近排有兩套喪屍片都劣評居多，一套係《屍殺半島》，另一套係Netflix嘅#ALIVE，作為喪屍片愛好者，兩套我都已經即日睇咗，先表明立場，我覺得兩套都唔差的，所以當我見到網上幾乎係一面倒嘅罵聲，就開始思考問題出咗喺邊度。
愚以為，可能係觀眾抱住錯誤期待入場嘅關係。
入得場睇《屍殺半島》嘅，相信大部分都係衝住《屍殺列車》而嚟嘅人，大家期望再睇一次密閉空間x人類喪屍埋身肉搏，但係《屍殺半島》完全相反：由狹窄嘅火車車廂變成整個荒廢城市，從赤手空拳人屍大戰變咗Mad Max式飛車槍戰。
老實講，睇頭三分一嘅時候，我都覺得有啲無癮，但係當我嘗試用睇另一個片種嘅心態去觀看，就看出趣味來。
輕微劇透，未睇電影請斟酌服用：
《屍殺半島》不乏值得一讚嘅地方，例如用一個鏡頭輕輕埋咗伏線（玻璃大樓內塞滿嘅喪屍），最後用返嚟擊殺對手，我自己認為，一個成功嘅伏筆，除咗最尾要埋尾之餘，仲要拿捏到唔好令觀眾咁快意識到呢個係伏筆，同時又唔會奀到觀眾根本唔記得呢樣嘢出現過。呢一點《屍殺半島》係做到的。
另外，《屍殺半島》沿用返上集嘅喪屍設定（被聲吸引同黑暗冇視力），今次有幾幕飛車大戰都善用咗呢一點，例如大女被後車追到氣咳，就喺後巷飄移咗一下，用車頭燈引晒啲喪屍出嚟堵截咗後面架車之類，都算係有創意。
劇本工整，該有嘅元素都擺得妥當，由頭到尾只係專心講好一個主題，呢啲就不贅了。但當然缺點還是有的，例如最為大家垢病嘅CG車戰場面，反派過份面譜化等等，至於點解兩母女手車咁掂呢啲小疑問，就正如睇親鬼片，啲主角硬係要打開地下室道門一樣，let it go吧。
反而我覺得，導演明知大家係期待睇返《屍殺列車》嗰種戲路，而呢種劇本又唔係《屍殺片場》嗰種mind blown到可一不可再嘅橋，既然佢做得一次，要複製多次相信係有可能的，但佢偏偏就挾住咁高期望，去做一樣完全唔同嘅東西，呢種膽量唔值得欣賞咩？
題外話，而家好多人會話某啲作品「爛尾」，無論電影、劇集、小說同漫畫都無一倖免，有時我會為作者感到不值，前面花咗咁多心思時間去做出咁好嘅作品，去到最後可能只係因為唔合符大家心目中嘅想像，就被貶為垃圾。明明嗰個創作者已經展示過佢擁有足夠能力，而我相信佢比任何一個受眾都更在乎自己嘅作品，如果最後佢選擇要咁樣落筆，我會嘗試盡量去理解佢嘅選擇。
當然我明白大家可能只係愛之深恨之切，而且每個人喜好都唔同，如果真係唔喜歡當然冇問題，不過如果可以放開胸懷，話唔定就會得到更大嘅樂趣。
P.S. 本身想寫埋#ALIVE，但唔覺唔覺寫咗咁長，而且我想講嘅都係上面嗰啲，所以都係算了，唔好意思做咗標題黨
P.S.2 推薦大家follow哈捏口個page，有好多有趣同溫暖嘅twitter翻譯
mind blown意思 在 【情緒】mind-blowing = blow my mind = blow... - English Flow ... 的推薦與評價
= 令人驚奇且印象深刻良好的－－讓人頭腦轟然一響， 爆發出既驚且喜的色彩， 可見非常震撼。 to blow sb's mind 是意思相近的說法， 還有"I'm blown away" 也是指自己感到 ... ... <看更多>