【何麒的生活隨筆】
Hoki the Kongner：淺談EDC 之 玩筆毀一生？
上星期我哋講咗記事簿，有弟兄回覆話佢會帶筆記簿喺身做畫簿添。講起呢樣嘢，其實香港都有城市寫生(Urban Sketching)嘅社群，佢哋都有定期聚會，如果你哋有興趣喅話可以上Facebook搵吓。
咁講返正題先，我哋講咗記事簿仔，但記事簿仔當然要有筆先至有用啦，唔係點寫嘢呢？而我地日常用嘅筆都分咗唔同種類，今次我就會帶大家走入筆坑，睇吓有邊種筆適合平時EDC，同埋點解玩筆嘅朋友仔會捨得買成幾百蚊甚至成千銀嘅筆。
首先講咗最唔起眼個種先，就係木鉛筆。大家可能會覺得鉛筆呢啲嘢係小朋友先至用，但其實鉛筆係一種十分可靠嘅書寫工具嚟嫁喎。因為鉛筆唔使入墨水，靠鉛筆入面嗰條鉛芯就可以寫到字，所以真係有人會EDC鉛筆，特別係啲中意畫畫嘅朋友仔。因為鉛筆用嚟寫字又得，畫畫又得。另外小弟其實做過條片講鉛筆嘅，記得去Happy Kongner 搵《字得其樂》睇返啦。
(Link: https://youtu.be/BU5NbG4kzow)
跟住落嚟就係原子筆喇。原子筆呢啲我地就成日都用㗎啦，咁究竟原子筆又有咩特別呢？其實原子筆係靠筆咀嗰粒走珠將啲油性啫喱狀嘅墨傳落張紙度，因為油性墨好粘，所以擺得耐冇寫嘅話就會寫唔出，而且粒走珠大細唔啱嘅話亦都會好易漏墨，重係好難洗得甩嘅添。不過呢個同時亦都係原子筆嘅好處，就係佢用嘅係油性墨，所以字跡好難洗得甩，再加上方便易用。所以大多數會拎筆出街嘅人都會選擇原子筆。
然後就係啫喱筆。啫喱筆好似同原子筆差唔多樣，但大家覺唔覺得啫喱筆硬係好似好寫啲，就好似我以前讀書嗰陣都係Uni-ball 嘅fans，咁點解會有咁嘅分別呢？其實啫喱筆個原理都係用走珠嚟寫字，但啫喱筆嗰種墨係一種水性嘅啫喱，寫出嚟嘅色水係會實啲、順啲同埋無咁容易斷墨，同原子筆一樣都係咁好使好用，但啫喱筆更勝一籌嘅地方在於啫喱筆嘅寫感真係順滑啲，所以都好多人中意帶啫喱筆喺身。
最後就係鋼筆喇。大家可能會覺得鋼筆係有錢人玩意，但事實上鋼筆呢樣嘢都係平有平玩，貴有貴玩，豐儉由人嘅。喺未有原子筆嗰個年代，鋼筆係當時嘅主流書寫工具。原理就係用墨舌將儲起咗嘅墨水導流落個筆尖，從而令到有墨水寫字。老實講，鋼筆係好玩嘅，但從EDC需求實用嘅角度去睇，鋼筆好多時都係要擰蓋，用得唔小心嘅話重有機會會整到四圍都係墨。因此就算真係拎鋼筆出街，都只會喺坐定定果陣先會用。都係啦，我個節目早期都做過片講鋼筆，記得去Happy Kongner 搵《字得其樂》睇返喇。
(Link: https://youtu.be/SP2JjBBe8mU)
上面講咗咁多種筆，我諗大家都對筆呢樣嘢都應該有一個初步嘅認知嫁喇，但點解EDC嘅社群會花咁多錢喺買筆度呢？其實主要都係因為筆嘅世界真係好大，你可以搵到唔同材質嘅筆，又或者係唔同設計嘅筆，一嚟型棍，二嚟可以揾到襯得到自己啲風格。我知道就咁講大家應該未必會明我講乜，所以我喺呢度都會分享一下我中意啲咩文具，大家得閒可以Google吓，如果你細心留意嘅話，應該都唔難意會到箇中有乜差別。
首先以鉛筆嚟講，平時寫字通常都係用HB鉛筆，方便寫野又唔易斷。我就幾中意三菱嘅Hi-Uni，嗰時係一個朋友送比我。呢款鉛筆嘅鉛芯真係幾實淨，寫字大力啲都唔怕，色實得嚟又唔易花。而另一個我個人比較喜歡嘅系列就係Blackwing，佢地每一季都會出特別版鉛筆，真係賣哂就無個隻咁特別。因為佢哋嘅方向就係每次會訂一個主題，然後透過件特別版產品講個故事你聽咁樣，舉個例就好似我手上嘅 Blackwing Volume 10001就係紀念日本發明嘅Kenken Puzzle而出嘅。
跟住嚟到原子筆，我都有兩款心水推介。首先就係卡達888，佢係一枝好好寫嘅原子筆。我用過咁多款，覺得最好寫最順就係佢。不過枝筆個筆夾都係用膠造，所以好易斷。而888普通版就比較平實，但今年見過佢出過一款正義聯盟嘅特別版，有興趣可以望下。而我嘅另一款心水原子筆就係卡達849，我當初就係比佢外型吸引先會買佢。佢係金屬筆身同筆夾，幾短身，幾啱用黎EDC一筆走天涯，不過問題在於呢個牌子嘅筆芯就比較難搵喇。
然後講到啫喱筆呢，我就幾中意Pilot Metal G2。G2呢款啫喱筆我相信大家讀書嗰陣都可能已經用過，而Metal G2就係佢嘅金屬筆身限量版。咁點解金屬筆身咁重要呢？因為平時G2嗰種膠好易爛，特別係筆夾果個位，彈多兩彈就會斷。呢個亦都係點解EDC社群嘅人會偏向用金屬造嘅筆嘅原因。咁點解我會推G2呢？就係因為G2係可以入唔同牌子嘅筆芯。有人試過將萬寶龍走珠筆嘅芯入落膠身版G2度寫，我自己都試過換咗Uni-ball Signo 系列嘅芯落去，都寫得出。而換芯呢樣嘢就即係好似鋼筆上墨咁，好多嘢比你玩，亦都係文具點解咁易令人着迷嘅其中一個原因。
最後就到鋼筆。雖則我啱啱話EDC用鋼筆嘅話係會幾麻煩，但真係有人會拎返學拎返工用。其中一款好受歡迎嘅就係Pilot Capless 。喺美國個邊就叫Varnishing Point。佢受歡迎嘅原因在於佢係鋼筆入面極少數好似原子筆咁撳掣開筆嘅款式嚟，收筆嘅時候亦都有個活門保護，唔會咁易漏墨。再加上日系嘅筆幅通常係幼啲，對我哋香港人經常要寫中英文兩種文字嚟講係實用啲嘅。而Capless 有好多唔同嘅款式，有普通膠身版，高階啲亦都有金屬筆身直條花紋嘅版本，亦都有木造嘅版本，再高階啲重有用日本工藝螺鈿裝飾嘅版本，即係係漆器上面鑲貝殼嘅工藝。因此Capless 都係我今年去筆展想買嘅嘢之一。
講咗咁耐唔同種類嘅筆，亦都用EDC角度去睇拎唔同筆出街用有咩方便同唔方便嘅地方喇，雖則我自己係用鋼筆嘅人，社群入面都有死忠係真係連去旅行都要帶住鋼筆嘅人嚟，但我覺得唔係每一隻紙都受到鋼筆墨水，而且鋼筆始終係需要洗筆，用落係幾麻煩，所以我平時返工或者上堂就算有筆係身，主要都係以原子筆或者啫喱筆為主嘅姐。
另外如果用收藏嘅角度去睇文具其實都有好多嘢玩，有啲人中意收藏某種材質嘅筆；有啲人中意木嘅筆，因為木嘅筆用得耐會散發出木嘅香氣；有啲人中意黃銅，因為你手上嘅汗同油脂係會令銅氧化會形成獨特嘅花紋；有啲人重會收藏古董筆，因為佢哋中意研究枝筆出產個時嘅背景同埋筆廠歷史，唔同嘢永遠都會有唔同嘅玩法嘅！
不過今次我哋就講到呢度先，希望大家明白筆有好多唔同種類，我哋亦都可以看有唔同角度去欣賞筆呢樣嘢。我地下次再見啦。
P.S. 圖入面嘅筆款，左起：Blackwing vol. 10001 鉛筆，法協上堂送嘅鉛筆，卡達849原子筆，日本白金MWB-3000M 三色筆，日本Sailor Clear Candy 鋼筆，意大利Stipula Passaporto 便擕鋼筆，德國Pelikan M100鋼筆。
（本欄逢周三更新。敬希讀者垂注）
pilot g2筆芯 在 【筆芯更換】PILOT 百樂Frixion Slim 0.38mm 自動魔擦筆筆芯 ... 的推薦與評價
... <看更多>