關於 ibank讀咩科 ，我們在網路上蒐集到這些相關的討論、資訊與評價

逼科的愛情（三）《守護不了的愛情》

如果你寧缺勿濫，又或是接受不了辦公室戀情，單身可以出到pool 的機率可以創新低，即使你幸運地成功出到pool ，但戀情可能只能維持幾個月就不了了之。

長工時之下，你無法去照顧你非auditor小女友的需要，特別是在戀愛的初期，那㮔見少一分鐘，也覺得世界末日，但你偏偏就沒有時間照顧她。

拍拖三個月，她打電話給你：「我地拍拖三個月，你係咪唔鍾意我？係咪出面有第三者？你話你嘅peak session 係由一月到三月，但點解你四月都仲要不停OT，成個復活節你都話要返工，有無咁忙呀，你連放個假都放唔到？你係咪呃我？」

你：「我真係鍾意你，我接左隻IPO，所有timeline 都好趕，我真係無時間放假。」

她：「點解你可以忙到每日工作八個鐘，都做唔晒啲嘢，我淨係覺得你係度推我，唔想見我，你覺得同我一齊悶，咪講囉，唔洗扮晒嘢，其實你係想同我分手姐。」

那一刻，你不忿被誤解，其實你一直都好努力，好努力做一個好的下屬，好努力做一個好的男友，但一日得24小時，到底可以怎樣，所以你回了一句：「我知我廢，我manage唔到工作，同時又同你拍拖，呢啲係咪你想聽到嘅答案？定你想知我flirt緊個女同事？」

之後，你們沒有再聯絡了。

做ibank同樣係長工時，但ibank 賺錢，auditor 就通街都係，你的女友會因為你做ibank 而遷就你，但一個唔賺錢嘅auditor，係無人會就你。 Sad but true！

一個非auditor 的女友，係好難接受一個auditor 的男友：

你接受到他凌晨先放工嗎？

你接受到他4日復活節假都用嚟工作唔陪你嗎？

你接受到他長期出business trip,唔陪你？或者同女同事單獨出business trip?

你接受到他好忙的時候，連一個message 都唔回你嗎？

你接受到一個星期你們只可以見面幾個鐘，食完晚飯，之後他又要回公司工作嗎？

而且，正常auditor長時期在中國大江南北出business trip，他們對食物的要求都比較簡單，對生活要求都比較「求其」。

當你們去旅行，他看到你為旅程，準備這些，又準備那些，他第一個反應係「好煩」，「其實去個旅行，要唔要執嘢執咁耐，帶唔夠咪去到先買。」。去旅行，就好似出job一樣，他不過係帶多一條team，帶多個engagement而已。

又例如，他滿口總有許多audit 界的術語，「wok唔wok？」，「唔tie？」，「你un 唔un？」，「唔re 囉？」，雖然你慢慢明白他的意思，但更多時候他講著你不懂的語言，講著你不懂的accounting standards。因為工作佔了他好大的比例，他根本沒有更多的時間涉獵其他的範籌。

讀到呢度，你會問一個問題，「到底我拍拖為左咩？」，「為左有人陪？」，「為左有人愛？」，「為左當唔開心時候，佢會係我身邊安慰我？」

但你明白所有的事，他一一都做不到。

所以你明白你要分手。

因為他無盡到一個男友應有的責任。

我不會要你去包容一個auditor 的男友，因為包容一點也不容易，難度我要你過一個拍拖比單身更寂寞的生活嗎？

而事實是他根本無盡到一個男友應有的責任。
___________________
他是一位auditor，有一個拍拖三個月的女友，他很喜歡這個愛笑的女孩，只是他工作太忙，根本無時間可以好好陪在她身邊，他知道她有一點點的失落，但唔工作，那有錢呢？

那天，他在趕IPO 的deadline，那女孩打電話給他，以為他有第三者，以為他不再愛她了。但他除了不忿之外，其實他連辯駁的時間也沒有，他生氣的說了數句話，就關了電話。他想過了四月，空暇一啲先氹番佢，之後陪佢多啲，攬下佢，佢就唔嬲啦。

那知道未過四月，他的戀情就結束了。

對他來說，他需要一個會在他身邊支持他，無論他多累，他也能在她身邊得到再次堅持下去的理由。

但他還是保護不了那弱不經風的愛情⋯⋯

我們總在不同的位置，不同的身份在想談戀愛應該如何，你有你愛情的模樣，我有我愛情的模樣，在不同位置的我們，是溝通不了的。

IG: Fakemanching1607

【龔成問答信箱】（Q14361-Q14380）

Q14361：

老師，我好懶未開股票戶口，我二十九歲，月入$23K，冇儲蓄習慣(我最想改善既地方, 我亦知你一定會鼓勵我月供股)。

近日好想搬出黎自己住，有諗過租樓或者買樓，屋企人願意幫手比首期再由我自己供，老師覺得我應該先供樓再諗，投資定先投資再諗供樓抑或應該同步進行?

大前提係我唔肯定我供完樓仲有冇錢淨⋯當幫我分析下傾下計得架喇，唔該老師

龔成老師：

物業、車位、優質股，都是典型的資產項，因此就算你買樓，其實都是一種投資，這都是累積財富的一種。

最好的方法，當然是月供股票，同時你可以買到樓，平衡財富組合是最好的。

不過，如果你家人支持，而你過往又儲唔到錢，供樓都是一個逼自己儲錢的方法。雖然供樓後，有機會你會無資金月供，但如果你可以買細少少，令你每月供樓同時，可以月供到股票，這就是最好的方法。

如果香港經法轉弱，樓市會受壓（但由於長期供應仍不足，唔好預期會跌好多），只要跌少少，都已經是入市的時機。

------------------------------------------------

Q14362：

龔SIR 你好
我月供左長建都兩年, 而家繼續月供對平均價都不大影響,

同目前呢隻都佔我投資組合成20%

諗緊應該繼續進行月供定轉另一隻月供好, 如果轉另一隻月供,目標係中長線會有較好增長潛力可以考慮邊D 股票呢? 唔該哂

龔成老師：

月供股票，最好是長線進行，例如5年，如果你以長期去睇，再繼續入，都會對買入價、持貨總數有影響的。

不過，這股佔你組合2成，我建議以這個為上限，不要過多，始終同一股佔組合過多都會有風險。所以，我會建議你繼續供，但減少供款金額。

至於資金，你可以考慮供盈富（2800）或恆基（0012）。

------------------------------------------------

Q14363：

你好，我45歲的，上個月剛失業，因為一直找不到工作，所以只好做住part time. 現part time收入一萬多，每月生话費也是一萬多。

之前一直没有投資，現在有点徬徨，銀行有存款大概一百萬，HSBC的經理上星期游說我轉了19萬分三次（即大概50萬投資），他说最少有3.9里的利息。

另外，因為我現收入不穩，把之前A|A的一份投資取了$20萬出來想自己投資。我目標是想对抗通漲和多一点避動收入。可以指点一下嗎?

龔成老師：

你這刻的狀況，反而要穩住財富，不能太多進取貪回報，而無視了風險。記住，我地投資一定是「先想風險，後想回報」。

首先，你要確定翻，HSBC你所投資的，是否穩健的項目，風險不能高（少少風險可以），以保確你的投資穩健。

另外，你自己投資的部分，都要以穩健為主，第一，你現時無收入，原有財富就很重要，第二，你過往應該不太多投資經驗，因此不能太進取。

你可以投資一些穩健類股票，平穩增長型及收息型，都是適合你的，但不能用盡現金，只能投資一部分。第一，這刻股市只是合理，第二，你要現金作防守。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q14364：

你好! 我是二十出頭的股票新手，近來在Facebook 留意到你! 回顧了不少你的 Post , 00435 及 00003 常被推薦。

但近來煤氣收入並不理想，現在還值得投資嗎?如果要買入是否等他除淨後才買? 另外，00435因社會運動，租金收入減少，等到相應在第一季業績時股價下跌才買呢?

另外，想買你的教學書，但好像太遲了，股票市場也變動不少。謝謝你

龔成老師：

煤氣（0003）香港業務，發展力不強，但重點是中國，睇翻佢中國業務，近一年的增長力有所減慢，但長遠來說，仍是有發展的。

佢係中國發展好多項目，收成期會慢慢出現，現時每年都投入大量的資本開支，已有好多公共事業，而部分資源更可以共用，這是佢其中一個優勢。

我地一定要以長遠為投資視點。現價在合理區中上部，分注投資可以。

至於陽光（0435），是很好的房託，中短期會因香港情況而影響租分收入，但所有野，都要以長線角度分析。

如果只是中短期問題，基本上不用理會。這股有質素，現價已合理，你不用等到第一季業績，因為市場一早已反映了相關的因素。

你可以先睇《股票勝經》。

------------------------------------------------

Q14365：

老師你好，我最近都開始咗月供股票，希望達到財富增值。我月入33k, 有以下組合

3@3000
66@3000
823@3000
1299@3000
2800@6000

持有9988 200股@$200

1）我35歲，呢個組合用以財富增值可以嗎？
2）我睇你有推介1928，有啲心動，想供3000，我呢個組合加1928合適嗎？
3）9988業務唔錯，有大發展空間，我應該增持9988嗎？
4）老師點睇3690？
5）唔好意思，仲有3333，呢隻有潛質嗎？

謝謝老師

龔成老師：

1）上述都是有質素的股票，同時適合你的年齡，都是平穩增長類，可以長期月供，但這刻不能用盡現金，你本身要留有一定的現金在手。

2）如果你資金足夠，即是仍有現金剩，不會消耗你原有的現金，可以加上金沙（1928）。

3）阿里（9988）是有質素的股票，同時有發展突間，前景正面，這股有長線投資的價值。不過，佢現價不算平，所以，你持有原有的貨就得，長線。

4）美團點評（3690）佢業務巨大，同時增長快。不過，佢仍是有危有機的股票。業務較新興，過往不斷燒銀紙，近期算是好翻d，但未有似樣的盈利，當然，可能有前景的。這類企業不是不可投資，在要控制注碼，不能大注。

因為無人知真正的發展情況，因此市場對其估值都是「估估下」，這一定會帶來股價上的波動，如小注，都可以考慮的。

5）中國恒大（3333）不能說無質素，但可以話存有風險。

佢本身都有一定的業務價值，無論品牌、物業質素、銷售網絡、規模等，在近年內地樓市唱旺的情況下，佢的盈利理想，但如果樓市逆轉，對佢會有影響。

而較大的問題，就是佢的負債，負債比率高得可怕，好景是當然可以好賺錢，但市道逆轉，又或遇到某些危機時，就會有不利情況。

因此，這股不是不能投資，只是背後存在風險，投資時要控制注碼。

------------------------------------------------

Q14366：

老師，你有研究494嗎？

龔成老師：

利豐（0494）的投資價值正不斷減少。

過往，佢都是一隻優質股，但10年前大環境開始改變，佢的質素亦開始減少。當整個大環境、整個行業都對佢長期不利，質素改變，這股的投資價值已明顯比過往減少。

佢過往以「超級中間人」自居，但現時的全球化及網絡發展，正正是跳過了中間人。

這股並不是劣質股，是有心經營的企業，但如果大環境不利，佢都唔會有運行，而我地投資者都唔會與大環境對著幹。

雖然佢股價不斷下跌，但企業價值正不斷減，因此，不宜投資。

------------------------------------------------

Q14367：

龔sir你好！我係你嘅讀者，有關的士牌有問題想問：

1.你書中寫市區的士 24000 x 12/600萬=4.8%回報。但如果要做85%按揭，利息有百幾二百萬。再打加每年雜費四萬左右。

會唔會以（24000-3333雜費）x 12/800萬=3.1%回報先係準確？？

2.小弟有物業渣打做30年按揭以供七年，現可加按120萬，分三十年還，總息還四十幾萬，如果加按出來買的士牌你有高見嗎？

龔成老師︰

1） 我書中所講的，是租金回報率，是投資者參考的的士平貴，比較各資產回報的重要因素。當然，如果要準確d，就要將每月的收入，減去雜費、稅務（不計利息），這就是淨租金回報率。這是以總資產去做分母的。

同時間，我地會比較資本回報率，即是當你利用槓杆時，你資金的回報率是多少。

例如你用85%按揭去做，本金就是$90萬，你要將每月的收入，減去每月利息支出（不是供款，是利息），減去雜費等，這就是淨收入，除以$90萬，這是資本回報率。

2） 加按套現，再將資金投資收息工具（如的士牌），的確是一個財富增值方法，因為加按的利息一般不高，當再投資較高息回報資產，自然就能賺取息差。

不過，世上沒有無風險的投資，每一個動作都有利有弊，有時點樣做，好睇你的投資目標，以及風險承受能力。

加按後面對加息週期，收來支付的利息會增加，息差優勢會減少，另外，的士牌增長力已經不及過往的年代，因為佢面對市場環境已有不少變化，叫車程式會對佢不利，雖然未必會影響到要減租，但都會影響長遠增長。。

因此，加按買的士牌在你的情況，不是不值得去做，但你要明白當中潛在風險。

------------------------------------------------

Q14368：

龔成老師，你好，1年前10月睇左你專頁，已月供盈富3000同港鐵2000，請問10年後可以增長幾多？

另外想問領展現價屬於低位，眼見香港運動還未平息，怕日後商户不租令到市場下滑？

如果長遠分注買入，應該選388港交所定3號煤氣，兩隻都是壟斷市場？

另外想問問1728正通汽車這股適合展線投資嗎？息口有9厘

龔成老師︰

以恆指過去年平均回報10%計（連股息再投資），你每月投資$5000，10年後大約會增值至95萬。

而領展（0823）佢有一定規模，坐擁不少優質商場。加上佢開始在海外尋找有潛力物業，預期由本地化進一步國際化，都是潛力所在。雖然現在受社會問題所影響，但相信只是中短線問題，長遠勢還在。

現時股息率有3.35%，未算平宜，只是合理區。要平宜的話，要接近5%。

港交所（0388）和煤氣（0003）都有壟斷市場優勢，但長遠增長力港交所會佔優少少。

至於正通汽車（1728）近年生意都有增長，但見盈利增長有減慢情況。股本回報率處較低水平，同埋佢較受經濟週期影響，對貿易相關都會有影響，所以股價會較為波動。

此股雖然有質素，但只算中等。以長遠計，將資金投放在其他優質股會更好。

------------------------------------------------

Q14369：

你好，可否分析一下6060众安在線

龔成老師︰

眾安（6060）我唔敢話佢無質素，不過，估值是最大的問題，其實到目前為止，佢的實質盈利都十分少，這刻的實質業務價值不大。

但佢做這類互聯網保險公司，的確有潛力，同時背後有支持，所以有發展，這部分產生了「概念價值」。

佢無乜盈利，但市值可以去到過百億，當中大部分都是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

所以，之後的股價，仍存有相當的不確定。但以穩健的投資角度分析，這股過往一直都不平宜。

因此，這類股可能有潛力和風險同樣大，最多只能小注。

------------------------------------------------

Q14370：

成哥，想請問下1876 百威亞太值唔值得長線投資，我係$27.85買左20手。

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。此股有品牌和規模，有長遠投資價值。

但你有留意我fb，都會見我經常講唔會太推薦人買IPO。而佢上市時間仍不算長，因此分析較難。

因為業務上，集團就算有吸引力，但新股半新股真實面要慢慢先見到，加上佢估值困難。

所以，此刻只建議持有小注，同時你要明白當中的風險。這股有長線投資價值，但你要衡量自己是否持有過多。

------------------------------------------------

Q14371：

龔sir, 我是你澳門班的學生，想問下你意見。

我父母岩岩退休，雖然資金唔多，但希望用黎投資收息，較為穩定既收息產品你會建議邊隻？Reits/銀行股/公用股會適合d?

龔成老師︰

你父母已退休，投資就唔可以進取，應以創造現金流為主。

你可以用收息類股份去建立一個組合，目標是5%、6%的股息率的收息股，例如港燈（2638）、香港電訊（6823）、工行（1398）、匯豐（0005）、置富（0778）、陽光（0435）。

這些都是有質素的股票，適合你父母長線持去創造現金流。

------------------------------------------------

Q14372：

成哥 點睇11，12？ 想問佢地幾多錢算平宜，幾多錢算貴？ 感謝成哥

龔成老師︰

恆生（0011）有質素，這股在《50穩健收息股》書中，已定義為一隻很不錯的股，有相當的優質度。

這股可以長線投資，但就會以收息為主。此股回到$150以下，股息率有5%時投資會較理想。如果要到平宜區，股價起碼要多跌20%至25%。

恆基（0012），是有質素的股票，前景正面，加上佢是全港持有最多農地的發展商，長遠的價值一定會慢慢釋放。

現價處合理區較上部，要再跌15%先至開始進入平宜區。

至於你問幾錢先貴，我估你係想睇下邊個位沽貨。其實貴無一個特別定位，我地持有優質股只要質素無變，基本上可以一直持有，咁樣先會最佳增值效果。

若言你真的想在質素無變之下估貨，減低持貨壓力，你可以用升一倍，沽一半的策略。先將本金收回，餘下股票任其自已再增長。

------------------------------------------------

Q14373：

老師，想請問我想入同諗住長揸中國中鐵（390），比亞迪（1211）同（435）。請問390可長揸嗎？我見現價應該是低位。

但本人現金得5萬，每月可儲萬5蚊

龔成老師︰

中國中鐵（0390），本質不算差的，有投資價值。但唔好預佢的增長力好強。睇翻佢的業務同財務數據，生意同盈利都處於穩定狀態，但增長力唔算強。

所以長線睇，佢有投資價值，但增長只是平穩。佢過往股價曾在2015年大升大跌，這只是炒一帶一路，但之後回復原狀，因為這因素只能為佢帶來平穩增長，而不是高速增長。這股都可以持有的。

至於比亞迪（1211）和陽光房產（0435）都有質素，可以長線持有。但你要留意，前者為潛力股（較適合年青人士），而後者為收息股（較適合退休人士），你要睇翻你年紀去調整。

------------------------------------------------

Q14374：

你好,之前參考咗你嘅意見, 購買咗兩次各千二百股 1928hk,平均價$35 ,本想作長線投資 ,近期見佢估價上升至$40 ，應否先沽，稍後再買入？

龔成老師︰

你可能認為這刻的價位$40已經係高位，先行獲利，等回調再買入。其實，我地唔應該去「估價、估走勢」，無人知$40之後會唔會之跌回$35，還是一直升至更高位。

我地投資重點，應該係睇「企業質素」，只要佢質素無變差，咁我地一直持有，讓其慢慢增值就可以。

你這個是很多投資者的錯誤想法，很多人以為自已掌握股市走勢，但最終都是失敗。

因此，建議你長線持有。

------------------------------------------------

Q14375：

老師, 你好！ 想請教你以下的問題：

1）本人已幫子女儲起每年的利是錢, 現已累積了大約$100,000現金。一直都只是放在銀行, 現在想開始幫他們把現金慢慢增值。

由於現金不是太多, 打算幫他們的儲蓄進行月供股票, 是否正確的選擇？ 或是分段買入一些優質股？
他們只是12及15歲, 有那些股票比較適合幫他們投票？

2）我媽媽想打多年買落的滙豐賣出, 買入價大約$110, 因她覺得滙豐已沒有太大優勢。

但我唔想她賣出後只留現金, 老師你也說過, 現金是沒有增值能力。如果我想幫她賣出滙豐的話, 有那些好的股票推介給她作另外投資嗎？

謝謝教導

龔成老師︰

1） 將每年收到的利事錢儲起，再用月供方式增值，這做法可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你的子女很年青，可以增值為主。但我相信每年收到利事金額唔多，拆開每月金額會更細，為免太散令月供費用成本增加（月供成本佔本金最好少於1%），我建議月供全數投入盈富基金（2800），佢係一隻包括50間質素不錯上市公司股票的組合，有效平衡風險。

2） 我相信你媽媽應該近退休之年，這個人生階段平穏現金流係最重要。滙豐（0005）雖然增長力大不如前，但作為長線投資的收息股，佢係可以的，所以唔建議你媽媽賣出。

其實還有一些優質和股息率高於5%的股票，都適合你媽媽，例如港燈（2638）、香港電訊（6823）、工行（1398）、匯豐（0005）、置富（0778）、陽光（0435），都可以考慮。

------------------------------------------------

Q14376：

Hi, 小弟25歲,Bank儲蓄$120000,月底薪$12350未計佣,已扣MPF,有番兼職送外賣,月儲大概$6000想開户投資,該如何一步步做?一直月供股票可行嗎? （利申:懶人）

龔成老師︰

作為一個初階投資者，我建議你先要做三樣野︰

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，作為月供股票之用。開戶用銀行或證券行都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

你可以供盈富$4000。同時儲下現金。

當你在做上述三件事的同時，開始學下股票，了解下那些股票適合你自己，就可以再調節你投資組合。

------------------------------------------------

Q14377：

老師您好! 想再請教…在您的問答專欄Q13473回答中, 月供$3000盈富, 增值20年後再轉去6%改息股, 一年便可收到18萬息. 那如果我現在月供$6000 （$3000盈富, $1500港鐵, $1500煤氣）

20年後轉去6%改息股, 是否一年便可有36萬息? 是否這樣計算的?

如日後月供想再加碼（如$1500）, 是否應加到盈富會比較合適?

另外, 您所指的”分注投資”是不是同一股票每隔半年買入一手? 先再謝謝您! 我不知不覺已買入了6本您的書藉, 真是獲益良多! 會繼續努力!

龔成老師︰

你的計法正確，港鐵（0066）和煤氣（0003）都是優質的平穏增長股，長線預期佢地回報會跑嬴大市（即盈富升幅），所以你簡單咁乘2，變成每年有36萬股息，這個計法無問題。

增加供款，如果你自問選股能力一般，我建議你放入盈富（2800）。

至於我平時所講的"分注"，是一個投資策略，例如你想買入某隻股票，總數3000股，你打算長線投資。

與其一次過入3000股，不過分開幾次，例如每隔1個月、2個月、甚至3個月入一次1000股。主要目的，是做到買入價平均就可以。

多謝支持，記得要睇晒！有用的！

------------------------------------------------

Q14378：

今年27歲月入$41000，平均一個月可儲$27000。現無物業，都希望35歲前可以置業。近排工作繁忙無咩時間留意股市，因此有想過月供股票。

如果希望一年內從投資股票中增加5萬到10萬（好似太進取？），可以有咩策略？

謝謝

龔成老師︰

以你每月儲$27000計，要一年賺5萬，即年回報15.5%，其實有少少進取。而且1年是一個十分短的時間，就算再優質的股票，短期都會出現價格波動，令你投資回報很易失算，投資年期以5年或以上較好。

回報方面，我地一般期望年回報會跑嬴大市一點，大約12%。如果你想儲一筆錢去支援你將來置業，你可以透過月供股票去增值。

現在你每月儲到的錢，可以5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰

盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）等。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

以恆指過去年平均回報10%計（連股息再投資），你每月投資$27000，8年後大約會增值至370萬，相信以可以幫你置業。

------------------------------------------------

Q14379：

阿sir，請問月供領展定恒地（012）好？thx
阿sir, 如果兩隻一齊供又有冇問題呢？

龔成老師︰

恆基（0012），是有質素的股票，前景正面，加上佢是全港持有最多農地的發展商，長遠的價值一定會慢慢釋放。

領展（0823）有一定規模，坐擁不少優質商場。現時商場組合，有提升價值潛力。再加上早前斥資36.7億元收購悉尼一幢甲級商廈，集團開始在海外尋找有潛力物業，預期由本地化進一步國際化，這都是潛力所在。

其實2隻平穏增長股都優質，適合月供之用。但如果同時供晒2隻，你就要留意翻佢地會唔會係你組合中佔比重過高，出現過份集中風險。

任何股票、任何行業，就算再優質，我們都不應太過集中。因為一個行業就算更有優勢，也有機會面對行業週期及突發風險，令你整個財富組合不利。因此，你要建立一個平衡的投資組合，當中有不同的類別、不同的行業，這是最好的平衡風險方法。

------------------------------------------------

Q14380：

龔成老師你好，本人是大學四年級生，聽講你以前做過證券行，請問介唔介意分享下點先可以入行？會有邊啲門檻同條件？

我本科唔太關Finance, Economics, Accounting果啲事，係一啲冷門半工程半商科，GPA又一般般，但我已經學左投資一兩年，視股票研究為我既熱情之一。

所以想畢業後做返啲相關既工作，人工偏中低都唔緊要，最緊要比我係過程學到野，同埋儲到工作經驗，等我將來可以跳去同行之中（證券）更加理想既field。

我自知成績同英文水平都一般般，唔夠真正讀ibank專科果啲畢業生鬥，但我真係好想做股票呢行，就我呢個case，想問老師有冇啲好建議比我？

龔成老師：

其實證券行，入行唔算難（如果你做經紀類），你大學生基本上無問題，如果你想多d料去入行，可以考證券試1、7、8，這是好多銀行、證券行都基本需要的，不過，如果你考左後一年內無人請，掛唔到牌，會比人取消左。

其實有唔少證券行或銀行，都比你入左職先，之後先要你考牌。

證券行雖然唔難入行，但就唔易做，這已經是有點夕陽行業，除非你內地的人脈網絡好強，否則，唔易生存到。

以整體的前途與興趣去衡量，建議你去行銀行的路，就算最初入職不是你最想的職位，都可以學到野。但唔好做同一職位太過長，去到咁上下，要跳去其他職位，你的目的是不斷學習，有些職位是有關分析的工作，不過並不易入，你一步步行。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【香港中產眼中除咗自己，無人可以叻嘅。】

近期香港有間公司，响我厘個住响英國嘅井底蛙嘅眼中都算係成功，就係100毛。但係厘間公司或者老細响香港，都被受到唔同嘅人，尤其是我所認識或者唔識嘅高級知識中產人士批評或者質疑。

我唔知道大家後有無咁嘅經驗，作為一個香港前偽中產，我身邊就有為數不少嘅一類中產親友（偽唔偽我就唔肯定，因為的確有啲係幾富貴嘅）。佢地一般對成功人士會有一套好畸形嘅準則，對於一啲先天條件好而有成就嘅人，佢地會覺得理所當然，甚至奉若神明。但係對於一啲與自己嘅學歷背景差不多，或者更差嘅而又能夠脫穎而出嘅人呢，就一定百般批評，千般不屑。

不過，好奇怪嘅係當天生條件唔好嘅人，成功到一個自己無可能達到嘅位置嘅時候，厘一班中產親友，又會好努力咁去分析其成功之道喎。畸形到咁，籠門都唔知响邊，有時真係好難溝通。

不過，分析完人地嘅成功因素之後，我又唔覺佢地會去學下。亦都唔會教下自己下一代，點樣欣賞同吸取人地嘅成功經驗㗎喎。我來來去去都只會聽佢地叫自己嘅仔女勤力啲讀書，去學阿邊個邊個嘅仔讀醫，或者去做ibanker，但係我就從來無聽過有人會鼓勵子女去發展自己所長，去搵自己嘅興趣或者去創業。

就好似100毛為例，從來都係改圖、抽水、玩政治不正確（當然都有時出錯，比人玩番轉頭）。我有時候share下，我有啲朋友，尤其是有小小學識嘅中產經常都會好不屑咁留言話，「一班廢青，唔知搞乜，齋抽水，我唔覺得好笑囉。」。當我聽到或者睇到嘅時候，我每次都會問，乜你估每日都抽幾次水咁容易，你自己試下得唔得。另外就係，要响咁多Facebook Page裡面，短期內要有幾十萬個Like，真係玩咁易，唔洗用腦嘅。唔該睇下自己個Facebook先啦，咪又係得嗰百幾人，又係post下「塊面大過景」嘅紅葉櫻花selfie，美食，支紅酒，最叻嗰啲就個個星期影下自己帶乜錶（然後互相稱贊，一齊開心share打J）。到你有咁多Like嘅時候，又有幾多人可以反控制番廣告客戶，甚至明星同藝人去遷就番你個平台嘅風格（CCTVB都唔得啦）。

嗱，就因為我响香港嘅時候身邊或者自己都可能係啲咁嘅人，所以大家就明我點解對以前嘅「自己」可以批評得咁大力（千其唔好對號入座，我一路都係罵緊自己！）。點解香港嘅所謂嘅中產知識份子，係唔可以去認真咁諗下其它人成功嘅原因嘅呢？尤其是對待年青人，只要係做與自己嘅經驗唔同嘅嘢嗰時，所有嘢都一定係負面嘅呢？究竟係唔係上一代嘅所謂成功模式就一定係金科玉律呢？有無反思下，上一代嘅所謂成功，係唔係完全因為自己嘅學識同能力，與時勢無關呢？

當啲傳媒一講話厘間公司會上市，我某啲朋友第一個反應就係話人地係揼殼上市呃錢。咁就算係，咁可唔可以問下自己，用三年時間，能唔能夠做到一間公司達到上正版嘅要求。我自問無能，就一定唔得。不過可能之前話唔好笑同廢嘅親友會做到掛。

另外一個反應就係：「有無賺咁多呀？條數砌出黎上市嘅！（之後千個字解釋，而中間夾雜大量finance行業嘅術語）」最好笑就係嗰啲財經「藝人」，個個跳晒出黎去分析100毛嘅成功嘅因素。唉，分析咗又做到咩，唔好玩啦！現今嘅世代，每個start up嘅成功都係因為獨特嘅理由。如果獨特嘅嘢都有得學嘅，咁就叫山寨啦。要學嘅就係鼓勵下一代去大膽創新同be creative，同勇於犯錯，係中產開會最鐘意同下屬講嗰句呀："think outside the box"！講就識，做就做唔到！

作為一個中坑，又曾經係一個香港中產，我覺得係唔係應該去多啲鼓勵下香港嘅下一代呢？佢地諗嘅嘢可能同我地有所唔同，而時代亦改變咗。問題好多時都出於我地嘅無知，與及跟唔上時代。去了解多啲，咪當學下嘢囉，年紀大同有層樓，搵多幾分錢，職位高小小，唔係代表自己係叻晒嘅（同親戚食飯嗰時就得）。

#我上咗岸就係叻晒嘅
#讀神科做ibank先叫醒
#人地醒自己就唔鐘意
#酸都講下原因啦