有些事情，本身沒有男女之分，但男人跟男人做，就是有點破舊立新的感覺。
數年前有位舊同學從紐約回港定居，本身沒有聯絡，但有次在街上偶遇，交換了電話號碼，拋下一句「得閒出嚟食 lunch」之後，便各走各路了。
估唔到之後佢真係 message 我。
「你好似就嚟生日喎 (Facebook reminder)，幾時得閒食 lunch？」咁樣約到，點好意思推。
仲好記得嗰餐喺 Ole 食，即係一間喺中環有好悠久歷史嘅西班牙餐廳；這麼多年來，水準如一，而且有種懷舊風情，很不錯的。
言歸正傳，生日飯。
成餐飯大家有講有笑，又預測下未來的合作空間，總之一切正常。
Until 上甜品。
我叫咗個 Tiramisu，而喺個 Tiramisu 上面，竟然插咗支蠟燭，個碟上面仲寫住 happy birthday。
可能係我有問題，但我真係好少，好少好少，好少好少好少，試過同一位男士食飯而係有吹蠟燭呢個儀式。
I mean，男人同女人，我見過，女人同女人，我都見過，但男人同男人，真係冇乜印象。
作為一個 private banker，臨場反應當然是九秒九的迅速，我表現得相當開心和興奮。
然後，就是今天，禮尚往來，我請了那位朋友吃生日飯。
法國餐廳，高規格接待；當然，講得係禮尚往來，我一早安排了蠟燭和 happy birthday 在甜品上面。
但米芝蓮三星果然係米芝蓮三星，服務太好了，侍應竟然問我們：「使唔使幫你哋影張相？」
我知道朋友一定會想拍照，所以就好踴躍咁同侍應講 sure sure。我一手搭著他的肩膀，還故意把臉貼近；朋友嘅嘢，人哋歡喜，我真係冇乜所謂。
點知，大概一小時後，我收到他的短訊。
Hey man... actually... I mean... I really mean no offence here but... I am straight... so... yea...
徹底 lost for words，我諗如果我回一句 so am I，佢信嘅機會好微。
人哋畀我吹嘅，只係蠟燭，是我想太多了。
其實我想講呢。
正常人是應該有批判思考的，但如果每件事情都附加一個陰謀論在後面，那就只有批判，而沒有思考了。
