【龔成問答信箱】（Q15521-Q15540）
Q15521：
剛開始上你的堂，感覺良好
現在只想30歲想有大改變，車立即賣了
開始左月供股票4個月
$5000 @3
$3000 @823
另外有現金$300,000
及稅貸左$120,000係手打算投資之用
來緊每個月需還款1萬，及儲蓄5千
現在諗緊應該加多幾隻股票月供好，（12,1928, 2020, 1211)
還是一直留$420,000等跌市時大手入貨，主力考慮d潛力和倍升股。多謝呀sir指教
龔成老師：
你的方向正確，車是「負債」，會不斷消耗你的現金流，因此，賣出以增加翻你每月現金流，是較好的做法。
你上述所供的，都是有質素的，不過，只集中在2隻股並不好，因此，你加上另外4隻，是較好的做法，上述6隻都是有質素，可長期月供的股票。比亞迪（1211）、
安踏體育（2020）則不宜供太大金額。
至於現金，其實可以睇市況，部分分注投資，同時有一定的資金等機會，可以並行並靈活運用。
------------------------------------------------
Q15522：
龔sir你好，我由上年7月開始月供盈富，港鐵同恒基。
宜家股市開始吸引，想係用比較便宜價買入股票，但你建議應該集中買番以上3隻定係加入其他行業股票（例如：中銀香港，銀娛）？
另外，想問如果3隻月供既便宜區？係咪盈富：24-26，港鐵：35-40，恒基：32-34？
龔成老師：
比較好的做法，是尋找其他優質股，只要持股不太過多，建立一個平衡組合是需要的。
你可以選擇盈富（2800），以及加其他股。
盈富你預$24以下為平。
港鐵要跌多2成左右先平。
恆基則跌多15%以上先平。
------------------------------------------------
Q15523：
成哥你好，想問你隻越秀交通基建（1052），7.4買，見惠普將佢既評級評為負面，前景係咪會愈黎愈差？咁應唔應該放左佢？
龔成老師：
越秀交通基建（1052）中短期你預一定弱，加上中國經濟有轉弱情況，因此預期會弱一段時間。
不過，佢本身持有的業務，都是穩定，有質素的項目，只要過1、2年，中國經濟穩定，其實佢又會不差。因此，從較長遠的前景分析，這股仍是可投資之選。
如果你有貨，貨不過多，其實有得守，但就要耐心少少。
------------------------------------------------
Q15524：
龔Sir，想問你3662奥園健康可以買D嗎？吾該
龔成老師：
奧園健康（3662）由中國奧園（3883）分拆上市，主要在中國從事物業管理服務及商業運營服務。
例如提供住宅及非住宅物業管理服務（安保、清潔、園藝、維修與維護服務）等，業務穩定，現金流不差，但上市年期不算耐，以及現價處略貴水平，都是當中的風險。
這股前景是正面的，但平貴問題則要小心，同時不建議太大注。
------------------------------------------------
Q15525：
想問 點睇平安好醫生1833
龔成老師：
平安好醫生（1833）係潛力股，但就屬於少少高風險的類別。此股上市年期不算長。
業務上，佢地的確是高增長，同時業務有發展潛力，但睇翻佢地的財務數據，平安好醫生仍處燒銀紙狀態，所以如投資，小注好了，不過，這股的確有潛力的。
------------------------------------------------
Q15526：
呀sir，我睇你書講買股票越年輕買可以累積更多複利率
如果假設黎緊果十年出現通縮
咁股票咪冇錢賺冇複利率？
有冇乜野資產可以敵得過通縮
龔成老師：
如果我地的經濟持續地差10年，好多企業都會在這段時間，處於一個較差的環境，增長力當然有限。不過，由於我地可以在當中選擇較有優勢的股票，有些企業在差的經濟環境，仍然會做得好好，所以，點解我地要學選股，就是有任何情況，都可以有不差的回報。
可以話，優質股是較好的資產項。
------------------------------------------------
Q15527：
阿sir，點睇102？
誤信內幕，繼續守定估好。。
龔成老師：
凱升控股（0102）業務波動，加上市場對佢的炒作太多，之前有不少散戶投資，我最怕就是這類。
從估值分析，這股現價仍貴，之前只是炒作推高股價，就算現時股價已大跌，從估值分析仍是貴，賣出是較好的做法。
------------------------------------------------
Q15528：
你好，0005仲可以買？
龔成老師：
匯豐（0005）有質素，但當然不是最高質素之列，同時，賺錢能力與增長力都弱左。
這股仍可投資，但就只是收息股，唔好對股價有特別期望，所以要睇翻你的投資目標。
------------------------------------------------
Q15529：
成哥, 如手上有857, 應否繼續持有, 值得再入手?
龔成老師：
中石油（0857）都可算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。
石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。
由價佢會比較受油價影響，自主能力不強，油價長期仍會向上，而中短期可以較波動。長遠增長力只屬中等，現價合理，小注持有可以。
------------------------------------------------
Q15530：
老師，是不是有一種方法可以計算預期息率呢？
龔成老師：
假設某股，下一年的每股，全年股息為$5，如果現時股價是$100，預測股息率就是5%。
有些財經網站，會提供預測股息率，佢地會跟據一些分析去預測下年度的股息，從而計算到預測股息率。
其實，最好是自行分析，你要分析企業過往5年的業務與派息情況，然後預估下年的盈利，從而推算股息。在選擇收息股時，一般會考慮一些業務較為穩定的企業。
------------------------------------------------
Q15531：
龔Sir, 如果買美股新手用邊間好？
定係都係全部買番港股穩陣d?
多謝指點，看見你今日條片，諗緊美股...但係唔知點學
龔成老師：
首先，我地一定要選擇「有質素的企業」，美股與港股，都有有質素的企業的，因此，都是可投資之選。
第二，一定要投資自己熟識，了解的。如果你這方面無問題，基本上就可以投資。
但如果企業分析未能掌握，就可以用最簡單的做法，就是投資ETF，例如投資領航標普五百（3140）就得。
------------------------------------------------
Q15532：
老師你好啊 我今年23歲 月收入1萬7左右 一直有睇你解答其他人既問題 發現節流之外開源真係好重要！我依家有開網店，雖然未算穩定但係一個月都算係可以掙到1-3萬蚊！
比完家用後，我每個月保守應該可以草到1.5萬-2萬左右。因為之前係月光族一直無草錢，依家先啱啱草到12-13萬左右，我有少少也想問
1. 我打算50%草現金，50% for股票好嗎？
2. 股票我想一手手買，又想月供下，我應該點分配比較好？
多謝你咁有心機睇，希望你可以比少少建議啦
龔成老師：
1）可以。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。
2）你可以每月保持供$5000，餘下的資金，就可以用作「等投資之用」
你可以考慮盈富（2800）$2000。
另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
如果你不懂股，就集中供盈富$5000。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
另外，如果你網店發展得不錯，建議你在生意穩定後，想方法搞大佢，投入適當的資金，利用不同的方法試水溫，有機會幫你突破！
------------------------------------------------
Q15533：
龔Sir，我有三層樓，以你睇法，我需要減持一層平d既樓嗎？
其實呢家物業我只欠銀行約300萬按揭未還，佢地開始產生到正現金流，只係未來香港前景我係有d擔心既
龔成老師：
我相信中短期有可能出現調整，但當中仍有未知數，而我一向不太預期中短期的，香港及中國經濟轉弱，對樓市有影響，但只是中短期，同時預期跌幅不會太大。
至於長期，因為需求大，供應仍然不足。因此長遠仍會向上的。加上香港長期仍有優勢，例如稅制等，所以，只要過1、2年，經濟就會穩定，唔需要太過擔心。
由於現時的買賣物業成本高，你賣出後日後買入，其實會用好大成本。因此，考慮好明顯樓價大跌，否則，你持有無問題。這刻仍是調整格局，但長遠仍向上，因此，會偏向持有物業的。
------------------------------------------------
Q15534：
龔成你好，關金界控股一問，有人擔心naga3會對公司構成財政壓力 / 削派息之類但係當公司有新項目發展，不是應該視為增長力嗎？同時最近末期業績亦大增派息..
另外，相信金界最大優勢莫過於獨市，亦簽訂左金邊市方圓200里不得有新賭牌營業者等。但同時金界亦相當依賴內地遊客，與一眾澳門濠賭股相比，實在難分高下？
隨著日本發賭牌，實在唔知邊隻博彩股有較高增長力，你有何意見？見你都持有金沙中國，相信你對博彩股都有啲意見！
龔成老師：
金界控股（3918）有質素的。
佢因為有關發展柬埔寨Ｎａｇａ３項目成本超支，令集團要透過發行11億新股去集資支付項目。再加上2017年政總裁Dr Chen行洗可換股股債券權益，導致發行了新股，所以這都會令每股的股權攤薄左。
這是一些負面因素，略扣分，但未對佢造成核心影響。
長遠計，此股正面，該項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。
講到尾，佢是柬埔寨最大的酒店、博彩及娛樂運營商，旗艦NagaWorld是金邊市唯一的綜合式酒店及賭場娛樂城，持有為期達70年至2065年的賭場牌照，NagaWorld僱員人數超過5500人。
賭業本身是高毛利行業，而金界壟斷了金邊的業務，加上業務平穩，財務穩健，沒有未償還借貸及債務，企業有一定的質素。
不過，金界所發展的是較新興的市場，若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，這點你要明白，亦因為這原因，若投資此股，在注碼上不能去得太盡。
------------------------------------------------
Q15535：
老師，想問長實集團，自從由長實地產改名之後，佢似乎扮演集團收購者的角色？
開始偏離地產發展，又於英國收購啤酒公司（持有好多酒吧可作改建用途），點解唔交返比長建或者長和去做，定位上好似有重疊？
同時，長實持有好多資產疑似被低估，例如酒店乜乜乜，但股價則長期唔上唔落咁，雖然長和系一貫作風都是種樹唔係種菜.. 你點睇長實？謝謝你！
龔成老師：
長實集團（1113）正面的，不過，佢已經唔需只是地產。
由於佢有不少歐洲業務，相信佢中短期仍會弱，但不斷收購資產，這些項目不是無價值的，只是未能顯現。相信要等多幾年，歐洲及全球經濟較好，才可以見到收成。
這是平穩增長股，長遠仍不差，但不是高增長型。
------------------------------------------------
Q15536：
龔成 你好，有關年報一問，例如我睇緊中期業績，截至 2019年9月
咁佢年報入面都會列埋2018 年個條數，想問2018年個條數都係中期業績嗎？定係全年業績來的
但如果係全年業績，咁2019 年中期同2018 年全年比較咪無意思囉？謝謝！
龔成老師：
你一定要睇翻佢的結算日期，年報及中期報告都會講的。
例如3月31日為結算年度，中期業績就是指4月1日至9月30日。全年就是指4月1日至3月31日。中期比中期，就是今年「4月1日至9月30日」，同上年的「4月1日至9月30日」比較。
而全年則會比較翻全年。
------------------------------------------------
Q15537：
龔成老師，想多謝返你。
之前問過你意見，又一直睇你嘅fb同書，都開始累積到一定嘅積蓄，黎緊會轉戰買樓，以前好難想像自己會行到呢一步，點知一步步去做，又真係做到出黎！
所以個重點真係做出黎要act out，做少少都好，都係要做出黎先有改變。
我都係由供股做起，慢慢股票都有增長到，所以生活上都有所改善，個人嘅狀態都好左！ thank you ah！
龔成老師：
加油，你已行左正確的方向，理財是一個長期過程，要求你一步步努力，你這刻已初見成績！
可以見到你不斷向前，實在太好，之後仍要保持知識l與財富上的進步！加油！
------------------------------------------------
Q15538：
老師：本人50歲，有儲蓄，冇乜股票，想開始月供股票，幫補下日後退休。每月15000月供股票，組合計劃：
2800 盈富7000
2388 中銀香港3000
0066 港鐵 2000
1928 金莎 3000
想問老師意見.謝謝
龔成老師：
以你的年齡，其實會開始為退休做準備，但同時，財富仍有增長力（但不是進取）。
你可以做月供股票，供「平穩增值股」+「收息股」，就隨著年齡增加，慢慢增加收息股的比例。
平穩增值股，你上述的已是正確之選，基本上可以進行。
如果可以的話，想你慢慢開始，並行建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。
可以隨著年齡增加，例如55歲開始，慢慢增加收息股的比例。
------------------------------------------------
Q15539：
你好。本人持有微軟(MSFT)及蘋果(AAPL)股票，最近美股下跌，請問你認為應該止蝕離場，還是繼續持有等升？謝謝
龔成老師：
美股近年升了不少，其實早美有少少貴，其後下跌，進入了較合理的水平。
你持有是優質股，基本上唔需要擔心中短期市況，長線持有就得。除非你持貨過多，就要考慮賣出部分。
------------------------------------------------
Q15540：
你好老師，我係剛剛開始玩股票。依家29歲，發現之前只管吃喝，唔識存錢，最近同男朋友及自己用存下來既錢一次買左幾隻股票，當長線投資，因為我地一見到銀行有錢都會用，所以放係股票當存款，可以嗎？
目前共投資7手阿里巴巴，4手美團，2手百濟神州。
買完百濟後一直跌咗10蚊，有點後悔買左，應該繼續長揸，睇之後嗎？
仲有之後再入市有什麼好建議，但我地唔會選擇月供股，會存到錢一次投放。
長遠股票，有什麼建議呢？thanks
龔成老師：
「因為我地一見到銀行有錢都會用，所以放係股票當存款，可以嗎」
可以的，你地可能是較大洗的人，因此，將現金，轉為股票，原理是儲股票，是可以的。但有一個大前題：你地一定要買入優質股，同時要長線投資資，唔好炒炒賣賣。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股不能大注。
而你現時的持股，全部都是潛力股類別，對你來說，風險太高。
你應該投資盈富（2800）作為組合的核心，同時配以上述股票作輔助，建立一個平衡的組合。
阿里（9988）有質素，但都不能持有太多。
美團（3690）是有風險的類別，但有潛力的，這類股，只能小注。
百濟神州（6160）同樣是有風險的類別，但有潛力的，這類股，只能小注。你預股價較波動。
另外，建議你之後增持翻，一些較穩健的股：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。
----------------------------------------------
多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
