關於 swallowprinceedward ，我們在網路上蒐集到這些相關的討論、資訊與評價

🎈豐信餃子店
🔍太子汝州街17號地下A號舖
-----
每當餐廳門口排有長長嘅人龍，總能引起我嘅好奇心，前去一探究竟，呢間餃子小店就係其中之一。當日去嘅時候，剛好下起傾盆大雨，但係門口依然人頭湧湧。

餐牌主要以煎餃同湯假為主，餃子口味全部都可以加兩蚊轉雙拼。除咗餃子之外，仲有小食同埋飲品。

🥟心水湯餃之選
椰菜鮮肉餃（$36 -7隻）
香濃南瓜粟米鮮肉餃（$38）
麻辣白菜鮮肉餃肉餃（$39-7隻）

三款餃子當中，椰菜鮮肉爽脆有咬口，南瓜粟米鮮肉口感軟滑，而麻辣白菜鮮肉就相較濃郁惹味，三者各有千秋。餃子湯方面，椰菜同南瓜粟米適合搭配清新鮮甜嘅椰子海帶鮮雞豬骨濃湯，而麻辣白菜就更夾酸辣湯（另加$10）。

🥟心水煎餃之選：
芝士粟米鮮肉餃（$42-7隻）
香菇鮮肉餃 （$42-7隻）

雖然佢哋嘅湯餃質素唔錯，但係要說到驚艷，就非佢哋嘅煎餃莫屬，皮薄而酥脆，餡料扎實濕潤。香菇係油煎下菇味更顯鮮香，而芝士粟米嘅芝士混合鮮肉肉汁，更係Juicy到不得了，相信長長人龍中，應該有唔少人都係衝住佢嘅煎餃而來。怕熱氣嘅，可以叫返支自家製羅漢果甘草茶（$10）下下火，唔係好甜幾好飲。

欖菜四季豆（$25）：
蒼翠嫩綠嘅四季豆以欖菜鹹味作調味，味道調配恰到好處，而且唔太油膩，感覺比平時比10幾蚊食嗰啲白洽菜抵😛。

秘製雞腎（$22）
抵食之選，份量好多而且好厚切，滷水汁香甜誘人，一邊食餃，一邊食雞腎，說不上特別夾，但係又幾特別，我又幾鍾意😛。

-----
👶🏻B仔整體評價：8/10個👍🏻
👶🏻B仔抵食程度：8/10個👍🏻
👶🏻B仔環境評分：8/10個👍🏻
👶🏻B仔味道評分：8/10個👍🏻
👶🏻B仔回頭機會：8/10個👍🏻
-----
#swallowhongkong
跟住我一齊吞食香港啦！🤤
#swallowPrinceEdward

#豐信餃子店 #太子美食 #餃子

#寶寶雞煲 (太子)
太子基隆街11號地下
-----
媽咪日日都要煮飯洗碗咁辛苦 難得B仔放假 就帶屋企人出街食下雞煲 等媽咪仔可以休息一日 呢間雞煲並無華麗嘅外表 裝修行街坊樸實風 但味道卻係實實在在地高質
-
滋補醉雞鍋（$168-半隻新鮮雞）話明係雞煲 第一樣要揀嘅野當然係食邊種雞煲 呢度雞煲選擇差不多有成20種 有辣有唔辣 亦可以揀冰鮮雞或者新鮮雞 兩者價錢大概差$30左右 由於媽咪Daddy鍾意健康啲 所以我哋就揀咗比較養生嘅新鮮雞醉雞鍋黎試下 醉雞鍋入面有當歸 淮山 紅棗 龍眼肉 藥材 杞子等等 湯底非常足料 淨係紅棗都差不多有起碼10粒以上 龍眼肉粒粒飽滿 新鮮雞嘅肉質明顯比冰鮮雞紮實 無咩脂肪 煲完之後 成個湯底有酒味得黎 清甜到不得了 雞油香濃郁 爲食完雞煲之後嘅火鍋打咗個靚底 湯底出色之外 火鍋食材亦非常新鮮
-
Q版生根（$18-半份）原本嘅味道同平時啲山根一樣 但係由於湯底高質 令到索左湯汁嘅生根味道得到昇華 而且外型超級可愛 細細粒 有好多好多粒 雖然只係半份 都已經夠我地一家四口食 抵食
-
原個大魚頭 （$168）魚頭非常新鮮 毫冇腥味 份量好多 質感滑溜 必點之選
-
忘不了魚皮餃（$20-半份）B仔非常鍾意食四海魚皮餃 好多時火鍋店自家手製嘅魚皮餃都不及四海魚皮餃好食 而呢一次 係第一次令我覺得 有自家製嘅魚皮餃比四海好食 餃皮比四海煙韌 內餡調味亦更濃郁 的確係令人忘不了 正
-
別不同流心芝士丸（$20-半份）呢一隻流心芝士丸來貨價比較貴 唔多火鍋店選用 之前B仔係另一間火鍋店食過 印象好深刻 外形有啲似一粒包仔 好可愛 外皮比平時最常見嘅白色芝士丸Q彈 中間嘅芝士亦更濃郁
-
手打蝦丸（$38-半份）蝦丸體積頗大 蝦膠打得彈牙 食落膠質滿滿 中間有原隻爽口鮮蝦 整體蝦味非常突出 同魚皮餃一樣 令人忘不了
-
韭菜餃（$22-半份）水餃皮極薄 韭菜餡極多 味道新鮮 鍾意食韭菜嘅人絕對一食愛上 但緊記盡量唔好洽太耐 因為皮太薄好易爆
-
新西蘭刀背蚌（$58）一共有七隻 每一隻都非常大隻 脹卜卜 味道鮮甜 一樣係謹記唔好洽太耐一開就好夾起 如果唔係質感會變硬
-
一試難忘魚肉年糕（$20-半份）個名又改到咁浮誇 但食完又真係覺得佢改得幾好幾貼切 確係令人好難忘 魚肉彈口 年糕軟糯 洽完中間有少少拉絲 飽肚又美味
-
椒鹽脆鯇片（$42）除咗火鍋之外 我哋亦叫咗一個小菜試吓 佢哋小菜嘅味道水準出色 脆鯇片魚肉新鮮 炸得香口脆身 椒鹽味香得黎唔會過鹹點喼汁食非常惹味
-----
👶🏻B仔整體評價：8.1/10個👍🏻
👶🏻B仔抵食程度：8.5/10個👍🏻
👶🏻B仔環境評分：7/10個👍🏻
👶🏻B仔味道評分：8.5/10個👍🏻
👶🏻B仔回頭機會：8.5/10個👍🏻
-----
#swallowhongkong
跟住我一齊吞食香港啦！🤤
#swallowPrinceEdward
@ 基隆街寶寶雞㷛