［KFC回歸香港上市］仲有我同KFC，Pizza Hut以及百事嘅恩怨情仇
1. 美國上市中資股回歸香港，一浪接一浪，唔一定要科技股 百度 網易 阿里巴巴 京東先得嘅。最新係呢隻，Yum China。
2. Yum China，可能有少數人唔知係乜東東。就係KFC同Pizza Hut．其實仲有Taco Bell （從冇食過）。仲有小肥羊都係佢嘅—小肥羊曾經在香港上市，但私有化咗。
3. 咁你話，唔係美資野咩？KFC喎。其實原本都係，Yum China獨立上市唔係好耐，係由Yum Brands分拆嚟的，2016年尾拆出嚟。原因當然係投資者要求，覺得拆出嚟先反映到價值。拆出嚟之後，股價係跑贏嘅。
4. 咁而家Yum China，講緊200億美金市值左右。Yum Brands講緊都未夠280億。喂，中國VS全世界其他喎，可見中國市場幾咁好賺。嘩，如果十三億人個個都中產，一個星期食一次KFC，真係不得了呀！（呢類呃鬼佬嘅廢話，雷曼爆煲前我都寫過唔少）。
5. Yum China 200億美金市值即係幾多？又比較下。麥當勞，講緊1400億市值。係Yum Brands 加埋Yum China 三位咁滯，單品牌咋。之前講過嗰間Chipotle，就280億市值。Wendy’s Shake Shack Jack in the box（全部都單品牌上市公司）之類就太細了。
6. 又，我好細個已經估KFC，Pizza Hut同百事係同一檔嘢。因為小埃汾係可口可樂支持支，細個係唔肯飲百事的。但KFC同 Pizza Hut就偏偏只係得百事七喜，應該係有路。正如細細個我已經發現，大家樂係用維他汽水的（！）。事實就係，Yum Brands，原本就係百事嘅快餐部門。亦即係，當年根本KFC Pizza hut係百事旗下嘅公司，當然而家已無直接關係。聽聞而家澳洲KFC Pizza Hut係可口可樂的。
7. 不過其實我到而家都唔係好知，點解吉野家係用百事七喜，應該唔係同一老細，至少香港唔係，只係因為平啲？外國吉野家呢？其實我台灣同日本都有食過，但唔係好肯定係咪百事，因為好似飲烏龍茶，同埋大個咗我已經冇咗呢種堅持唔飲百事嘅執著。呼，人大咗，放棄咗幾多堅持呢。在那些開放的路上，踏碎過多少理想。呼，我曾經餐餐都要食飯添，而家開始耐唔耐cold sandwich做午飯—唔係因為健康，係因為快，同埋冇咁易眼訓。我曾經只係鍾意東亞女仔添，呼，但而家覺得鬼妹都幾好睇。
8. 講返，應該好多人知，KFC在中國做得好成功，比麥當勞成功。其中一個原因亦係因為早入，應該係87年大陸已經有KFC，第一間西式快餐店—甚至係八九六四之前。麥當然就要八九六四後先有，舊文都講過，蘇聯麥當勞仲早過中國（https://bit.ly/2V9LNUP）。KFC在大陸成功之道，除咗入得早外，都好多人知，就係十分「在地」。有粥食，有涼茶飲，仲有其他古靈精怪嘢，可以問下常返大陸嘅版友。
9. 另外有個講法話，麥當勞呢啲係外來嘢，但炸雞本身都係中國人有嘅嘢云云。我係有啲懷疑嘅。「肉夾饃計唔計先？」。另外，就算個講法成立，都係任你講。如果係麥當勞跑出，你一樣可以話麥當勞係藍海，唔使同成堆中國炸雞爭。所以呢啲企管嘢都係任你鳩up，吹下水可以，但唔好當自然鐵律咁。我都係比較相信係因為早入，同埋在地。
10. 仲有幾樣嘢我想講。首先，本人並不算特別鍾意食KFC，但其實埃汾個人Facebook有個玩意，叫做KFC全球試爆。就真係食咗幾十個國家嘅KFC。比較出位嘅可能係柬埔寨同越南KFC，另外我在京都都係有食嘅，「一場嚟到古都食啲特色嘢」（唔通食古都光咩）。舊年生日我就在暹粒叫雞（炸嗰啲）。2017年平安夜就在鹿兒島食KFC！啲日本人真係當聖誕餐的！
11. 但，信我，除非你食嘅國家多過我。本人權威地講，最難食嘅，必然係香港，沒有其他。絶非偏見，有機會做個blind test，呢樣嘢甚至係發生在我仲係幾鍾意香港嗰時。另外，for some unknown reason，韓國KFC同台灣都係比較唔掂嘅。大陸嘅反而算中間水平。
12. 而仲有，得罪人我都要講。香港KFC啲員工，真係廢撚到一個點。咁你梗係屌，收你好高人工咩，你去做丫笨（而埃汾就真係做過麥當勞，拿呢啲到九十歲都仲講呀）。但我當然唔係同咩米芝蓮三星啲女比，我就蘋果對蘋果，同麥當勞之類比。KFC啲員工，真係唔知做乜撚的。永遠我未撚講完就同我講多謝幾錢，同佢講加多個葡撻又即時當你講完，漏單之類更係常見。啲員工各自各吹水亦都固然。係呀我知，拎你雞碎咁多人工比條命你好味嘛，咁我肯撚定大陸台灣日本嗰啲好撚高人工的。所以真係唔好問點解日本人得香港人唔得。（又，在日本有返元祖味道嘅鬆餅的說，好似仲有吉士布甸朱古力布甸）
13. 呀仲有一鑊，我叫外賣，個KFC外賣仔，居然走去調戲埃汾太。自此我就唔再叫KFC外賣，改為叫埃汾太落街買—係喎，寧願佢在舖頭畀人調戲，眼不見為乾凈（講笑，其實根本冇叫過佢買外賣，原因係我唔鍾意外賣，嗰次應該某啲特別原因）。
14. 至於Pizza Hut啦喎，其實係童年回憶。埃汾屯門置樂附近某中學讀書（得嗰兩間），細個呢，如果午餐去椰林閣呢，就好高級架啦（呢間嘢居然未死，仲一度傳上市，可見香港地做生意幾咁好）。去到Pizza Hut？喂，好撚大件事架，真係溝女先去。而我冇女溝。正如我話，我大學年代，溝女去百人一朱（原諒我對百人一朱十分執著）。但我啲名校同學？屌，中學已經去百人一朱，大學去有馬去友和去水車屋。真係階級分野。
15. 但亦都好肯定，當年嘅Pizza Hut，並未變到而家咁劣食嘅。我都幾肯定唔只係細個回憶美化，或者嗰時見識少。即係同一個忌廉磨菇雞湯，你可以比較下當年嘅濃度，同埋雞仲有菇嘅數目。都唔好講價錢。
16. 至於小肥羊云云，香港都有食過（你老味嗰時旺角店排鳩你個幾鐘，訂咗位都仲要等）。但我居然又係唔記得佢係唔係百事。不重要。但想講，小肥羊就真係衝出中國，打入日本（說好了的日本人崇優），開撚到去宮古島開撚到去札幌，甚至開到去美國開到緬甸。
17. 講咗一大輪，講到啲餐廳好唔掂咁。咁但，又未必。講真，快餐店啫，米芝蓮三星咩。主要係香港嘅KFC不知所謂，外國嘅，你見我去到京都都仲會食就知身體最誠實。
18. 況且，分析員第一戒：千其唔好用你自己嘅喜好去衡量個市場。你覺得狗也不屌嘅，可能大把人食。而好唔好食，同賺唔賺錢，同股票得唔得，往往冇乜關係，甚至係負相關。《食神》都有講啦。你嘅全世界最賺錢嘅，都係麥當勞，香港就大家樂。係靠呢啲流水作業機械式生產，先將啲成本壓到最低。或者好似美心咁，味將軍集團，多品牌經營—即係Yum Brands其實都係咁玩法，拎啲百事去KFC賣咁，美心就拎美心西餅啲排包去美心MX做早餐賣—是真的！我有鑊真係見佢話冇晒排包，就去隔離美心西餅買！inter segment sales 呀！
———————
版務：收費專欄已減價。支持埃汾高質文章。
一星期三篇，$175睇到6月22號，加埋過去兩個幾月所有文章。
請去呢度訂：bit.ly/2wVXndj
課程編號填: CC01
報完會有email通知，繳費後有Login及Password
逢一三五入去 homebloggerhk.com （入到去就睇到《事先張揚》）
亦睇得返以前嘅文。一般我都係會黃昏出文嘅。
taco bell梗 在 [翻譯] Conan與員工參觀Taco Bell - 看板joke - 批踢踢實業坊 的推薦與評價
https://dai.ly/x2h02r0
Conan + 妹子 + 神奇員工 = ?????
這次Conan帶著愛吃Taco Bell的員工拜訪了Taco Bell總部
他還是一樣愛演啊XDDD
之前在Youtube上的影片被刪掉了一堆QQ
這次多加了一個Vimeo連結
板上好久沒有Conan的翻譯啦~
前陣子實在是太忙了現在好不容易有空
先祝大家新年快樂囉~~
防雷
-------------------------------------------------------------------
Chris以前其實就出現過
我有印象的是試玩看門狗那集
話說每次看到Lupus就想到~
怪醫豪斯裡面"It's never Lupus"XDDD
--
"Everybody lies."
--
※ 發信站: 批踢踢實業坊(ptt.cc), 來自: 140.116.130.133
※ 文章網址: https://www.ptt.cc/bbs/joke/M.1423578677.A.2E1.html
※ 編輯: Aragorn (140.116.130.133), 02/10/2015 22:35:32
... <看更多>