［不經不覺Nasdaq指數已經升穿年頭嘅位，可留意7261］全球經濟大蕭條呀可？
1. 其實有諗過用第個圖。你問我就呢個圖好，美股三大指數，本身水平就唔同，計法亦唔同（講過多次，一般專業場合就唔會計道指）。咁拍埋一齊用% change 去睇就最好。
2. 但不幸地好多人諗嘢唔係in % terms嘅。唔緊要，照講點數。Nasdaq 指數，舊年年尾剛好9000點樓下，今年一度升到9800點左右，10%左右，正係2月嘅事。10000點前就止步
3. 然後就環球大股災又話闔球鏟又話全球爆煲啦之類，如是我聞。3月嘅環球大股災（呢啲跌法就稱得上股災了），跌到6630點 —高位蒸發33%！講緊1個月嘅事。
4. 數學常識話你知，跌咗33%，就要升返一半，即係升50%先追回失地—所以點解畢菲特教你保住個本。但，why not？話咁快，亦係1個月多啲，Nasdaq 指數已經上返年初9000點嘅位，最新係9100。低位已彈返37%—未夠50%，亦未彈到2月嘅高位。
5. 故事教訓，都係老生常談。自問好醒嘅，就梗係9800點清倉然後轉頭沽空，之後6630點平短倉買返啦。哈哈哈。睇住個mon教人踢波梗係易。唔好話前半截，就算要後半截做到，都極難（當然你十萬蚊身家拎五千去做就實做到，但把托咩）。
6. 所以退而求其次，你做唔到高位沽，做唔到低位撈—但都至少唔好低位打靶沽畀人。最好嘅方法就係去多啲旅行，唔好成日睇新聞。是真的。我地呢啲靠呢辦搵食（搵食有好多種，呢個Page都係搵食）就冇計，但非金融從業員嘅。Why bother？人生仲有好多嘢畀起睇股票機有意義。當然，今次肺炎搞到人人冇得去旅行。我懷疑都因為咁多咗人打靶。
7. 講返，點解咁強？點解不停有人失業，經濟收縮又前所未見（美國講緊第二季GDP收縮 20-40%）（英國講緊300年嚟最勁）（https://bit.ly/35OidYW），點解股市仲升？本頁嘅讀者當然同出面啲麻瓜唔同，唔係完全信服都大約明。首先係印錢減息，二來經濟會反彈，三來股票唔係經濟，四來邊個話冇跌呢你見標普道指恒指都潛水中。
8. 比較有趣係，點解Nasdaq一支獨秀，全球最強。其實都不難解。多數人都同意美國暫時仲係世界最強，頂尖嘅企業頂尖嘅人材，所以美股跑贏其他市場。呢部份唔難明，對不？特別係啲抗拒大陸香港嘅會講呢啲，我都不反對，因為成績唔呃人。好啦，咁同一道理，美股入面最強嘅，正係啲科企咯，唔通靠波音咩（都升返好多架）。
9. Gobear嘅文（https://bit.ly/3bfi2XG）都寫過，美國科技股表現甚強。所謂嘅FAAMG，Facebook Amazon Apple Microsoft Google全部股價都已經水面之上。固然表現各有不同，Amazon網購當然大受惠於肺炎，Microsoft都係（雲計算），當然Apple受累於停工，Facebook Google就廣告收入減少，股價就冇咁靚仔，但都係水面上。另外仲有較細嘅Netflix 同 Tesla，前者當然又係受惠肺炎，後者就…….意外獲利喎
10. 重點係，呢堆股票嘅實力太強了。我其實覺得好好笑，人地做到萬億美金市值，都仲有人質疑個business model 掂唔掂。
11. 仲有樣嘢，我唔直接答你，用例子答你。蘋果拎住2000億美金現水，呢個冇乜特別，好多人知。2000億即係幾多？即係就算公司一部iPhone 一部ipad一部MacBook都賣唔到，一個仙itune收入都冇，一個仙in app課金收入都拎唔到，都夠燒一年。
12. 呢個本身都冇乜特別，但更特別嘅係。蘋果仲走去發債（https://bit.ly/3dv6st1），集咗85億美金（其實唔多）。點解？官方自有解釋，但我嘅解釋更簡單：咁平，唔借就笨。發呢堆債嘅息口，係0.75厘。蘋果拎去loop loop loop 大法買公用股收租都抵 – 但更加實際嘅，當然係做回購。
13. 有得咁玩，股價點唔升？你話，嘩，咁狗嘅。疫情加劇不平衡，貧富不均喎。減息益咗啲大企業喎。歡迎來到地球，為你介紹返資本主義。
14. 事實係，如果你好似匯控咁，畀人渣住個春袋（sorry 但諗唔到更傳神嘅用詞），要拎政府錢（＊），就當然會限制多多，唔畀炒人，高層薪水會受限，仲有可能唔畀派息，回購亦唔畀。亦因為咁，你見有啲公司，好似波音咁，雖然政府擺明會救，但都堅持自己發債，就係唔想畀人綁住—事實見到，只要知道政府會救，就唔使真係救，投資者就肯支持波音發債。
15. 呢堆科企，生意長做長有，即使Apple Facebook Google之類都係暫時影響，仲要係大把錢。可以直接回購，甚至借錢做回購都得。
16. 仲想買嘅，除咗可以買Nasdaq，亦可以買港股嘅ETF。華夏嘅7261，兩倍槓杆，啱晒賭性重嘅你。
17. 不過循例提醒返。第一，只係用嚟短炒，你渣得長個回報實跟唔足，發行商都一早講明。第二，兩倍喎，咁睇錯市輸錢都係兩倍。第三，7261 Track嘅唔係Nasdaq，係Nasdaq100。成份股有乜唔同就自己Google
18. 年初至今呢，其實Nasdaq100係跑贏Nasdaq的。你睇過去幾年都係添，當然呢個不代表未來。分別亦唔算真係十分非常極之咁誇張很大嘅。
19. 呀仲有，堅持覺得係泡沫嘅，隨便你。但，坐言起行嘛，覺得會爆煲想睇淡嘅，可以買都係華夏嘅ETF 7522，反向兩倍。即係人地贏你輸，人地輸你贏，好過癮的（贏到嘅話）。性質同隻7261一樣，都係Nasdaq100，亦注意返啲要點。但，我話如果你真係睇淡你就去買咋，我冇叫你睇淡的。輸錢當然係閣下問題（我唔明點解呢個世界有人覺得自己輸錢係其他人問題）
（＊）呢度真係要講，匯控極之無辜。上次金融危機佢就根本冇要英倫銀行救，唔似佢啲英國同業咁。佢選擇供股，自己股東救自己公司。點知而家英倫銀行一樣使橫手要唔畀派息，完全係開個極之壞嘅先例。好人冇好報，不如一早玩大佢等政府救啦。呢啲就係moral hazard
--------------------------
版務：收費專欄已推出，支持埃汾高質文章。幾舊水睇三個月，一星期三篇
請去呢度訂：bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。
google password change 在 There's been a change to your Google account - Web ... 的推薦與評價
Please try to sign-in again at accounts.google.com and if you cannot remember your password, please use this link (g.co/recover) to recover your password. If ... ... <看更多>
相關內容