《跳降傘與手掌唱歌》陳心遙
《信報》2018年9月5日《視線所及》專欄
香港運動員喺亞運攞到8金18銀20銅嘅佳績，好在仲有部分傳媒緊貼報道，先有多啲港人注意，為佢哋喝采。大家打後唔好期望政府及各界會有咩大型活動，向公眾宣揚港隊用努力同汗水換嚟嘅成就。何止體育，任何唔畀人認為有經濟效益嘅活動，喺香港都唔受重視。
所謂經濟效益，源自有好多人欣賞嗰項活動，然後衍生門券收入、廣告贊助，然後又回流到人才培訓。流行音樂、粵劇、足球、籃球、電競，文娛體育就係咁樣。唔夠經濟效益，係因為啲人對嗰樣嘢冇興趣、冇時間，或者唔想花錢落去。一個人人只係為咗一個比監倉大少少嘅容身之所而節衣縮食嘅城市，覺都未有得好瞓，仲有咩人會有閒情逸致分配時間金錢畀康體娛樂？
所以香港人，鍾意嘅就歸佢哋為「夢想」，唔鍾意嘅就當係「雕蟲小技」；無論參與者有幾大成就，甚至係世界冠軍；買樓先係「現實」，投資炒賣先至係「雄才大略」。
其實為人哋嘅生活服務，先換到報酬係無可厚非。所以唔係個個都有資格用文娛體育搵食係好正常，全世界一樣。但即使係冇乜「經濟效益」不過經年艱苦訓練，換嚟大家一刻驚嘆同喝采嘅人，點都值得多一啲鼓勵同讚賞啩。
兩年前有位美國專業跳傘員Luke Aikins，唔用降落傘就咁喺2.5萬呎高空，跳出飛機經過2分鐘嘅自由落體，成功墮落喺100呎×100呎嘅繩網上面，毫髮不損。最近短片被發布，惹來全世界嘅關注。
當然呢個旁人聽落如同賭命嘅創舉唔係咁簡單。佢本身係專業跳傘員，之前已有萬幾兩萬次跳傘經驗，為呢次「演出」籌備經年，身與心都達致頂峰先敢升空，唔係隨隨便便跳落嚟㗎。呢位朋友有老婆有小孩，我都唔知專業跳傘員嘅收入係點？不過我好肯定佢唔使為供劏房煩惱，佢屋企至少有碇方擺佢啲降落傘。
你會話：喂，唔係人人想玩命㗎喎。好，最近著名電視達人show，有位台灣嘅朋友，表演用手掌唱歌，十指開開合合，有啲似Kazoo或者小號嘅聲音，演奏出二十幾年前嘅名曲Barbie Girl，當然換來全場掌聲。呢個睇落比用樣用十隻手指，但用口吹嘅Handflute更難，因為要變出音階之餘仲要形成氣流。呢位朋友話練習咗十年。真係十年磨一曲。
所以就算唔係樣樣嘢「搵到食」，我哋都需要更多的雕蟲小技，令個世界冇咁單調乏味。再有錢都好，我唔想下一代；最大愛好係一個人匿喺房，逐張逐張銀紙拎出嚟數，諗落都得人驚。
#跳降傘與手掌唱歌 #LukeAikins #跳降傘 #手掌唱歌 #亞洲達人秀 #信報 #陳心遙
