［Fact check: 老母追仔數？追佢老母數就差不多］有關「海航追港航數」建議大家花幾分鐘睇下明報昨日篇文，最好叫埋朋友睇。（海航向香港快運董事長追數 涉8.5億 http://bit.ly/2s5Qyzr）。但我知好多人都唔會睇，救得一個得一個啦。篇文我朋友有份寫，你覺得我係打手嘅，隨便。
當日我見Facebook呀新聞組呀whatsapp呀，都係話阿媽追個仔數，海航追香港航空數。個別傳媒都係咁講。唔止呢度兩間，陣間又話找針對熱....血時報。立場都係寫「海航入稟高院追討香港航空8.5億」。有啲唔係咁寫但你啲天才網友都照當係「阿媽追個仔數」。但，真的嗎？
海航（枱面上，因為仲有啲股東公司唔知咩背景）只係渣住香港航空27%股權，係最大（枱面上），但係咪叫阿媽，都仲可以討論。但姑且當係先。
其實，大家識中文架可？追數嘅係海航無誤，但入稟狀寫「香港航空咨詢服務公司」。定你以為「香港航空咨詢服務公司」就係「香港航空」？咁Oxford Brookes 就係 Oxford，陳瑞祺(喇沙)就係喇沙，簡尼沙利斯就係簡尼（定沙利斯），蒙哥馬利就係蒙哥（定馬利？）
「香港航空咨詢服務」，唯一嘅股東，就係鍾國頌。鍾國頌乜水，明報篇文有講，不再重覆。換言之，間公司即係佢本人（當然實際上有啲唔同，間嘢係有限公司，你追數只能清間公司盤，個人唔會上身）。亦即係，海航向佢（嘅公司）追數。
咁，海航向某（可能已經唔再係）高層（間公司）追數，同海航向香港航空追數，應該爭好Q遠下話？你計我話呢，「掉轉就差不多」，追佢老母數啦，買埋咁多金融產品（當然係唔會發生）。
容許我好肉麻又好趕客咁講句，所以咁多年我都係睇明報。但重點不在此，重點係，點解fake news 咁多人傳？反而 真相唔會有人理？
無數咁多研究做過，fake news傳播速度 同 reach，多過真實故事好多倍。原因好簡單：因為現實殘酷，又悶。fake news好似雞咁（諗唔到第個比喻），度身訂造，任你玩乜都得。
真喎，老母追仔數梗係juicy．真相嘅＂海航向香港快運董事長追數＂，悶死人咩。而事實證明啲廣大讀者（唔只香港）都係鍾意華麗嘅假故事，唔係貧乏嘅真實。
你睇到呢度嘅，比個奬你。其實咩回事？我估九成都係阿頭死咗，內部權鬥。呢方面蘋果個故事有講 （http://bit.ly/2LNEvjC 創辦人死後疑爆權鬥 海航追港航前董事8.5億）。近排啲咩債券呀水緊呀，我估都係。
所以，吾友 利世民 花生認為佢過唔到三月。我就好有信心港航可以繼續飛，又睇下點。而我機票都買埋，絶對有skin in the game．
