[記者朋友搵工未?][全民媒體]
話說舊年,肥仔金個阿哥金正男,在馬來西亞吉隆坡機場遇刺。最先爆料嘅係咩傳媒?當然唔係馬來西亞班_ _ (自己填)嘅傳媒,亦唔係CNN BBC 之類嘅鬼佬嘢。咁更加唔係CCTV啦。居然係日本電視台,仲要唔係傳統嘅大台,而係名不見經傳嘅JX Press.搞手係個三十歲未夠嘅小朋友米重克洋—但當其時檔嘢已經存在九年—即係佢讀緊大學時已創立JX Press。在JX Press報導後超過半粒鐘,主流傳媒先有報導。問下做國際新聞嘅記者,呢啲料遲大半個鐘代表乜啦。
咁搞新聞出名要資源,好新聞要龐大投資嘛。至少傳媒係咁同我講,記者朋友係咁講啦。咁呢位米重克洋哪有錢?又唔係富二代。點會有記者駐馬來西亞?冇錯,佢係冇錢的,所以佢檔嘢,唔好話冇人駐馬來西亞—根本係冇記者的!
咁點做報導點寫稿?就係登登登凳,AI,機器人。容我抽水講句,本城也文也武,啲tech撚吹到點勁都有,「你哋啲金融撚識鬼技術咩」,咁但總唔見有人搞到啲嘅咁嘢出嚟。最叻就係呃政府錢,同埋個個炒bitcoin (然後在留言鬧你喂加密貨幣唔係bitcoin呀你識唔識架?)
只有AI同機器人(程式)唔夠,仲要多樣嘢,就係社交網絡。基本上個機器人寫手就係在網上不停睇東西(我估主要係twitter),發現有突發事就會認到,然後識得抄文寫篇新聞 — 又得罪講句,「其實有啲記者做嘅嘢都差不多」,個分別係個機器人唔使出糧唔使休息唔使一年去幾次日本更加唔會上網屌香港人唔重視佢。驚未?
當然係事後孔明,但根據米重克洋所講,佢就真係少年有大志,中學時已經幫航空公司寫新聞(可能幫補下佢一年去幾次日本),一早知道日本新聞行業員工多多但錢就賺唔到,完全係累鬥累losers game.
而家佢檔嘢廿四條友,平均都未夠廿九歲(拿,新一代充滿希望呀),大部份係工程師,記者一個都冇。實際上算法係點當然最高機密,但基本上佢睇住啲貼火燭呀撞車呀嘅post,留意啲感歎號,睇埋相咁。亦都follow外國可信嘅傳媒收枓。
對,已經有人覺得佢哋係好似黃牛咁「不事生產」,掠奪他人成果(由香港人講真係特別有說服力咯)。但有幾出奇啫?個個癲覆行業啲既得利益都出嚟嘈架啦。Google News都畀人話抄嘢唔畀錢,主場新聞又好Huffington post 好都係畀人話抄料當自己.
有人估啲外國傳媒遲早block走佢,等佢冇得抄料。但我估又未必,古語有if you cannot beat them, join them.小朋友有技術,收少少錢幫主流傳媒,有何問題?大公司肯畀呢啲錢 — 然後可以炒咁一大堆自己嘅記者。事實上大台NHK 朝日富士等等都係佢客仔。
更重要係連對沖基金都訂閱—你諗下例如第一時間知道邊間核電廠出事,即時去沽空,就真係能知幾秒事富貴千萬年了。新聞資訊就係咁樣有價,N年前萬惡嘅羅富齊家族,正係因為有信鴿,早過人地知道拿破崙打敗仗,狂掟法國國債賺到盤滿砵滿。故事唔知真定假,但至少後來Paul Reuter都係用信鴿報股價,快過火車,咁樣起家 (係呀,路透社,你唔係以為條友叫Thomson Reuter下話?)(講開又講,Reuter係猶太姓,之前有位德國球員路達就係呢個姓)
講返JX Press佢仲話可以隔濾到99%流料,例如上次熊本地震有人放張相話動物園走咗隻獅子出嚟-佢哋嘅機器人認到係舊相,南非嘅相—真係醒過你好多網友。不過,99%其實係唔夠嘅。試下一次佢誤報北韓射核彈?
我諗到嘅係,Social Media可能會ban佢,但未必咁易(而家只係instagram ban),況且可能錢解決到問題。傳統媒體呢?樓上講咗啦,炒咁啲自身記者,何樂而不為?所以最大阻力,就梗係嚟自記者自己,飯碗被威脅喎—即係好似的士司機咁。我
估總有記者會試下fake佢個機器人,估佢算法,報流料,例如齊齊話鄧小平復活咁,然後齊齊出突發引佢亂報—最後就話畀大家知,拿,機器人信唔過,都係人先可靠。今次好彩係鄧小平復活咋,下次係侵侵射核彈咪仆街?即係好似啲廚房佬會試下整爛部炒飯機咁。咁不過,係有咁醒,就唔係廚房佬啦。咁易畀你fake 到,就你發咗達啦(米重克洋就當然發咗達)
Anyway,可以想像到,做人物專訪甚至副刊嘅,呢啲反而冇乜大影響。但啲突發聞就危危乎了(定咗好耐?)。機器人取代唔到人?次次都會有人話真係有創造力嘅唔怕畀人取代嘛—問題係邊得嚟咁多創造力?大把人都係渾渾噩噩呃飯食。正如你話咩「有才華嘅人唔使加班」「有才華嘅人唔使同同事打交道」。係架,Steve Jobs 神憎鬼厭,未上位時都人見人憎,但佢有才華咯,你呢?就係個個都其實冇乜才華嘛。有才華嘅人唔使加班?Elon Musk晚晚訓工廠添。咁佢梗係唔及你有才華。
咁當然啦,我啲讀者全部都好有才華嘅,最冇才華就我,成日都係譯外電稿,好快畀AI取代
thomson reuter 在 Thomson Reuters - Home | Facebook 的推薦與評價
Thomson Reuters is the world's leading provider of news and information-based tools to professionals. ... <看更多>
thomson reuter 在 Thomson Reuters - GitHub 的推薦與評價
The Front End Framework is a Thomson Reuters Tax and Accounting project to create a re-usable library for creating rich HTML based applications. ... <看更多>
thomson reuter 在 Thomson Reuters - YouTube 的推薦與評價
Thomson Reuters is the world's leading provider of news and information-based tools to professionals. Our worldwide network of journalists and specialist ... ... <看更多>