《中國式手天使》
最近《港股策略王》有意調校我地財經雜誌上的定位，好多人都以我地只是賣弄低俗、女啊藝人啊、玩搞笑出位咁。其實，我估社長陳承龍都只係唔想本書仔咁離地，多講一些細股界、殼股界和Corporate finance相關的內容可以突圍而出嘛，反正條街無人咁專業去講，去開發呢個餅都好正常。
社長有感這類內容已經夠晒紮實，所以想擴充宏觀專題、人物訪問之類的內容，大家有留意開呢幾期就會發明唔同咗，內容豐富了層次也高了。這兒行精兵制，草木皆兵人人都是精兵，所以我都要化身特約記者返下大陸跑外訪之類。渾水強烈要求社長加人工，不過見佢在自己個專欄「實力取勝」多次真誠地稱讚我，搞到我紅都面晒唔好意思，有點怕醜添。
好多人以為我只識講財技、殼股之類。老實講，我算有少少天份，因為我真係炒殼股唔係炒了好耐，兩年貨仔多少少，不過好鐘意研究咁樣。如果講到比較核心的知識卻是經濟學，畢竟都叫讀了八年有多，離開校園後都仲有跟進少少咁。這類跑宏觀專題的經驗其實都幫梗我執汁之前跌了不少經濟知識同宏觀睇法，對個人增長都真係好事。這兒想講自己少少的觀察，最近見到好多外地學者，又或掛住類近學者派頭的專業人士都幾睇好中國經濟。中國經濟係咪咁好？我有懷疑又唔太確定，但市場上是養住這一班純睇好中國經濟的外地專業人士。
我的同事會叫這一班友做「中國手天使」，因為中國自己本身自high，覺得自己經濟好好；而呢班外國者同聲一氣，隨著中國經濟欣欣向榮的主軸一同唱好，幫人自high，所以稱之為「中國手天使」，其實即係鬼佬財演。手天使係好神聖的義工，我好尊重；不過做著中國手天使就係一份有利可圖的工作。首先，要係鬼佬，這是既定印象，唔知點解凡人都係覺得鬼佬講一番說話係特別高級，特別有說服力。其次，就是名氣，原理同上，都係用來境加服務力。第三，就是如果你多次唱好，又哄到大陸老闆高高興興，佢地分分鐘請你搞場講座，都有7位數字囉。如果我係鬼佬，我都唱好啦，對不？
手天使是一個龐大市場，可惜我唔係鬼佬，無得一齊唱好中國經濟。如果太盲目相信這班人，確是會中統計學上的selection bias。
(逢星期五刊登於財經雜誌《港股策略王周刊》)
#渾水 #港股策略王
