華富財經
拆解卜蜂的大刁
//
卜蜂(0043)在周一宣佈斥資41億美元收購豬業務，全資附屬公司正大投資將發行新股支付代價，交易完成後，卜蜂持正大投資的股權將降至35%，變成聯營公司，而賣方就會持有65%股權，而賣方是卜蜂的關連人士，由於交易作價比卜蜂市值仲要高，收購將構成非常重大收購，須股東批准，而交易亦涉及關連人士，此收購須獨立股東在股東會上批准。
用百幾字交代收購，其實可以簡化地說成注資，由於呢單交易都幾煩，所以青冰本周看過幾份報章，都將賣方說成係卜蜂主席謝中民，其實唔係嘅。現時CPF持有卜蜂49.74%股權，而CPG就持有47.97%的CPF股權，今次賣豬業務予卜蜂的公司，正是CPG的全資附屬公司，而謝中民是CPG的最大股東，但都只係持有13%，而其他股東，按通告講，CPG有八十幾個股東，所以講到尾，係關連交易，但非謝中民注資。
交易作價係41億美元，而目標公司係賺緊8.2億美元，換言之係5倍市盈率的收購，唔算貴，但你又要睇返，卜蜂現時都係四、五倍PE，如果高價收購，相信去到股東會，未必咁易過得到獨立股東那關。
戰友可能會問，點解卜蜂唔發新股集資去收購，而用子公司發新股咁迂迴呢，青冰估這是跟現時的估值及股權結構有關。現時市盈率咁低，批股去收購，真係未必合乎股東利益，另外，青冰上星期在報章的撰文都有提及，日本股東伊藤忠商事持有25%卜蜂股權，如發新股予賣方，伊藤忠的持股將被攤薄，較公平的方法就係供股，但又咁講，伊藤忠唔一定在這個疫境下，仲有餘力去泵水供股，所以用了一個折衷方法，表面上不需集資又不攤薄伊藤忠的股權。
咁主席謝中民及一眾CPG股東，將豬業務賣予卜蜂，但換來非上市公司的股份，較難套現，照計就有點蝕，但其實除笨有精。上周在報章專欄都有分析過，卜蜂上半年度盈利爆升，全靠越南業務強勁，雖然中越收入是六、四之比，但中國業務盈利係微跌的，可想而知越南有幾勁，而發新股的正大投資，就是持有中國業務的，換言之可以說成，減持中國業務而買入豬生產業務，在業務麻麻之時減持，估值必然差啲，CPG股東算係買平嘢喎，如果日後國內養殖業務大幅好轉，邊個得益大家都應該明白。又假如日後卜蜂估值大幅提升，不再是單位數市盈率，到時批股集資，增持返這些中國業務，相信股東們都不會有hard feeling。
青冰仍然維持早前的看法，估值便宜息率高，又有內循環概念，現時又做大刁，相信現時只欠有大行吹一吹推一推，又或等收購事宜出通函，估值應有明顯提升。
//
https://www.quamnet.com/post/qDZc8k4zOXcRsBIFpsgVA?type=article&theater
cpg產業 在 CPG 產業：Facebook 個案研究 的推薦與評價
探索消費性商品業如何運用Facebook 廣告拓展業務的個案研究。閱讀來自CPG 產業的Facebook 行銷成功案例。 ... <看更多>