Search
_
依條問題其實就最常見係job interview嘅，不過我覺得都係一個可以令人自省嘅機會。
趁依個機會寄語即將入大學嘅朋友要搵清楚自己嘅方向，諗好自己將來要成為一個點樣嘅人，希望係大學攞到咩得著；唔好隨波逐流人云亦云，更加唔好覺得大學第一年係蜜月期可以隨便玩，我可以話你知到大二大三報major(如有需要)搵intern, exchange全部都係睇GPA, 而GPA係一樣好fragile嘅嘢，爛一個course要好多個去追返嘅，莫講話嗰啲爛咗成個Sem/成年嘅人...🤦🏻♂️
《致fresh grad》
我主修會計，在local firm 做intern，而 GPA只是中下游的成績，沒有上莊，沒有exchange，這樣平庸的學生，再配上這樣爛掉的CV ，一年幾萬個畢業生，明顯我只是陪跑的行列。
當大部份同學都有迫科的offer，在9月，10月開工，有本錢去一個月歐洲當grad trip，但沒有offer的我只有努力一點找工作， 畢竟沒有迫科的offer，生活還是要過的。
七月，他們在歐遊時，我己經開始了我搵工的生涯。有見迫科associate year 1 做着HK$13,000 的起薪點，幼稚的我覺得我的起薪點應該也差不多，但事實是大學生是多麼的卑微，年長總覺得90 後不夠刻苦，但事實上是起薪點20年來沒有變過，但為何物價不停上漲，而我的人工亦從來跟不上物價的升幅。
最初expected salary寫着HK$13,000，但當發覺寄了20封的求職信也沒有回音，唉，也許明白了應該要怎樣做⋯⋯
Salary再下降至HK$12,500 吧，再寄20 封信出去總有回音吧⋯⋯唉，又無回音。
Salary 再下降到HK$12,000 。唉，大學生喎，非大學生比大學生還賺得更多。
這樣HK$11,500 吧，終於在我寄了30 多封信後有了回音。
Interview 時，HR 問：「你覺得你有咩可以貢獻我地間公司？」
我：「雖然我係fresh grad，但我以前intern train up 左我好多problem solving still，仲有我對excel 都幾熟。加上我學嘢快。我覺得呢份工作我可以應付得嚟。」
HR:「其實fresh grad 咪就係咩都唔識。咩都要問，係我地公司俾機會你地嚟學嘢喳。」
HR:「我地間公司有budget control，不如咁啦，減多500 蚊啦，HK$11,000 」
己經HK$11,500，你還要壓我價，壓到HK$11,000，你有沒有人性，少五百蚊你間公司不會倒閉吧，不要跟我說什麼90 後捱唔到苦，我人工連自己都養不了，但我還要俾家用，交通費，日常費用，還有給會計考試費和學費。
我們是fresh grad，但不要本着給我們機會就是對我們施捨，我們不是沒有為你公司工作的，而且你亦沒有什麼coaching 給我們，還不是我們自己瞎子摸象的摸索回來，而且如果過了三個月試用期你覺得我表現不行，我亦不信你會留著我這個廢物在公司。所以請你不要用一個憐憫的表情看著一個乞丐好嗎？因為你從來都無施捨過我好嗎？
我呆呆的望着HR一分鐘，之後我說了人生中最荒謬的話：「其實果500 蚊真係無咩所謂，我地fresh grad 真係好需要一個平台去學習和成長，人工從來不是我首要重視的地方，多謝你公司考慮我的申請。」
這樣的假話我當時是如何說出口⋯⋯但我明白，我真的心慌了，己經找了整整一個月的工作，但不是人工過不了自己，就是根本沒法被公司screen out。每次見工後，母親總問我見工如何，她知道見工又沒有結果時，雖然也有鼓勵我，但我更多的是看到她眼中的失望和無奈。
真心，我會不會失業，每日我也在糾結着這個問題，當身邊的朋友都有工作時，好像只有我在擔憂前程。我試過高峰期一星期見7份工，見工最累不是對HR and Mgr 的問題感壓力，而是你在見著一份不喜歡的工作，亦會取得一份不怎樣的人工。當你找工作只為了生活，感覺到那種無力感，我閉上眼睛懷疑這真的是我想過的生活嗎？
曾經有一段時間，找工作灰得很，但這篇文篇總鼓勵着我—「求職講緣份」by達時製作，我才明白找工作有時像愛情一樣，有緣無份，如果是你的工作，你一定逃不掉，與其糾結著為何我屬意的工作沒有screen out 到自己，不如想想可以怎樣改進自己，我總相信你的努力別人一定會看見的。也許你現在做着不怎樣的工作，或者在找工作的漩渦中，但不打緊，因為只要你努力，一定可以找到一份你適合的工作，也許人工不用很高，但你熱愛這份工作，你不會因為這份工作害怕Blue Monday。
Fresh grad 呀，也許你現在給別人壓價，但請相信數年之後，你是有能力叫價的candidate。
《每個星期日晚，都係jobsBB嘅時間》
(尋晚已經想PO呢篇文，今日我有感而發)
Weekend永遠好似畀我老闆撳左fast forward掣咁，冇啦啦又到左星期日晚，仲有幾個鐘，又要迎接5個仆街工作天，再一次阿愁上身，真係好抑鬱。
星期日晚係最想轉工嘅時刻，一來，weekend去完街，更覺得份糧好唔夠洗，星期六出左街先發現冇帶水出街，37度喺條街度行，「到底入7仔買支水，定忍住訓練自己吞口水解渴」，我掙扎左好耐。二來，諗起星期一實有冇盡嘅會要開，個email inbox 又好似醬爆咁表示：「我要爆啦」。三來，weekdays攰到命都冇，放工根本冇動力jobsBB，星期日send信，公司HR星期一開工就見到我封信就最perfect 池啦。
而家份工好仆街，只係想搵份冇咁仆街嘅工，除左派bonus 個個月暫停「星期日jobsBB」呢個任務，望下個月曆，已經8月，「星期日jobsBB」呢個睡前任務進行左20幾個星期，依然未搵到份冇咁仆街嘅工。
----------------------------------------------
香港地，工真係冇份好，只有冇咁衰...
● 一般人得閒冇事就撳FB 同IG，我得閒冇事就jobsBB， 搭車等人飲茶都jobsBB，jobsBB app畀我撳到差唔多爛。
● 每次撳開個jobsBB app ，都會彈個句"happy is a better job"嘅promotion slogan，真係頂你個肺，好腰心腰肺呀。
● 好想搵份唔洗holiday working 嘅工，但job requirement總係見到個句willing to work on weekends and holidays
● 好想搵份唔洗OT到猝死嘅工，但job requirement總係見到個句willing to work overtime
● 好想搵份唔洗成日見到D大陸蝗嘅工，但job requirement總係見到個句frequent travel to PRC is required
● 好想搵份長工settle，但job requirement總係見到1-Year contract, renewal subject to performance
● 好想搵份唔洗成日搭車搭哂成條地鐵線，仲要再轉巴士嘅工，但D 公司愈搬愈偏僻，HK island 係港島最東，kowloon係荃灣最西。
● jobsBB完一大輪往往發覺，而家個份工好仆街，但似乎其他工都一樣咁仆街。
----------------------------------------------
勉勉強強填左大量表，send左大量信，滿心歡喜期待星期一...
● send 左咁L多信，以為星期一會有一兩間公司打來約我interview。
● 一接電話，又係現代美容，有鄉音嘅阿毛再次打來話我好好彩成為特選客戶，又送D 乜乜77畀我，點解我下下都成為「特選水魚」？點解？
● 再接電話，又係XX銀行打來，話預備左及時雨現金畀我洗。佢永遠都唔係話借錢畀我，而係畀錢我洗，真係好一個騙子。循例我都會答佢：「唔洗啦，年頭觀音借庫個時，借左十億未洗哂。」
● 6點前，每次電話響，以為幸運終於降臨喺我身上，一聽又係乜乜77廣告，個失落係等於fb notification有20個notice，一click又係乜乜77game invitation。
----------------------------------------------
矛盾大對決...
● 轉極都轉唔到工，「天啊，你唔畀我轉工，點解唔畀我中六合彩？」到底係唔係我老闆對外宣稱，唔准請我。
● 下星期日夜晚，又再次思考「到底quit左先搵工好D，定搵到先quit 好D」呢個永續問題，呢條問題係同有雞先定有蛋先一樣咁具爭議。
----------------------------------------------
(今日係JUPAS放榜嘅日子，我唔係想打沉人，但以上嘅一切，極有可能喺你畢業後發生)
十年前嘅今日(2005年8月10日)，我中5會考放榜。這10年來做過的事...能令我冇悔驕傲嗎？
● 呢10年，我成功爭取到入大學，成功爭取exchange，成本爭取做intern，再成功爭取入大公司做一個小職員。
● 我成功爭取每個月得到一份「養自己都養唔掂」嘅人工。
● 再成功爭取每個月3分2嘅working days都OT。人地去working holiday，而我大部份嘅時間都係holiday working。
● 我成功爭取左咁多野，我爭取唔到公屋，爭取唔到一個容身之所。放榜後10年，香港呢個地方令我「知我是個冇法買樓的人」。
● 活喺香港，每日放工都諗，今晚要努力jobsBB，搵份高D 人工嘅工，儲錢移民離開香港。最後我發現，最令人灰心嘅莫過於，活喺香港嘅人生意義，就係諗方法盡早離開香港。
