作 (另一個睇法係當 BCP ，即係 business contingecy plan ，突發情況應變計劃) 。畫面張力，比起 2014 年佔領運動時候更有過之而無不及。
然後，上市公司高銀 2019 年 6 月 11 日發出公告，宣布董事會決議撻訂、放棄啟德地皮。會議係早一日開嘅，而動議嘅，係身兼立法會議員嘅獨立董事石禮謙。你話我穿鑿附會又好，癡人說夢又好，但係此時此刻，香港政經環境風雨飄搖之際，撻呢嚿廿五球嘅訂，釋放嘅可能係兩個訊息：一、香港營商環境受到《逃犯條例》修訂及其後續所影響；二、商界代表難以繼續支持港府強推修訂。
Why not both? 又或者，點解唔可以有第三個可能性，係外國勢力見勢色唔對，向在港嘅代理人發出訊息，向中共及特區政府施壓？當然，我冇證冇據，你當我係其他政治或時事 KOL 沙盤推演噏得就噏都可以。反正大家都驗證唔到，我話 Ironman 顯靈都得架啦。
But anyway 。重點唔係 Ironman 定係美國隊長，而係，無論而家局勢係點樣，都唔會因為大家衝、佔、坐、被抬或者被打而改變。大家可以繼續用自己方式「和理非」地表達立場，算係間接迫特區及中央政府埋枱，同外國勢力及/或商界談判，或者交換條件。例如話，釋放孟晚舟，或者對華為解禁，之類，去換取撤回修訂《逃犯條例》。
不過，我有責任講出一個殘酷嘅事實，就係枱底交易嘅結果唔一定盡如人意，有可能中央作出其他妥協去達致目的，外國勢力稱心滿意就鳴金收兵，《逃犯條例》修訂照樣通過，香港及香港人成為棄子，或犧牲品。
又如何？文中已經講咗，自 1842 年開埠以來，香港人從來，係從來，都冇試過當家作主。以前冇，以後亦唔會有。乜嘢係棋子呀？畀人捉住嚟擺佈，炮二平五，馬二進三咁，隻手，唔喺你或我身上。咁大家有腳嘅，有本事咯，咪儲下錢，去下旅行，甚或買張單程機票，一去冇回頭囉。呢個，先至係真正嘅命運自決。
而要有自由選擇去留，首要條係就係唔好死。咁你明白，點解我叫大家要和理非、唔好衝啦？因為，世界很大，我們很渺小。
bcp意思 在 最近很夯的名詞「BCP」是什麼意思呢？以下帶您了解 的推薦與評價
最近很夯的名詞「BCP」是什麼意思呢？以下帶您了解 近期因心冠肺炎疫情日益嚴重，政府開始實施執行自主或強制性的居家隔離或檢疫、限制出入境及防疫照顧假等等。 ... <看更多>