［美股業績一分鐘］我寫左成粒鐘呀頂。留意返，四隻有三隻都係Nasdaq 100指數成份股
先係波音飛機，星期三晚出的，所以貼嘅係星期三晚股價。大家知呢排流年不利啦。條數就當然係唔得，廿年嚟第一次蝕錢，都幾大鑊。咁但，照計都反映咗架啦，鬼唔知蝕錢咩。股價高位都蒸發咗三成（留意個市係大升），唔可以話災難式，但亦肯定唔係冇重創
不過業績股價居然可以升，都係幾奇怪。因為報出嚟明明都係低過預期—預你蝕，但冇預你蝕咁多。公司指引話停飛737 MAX嘅成本，畀上季估嘅高咗成倍，點會唔係壞消息？
我見有話市場認為公司夠坦承。嘩，有啲牽強喎。又有講kitchen sinking ．衰嘢一鑊爆晒佢，呢個比較正常。但應該係插多一棍先喎
唯一解釋，就係都冇乜解釋，個股價唔係反映緊個業績咯。股票唔會話你知點解郁嘛。理論上業績後嘅郁法就當然係反映業績，但總會有例外。例如，其實係傳畢菲特買緊嘅。都有啲似佢作風，公司一時嘅問題提供買入機會，仲有，夠大—市場上夠大畀畢菲特買嘅公司根本唔多。另外，畢菲特亦冇否認
之後，Facebook。拿，又係怪雞。全年業績明明好過預期。但股價照插。我見話增長放慢，但，明明就好過預期，即係一早預期咗放慢啦。咁你話，哦，話佢收入放慢唔太好咯，但，明明見啲講法話支出勁升令人驚，咁前後矛盾喎—支出勁升都可以純利好過預期，就即係收入好過預期啦？
其他指標？活躍用戶人數呀，每戶收入呀，全部都好過預期喎。真係要講就可能係睇前景睇得麻麻地，展望都叫你預再放慢。
但我覺得其實只係見光死，之前股價太強，借勢回下。
Tesla，不用講啦，勁到爆燈。之前股價已經勁夾，Elon Musk嘅天價stock option開始價內（但應該未行使得），佢老哥風騷到跳舞，投共有前途。最重要係夾到啲沽空嘅輸到趴街，兼且可以大巴大把咁刮啲分析員，佢應該好hyper
至於出車數之類，其實一早公佈咗，嗰時已經夾咗一輪勁嘅。但其實個數字只係達到Tesla 自己指引嘅下限 – 不過分析員個個睇死佢交唔到數
仲有，今年嘅指引好樂觀，話交付量大升，同埋每季都會有錢賺。嘩。不過講明，「除非要不停推出新產品」
另外大家都知了，Tesla市值已經去到1000億美金（嘻，即係蘋果嘅十份一）。已經超越咗福士，成為世界上第二大市值嘅車廠—第一？當然係Toyota — 但你睇出車量，其實仲係爭好遠好遠好遠。亦唔見得Tesla啲車特別貴或特別好賺。又一示範，股價係炒前景炒未來
最後，微軟，真係冇乜好講喎，悶聲發大財咯，雲計算咯，雲端收租佬喎，如是我聞。
值得一講嘅係，標基應該又再過咗光頭佬頭，又做返首富（其實極接近，一晚轉幾次都唔奇）。早排佢先講話：My $109 billion net worth shows the economy is not fair — 結果而家又係財富增長嘅速度，快過佢捐錢嘅速度。只能講句有錢人都好煩惱，不如畀啲煩惱我分擔。
留意返，呢度四隻有三隻都係Nasdaq 100指數成份股，指數一路都跑贏晒其他市場，亦跑贏美股其他指數。其實唔想咁煩，不如直接買指數算。
*kitchen sinking，舊文有講（http://bit.ly/2YgJ9M8），好快會講多次，講國泰。
net worth計算 在 怎么计算个人净资产(Net Worth)？分享我用了7年的净资产表格 的推薦與評價
怎么 计算 个人净资产( Net Worth )？分享我用了7年的净资产表格| 为什么我不喜欢“有房有车”这个说法？ 678 views Jun 3, 2022 ✓ 欢迎加入我的收费会员 ... ... <看更多>