【何麒的生活隨筆】
何麒：淺酌角落頭 之 烈酒點樣飲？
上次就介紹咗唔同嘅酒類，今次就講下買咗枝烈酒返嚟到底應該點樣飲啦。我會介紹幾種喺屋企都可以做到嘅做法，而呢幾種做法有啲連專業工具都未必需要，希望大家睇完之後，以後就唔使淨係純飲或者啪Shot 咁寡喇。
首先，最簡單當然係純飲(Neat)啦。你打開枝酒，倒啲落隻杯，就咁飲，咁就係啦。唔使加水，唔使加冰，乜都唔使做。純飲係最能夠感受枝酒最原始風味嘅方法嚟嘅，所以好多飲威士忌嘅朋友仔都會同你講唔好加冰同唔好加水，就係咁解。
呢個方法係睇落好簡單，但實際上用嘅杯都有分唔同種類。最常見就係用Rock Glass，闊口厚底矮身嘅杯，睇電影成日都會見到。用Rock Glass純飲係最唔使用腦嘅飲法，斟左酒出黎慢慢呷就係啦。不過有啲人會覺得用Rock Glass 太粗獷，飲唔哂枝酒嘅味道，所以有人會選擇用聞香杯。聞香杯有好多款式，但個原理都係用個收窄嘅杯身去匯聚酒嘅香氣，等你喺除咗味覺之外重可以用嗅覺去享受杯嘢飲。聞香杯最常見嘅款式係鬱金香形Glencairn，不過我就覺得買咩款都係睇你個人口味㗎姐。
雖則純飲係最直接嘅方法，但烈酒一般都有成35%以上酒精，十分之烈，唔係人人都習慣，就好似我自己其實都唔慣純飲。咁如果真係唔慣嘅話可以試下加冰咁飲(On the rocks)。通常加冰飲我就會用雪凍咗嘅Rock Glass，加冰加到¾ 或者加滿，之後再加酒。因為我地嘅味蕾對凍嘅野冇咁敏感，同埋啲冰溶嘅時候變成水，唔多唔少都會溝稀咗杯野飲，所以飲嘅時候，個感覺的確係會無咁烈，個風味都會有啲唔同。但作為一杯臨訓前飲嘅Nightcap，輕輕鬆鬆飲完去訓覺都唔錯嘅。
當然除咗純飲同埋加冰之外，你重可以溝唔同嘢嚟整長飲(Long Drinks) 同埋雞尾酒(Cocktails)。長飲通常比較大杯，要用高身嘅Collins Glass 或者Highball Glass嚟裝。長飲我地會加一種果汁或者汽水之類，其實啲果汁或者汽水分分鐘重多過酒。
舉兩個例子，最簡單嘅我覺得就係Screwdriver。材料得伏特加、冰同埋橙汁。首先雪凍隻杯，之後加滿冰，落60ml 伏特加，攪一攪杯嘢冰鎮下啲酒先，之後加橙汁加到滿。就係咁簡單。
第二個例子就係Por Cuba Libre，材料有冧酒、可樂、冰同埋半個青檸。做法都係一樣，雪杯，加冰，之後落60ml 冧酒，再加滿可樂。個半個青檸再切一半，一邊用嚟榨汁落杯野度，另一邊直接放係面度做裝飾。 做法非常簡單，喺屋企自己都做到。
最後我要講嘅就係雞尾酒。其實只要有合適嘅工具，喺屋企都可以整啲簡單調酒，但當然專業嘅調酒師整得更加順口更加好飲啦。而喺最初嘅定義嚟講，雞尾酒係要有烈酒、糖、水（冰都係水嘅其中一個形態）同埋苦精做調味。下次有機會再講下有咩工具啦，今次介紹一杯用屋企有嘅工具都可以整嘅土炮調酒—Black Russian。材料係得冰、伏特加同Kahlua 咖啡酒。做法就係先雪凍一隻Rock Glass ，無就用矮身嘅杯啦。之後加滿冰，落60ml 伏特加，再落20ml咖啡酒，之後用筷子攪大約10秒就完成。
出面正式嘅酒譜都教60ml伏特加＋30ml咖啡酒，但我本人覺得Kahlua 實在太甜，朋友就教我落少啲都得。而自己係屋企整嚟俾自己飲，份量就可以隨意調節，唔一定要跟足哂酒譜。順帶一提，整完Black Russian之後你喺上面加20ml鮮忌廉嘅話，杯嘢就會變成White Russian。忌廉同酒分開兩層，影相打卡一流，但飲嘅時候記得溝返埋。
酒嘅世界係咪好大呢？有數唔晒咁多嘅酒款，有唔同飲法同做法，有唔同工具，重有唔同產區，所以酒唔單止係用嚟劈咁簡單嘅。不過最後都要再講多次，未滿18歲嘅朋友都唔好飲酒喇，而且飲得太多酒對身體始終唔太好，各位成年朋友都要記住適可而止，切勿酗酒。
（本欄逢周三更新。敬希讀者垂注）
screwdriver酒譜 在 【調酒】簡易酒譜特輯(上) 螺絲起子Screwdriver/ 佛羅里達陽光 ... 的推薦與評價
【調酒】簡易酒譜特輯(上) 螺絲起子Screwdriver/ 佛羅里達陽光Florida Sunshine/海灣微風Bay Breeze. 美食. 2015年7月20日22:13. 單純分享個人喜歡的酒譜味道主要以 ... ... <看更多>