IG: @ally_blahblah
https://instagram.com/ally_blahblah?igshid=1jtemurbno3q7
新一年，
如果想要出走，
記得要學好外語
有人會話「鬼唔知阿媽係女人咩」
但係你有冇諗過，點先算係「外語好」呢？
以英文為例，點先算係好呢？
IELTS要過8.0 ？
文憑試要5** ？
日常生活/工作上嘅英語溝通唔係考試。如果你喺外國嘅公司有面試，最緊要嘅係思辨能力同埋表達能力。你諗嘢好快唔緊要，但如果你唔識表達，你可能就已經錯失左一個工作嘅機會。表達能力係咩呢？就係你點樣「講嘢」。簡單啲來講就係說話能力。咁當然，說話能力嘅前提，係聆聽。呢啲人哋講咩都聽唔明，你好難回應。
咁即係話你嘅聽說能力非常重要。
但係香港（或者唔少華人地區）嘅教育制度着重嘅並唔係你表達能力。香港文憑試為例，
閱讀佔20%，寫作佔25%，聆聽及綜合佔30%，說話佔10%，校本評核佔15%。聆聽及綜合當中有一半其實係用嚟寫嘢，即係話其實聆聽只有大概15% ；校本評核有一半又係用嚟寫嘢，即係得返7.5%係同「表達」有關。加加埋埋，針對你聽說能力嘅只佔22.5%，連¼都冇。但係同寫作能力有關嘅，佔咗47.5%，差唔多佔咗一半。（ IELTS嘅比分準則係呢一方面會好少少）
到咗呢一刻，聰明嘅你應該會明白，考試制度考核嘅係你寫嘢叻唔叻。相對真正係生活上有用嘅能力，反而針對唔多。
如果你係喺香港嘅考試制度之下長大，習慣咗呢一種學習外語嘅模式，對你日後出去外國搵工又或者係職場上發展好不利。
好簡單，如果你要同上司又或者客戶做一個簡報，你係要親自講嘢，對方可能會問你問題你要即刻答。唔通你下下寫一大篇文然後俾對方睇咩？唔係話寫作能力唔重要，而係日常生活中聽說佔嘅比例實在多好多。一般人一日有40%時間係聆聽， 30%時間係講嘢， 20%時間係閱讀， 10%時間係真係用嚟寫嘢。有啲人，可能完全唔會寫字添。
但香港嘅考試或者教育制度其實好本末倒置。
好老實，就算你文憑試考到英文有5以上，都唔等於你英文真係好。
咁講返轉頭，點先算係英文好呢？
曾幾何時我聽過一句說話：
「同鬼佬溝通到等於你英文唔太差；
聽得明鬼佬講笑話代表你英文幾好；
但真正嘅英文好係可以講笑話令到鬼佬笑。」
簡單啲講，就係若然你能夠同一個外國人（最好係以英語為母語）真正做到有講有笑，你英文就叫做好喇。
唔知大家有冇試過，去戲院睇一套外國
電影，然後旁邊有啲鬼佬聽到某啲台詞會識笑，但係自己又唔知佢哋笑咩？
所有「幽默」、「笑話」或者「棟篤笑」當中牽涉嘅係聆聽者嘅歷史、教育同文化背景。若然你攞幾個黃子華嘅笑話，夾硬翻譯左做英文，然後同班鬼佬講，佢哋大概會有好多個問號。唔喺香港大，又或者冇接觸過粵語文化，幾好嘅笑話都好難翻譯。反之亦然。所以，真正嘅英文好係了解西方國家嘅文化，了解到嘅地步係可以用佢來做笑聽得明相關嘅笑話或者笑9佢。
咁點先至知道自己聽唔聽得明呢啲笑話呢？其實有好多外國清談節目、英美等地嘅棟篤笑等等都可以係測試自己「笑話能力」嘅好工具。
如果你聽得明佢哋講啲咩同點解咁好笑，咁你嘅英語能力就應該唔太差啦。但係聽唔明點算呢？咁你就要俾心機改善一下自己嘅外語能力。可以由基本功做起，而且留意多啲外國嘅時事、文化、音樂、劇集等等。
好多人會覺得，英文好即係文法好、又唔知咩咩口音。其實，有啲時候連以英文為母語嘅人都有機會錯文法。我都有見過一啲「名人」，細細個長年喺外國/某某名校畢業，但係一聽佢講英文就好明顯仲有啲香港口音；又或者有「補習名師」連梵高英文都寫錯（睇住佢串Vango 啊⋯⋯）但係你會唔會話佢哋英文差呢？你自己諗啦。
如果你好似我咁，從小喺粵語環境之下長大，又唔係咩「名校」畢業，想出走前練好英文，要從「骨子裡」做起。第一步好簡單（亦好難）：將你手機/平板/電腦以及常用程式全部換成英文（或者你想要學好嘅外語），適應到唔需要「查中文」。
就係咁簡單？係！
如果你適應得到，之後適應外國生活上嘅溝通會容易得多。簡單來講，你如果連手機上面換成外語都搞唔掂，日後出國點算？
今次講到呢度。如果大家對喺外國生活嘅溝通上有咩問題，記得留言/私訊哦！若然大家對呢方面有興趣，日後都推出多啲相關文章！
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲 #香港人加油 #搵工 #留學生 #海外留學 #海外生活 #海外香港人 #學外語 #學英文
ielts電腦考試好唔好 在 IELTS 雅思完整解析介紹！ 紙筆電腦模式有分別？！4份試卷 ... 的推薦與評價
今集「升學由李講」主持人跟大家分享四份試卷的 考試 範圍，報考紙筆模式和 電腦 模式的分別，以及考獲什麼成績才能報考心儀大學。 ... <看更多>