《或者存在的不存在職業 – 禮物追尋使》
「你份禮物，最尾會去咗邊度，你知唔知？」
你唔知，但你想知。
無論係爸爸媽媽嘅新年禮物、朋友交換嘅聖誕禮物、老人家嘅傳家之寶定情侶間嘅訂情信物......
份禮物幾重要都好，但人哋收咗之後，佢最後會被珍藏、被轉贈、定係被拋棄？
於是有班人搞咗門生意叫「禮物追尋使者」，
佢嘅原理，係喺份禮物上裝上獨家研制，最微細嘅GPS定位加超微型鏡頭。
由於有啲侵犯私隱，所以佢哋地下經營，唔多人知。
喺我20歲嗰年，機緣巧合識咗呢班「禮物追尋使」，
咁啱我準備咗支好古典嘅髮簪送畀女朋友。
佢哋就話「不如畀個試用價你。」
我講笑話「咁要10年Plan試下啦。」
10年Plan會包20張相，即係每年兩張，隨機拍攝。
10年之後佢先會Send返Report畀我，再話我知禮物嘅所在地點。
點解我揀髮簪？
因為我曾經諗過同呢個女仔會一世，髮簪懶古典，可以做嫁妝，第日傳比啲仔囡。
當然，一個故事出現「曾經」、出現「諗過」，大家都知結果。
呢份禮物送完冇耐，我哋就散咗。
呢支髮簪我亦冇記住。
就咁10年過去，我已經30歲。
就喺呢個時候，電話傳嚟一個陌生嘅號碼。
「你好，我哋係《禮物追尋使》，你嘅10年Plan已經完結。唔知你Email有冇轉呢，我想Send返份Report畀你。」
剎那間，個人有啲空白，我笑一笑：「冇。」
其實，又點會冇？
只係我仲記得舊Email嘅PW。
一登入，就見到幾千封「未讀電郵」，
雖然我放棄咗個Email，但啲「推廣電郵」睇嚟仲未放棄我。
仲見返一堆「XANGA subscription」嘅Email。
仲記得，同嗰個女仔都只係停留喺Xanga年代，
彼此關係捱唔到Facebook興起就結束。
然後，碌到最上，就見到一封今日嘅「新郵件」。
一支髮簪、二十張相、一個十年嘅故事。
============================
第一張相，係佢床頭，我仲依稀認得。可以喺床頭佔一位置，都係諗過同我白頭到老嘅證明。
第二張相，同啲原子筆擺埋一齊，睇嚟已經成為筆筒嘅一份子。
第三至五張，依然係筆筒。
三年冇聯絡嘅朋友叫斷交；三年都未移動過嘅禮物，我諗應該叫廢物。
果然，第六張相係一個Party，鏡頭面前隻手我認得，係佢隻手。但呢隻手拖住另一隻手，我估計就係新男友嘅手。或者係新新男朋友，又可能係新新新男朋友。唔知，都唔緊要。
呢支髮簪，往昔情人嘅禮物，成為咗「朋友交換嘅聖誕禮物」。
之後，呢支髮簪出現嘅地方、鏡頭前嘅人，我都再無頭緒。唔知轉贈過幾多次；唔知被放棄過幾多次。
第十八張相，髮簪去到一個全新國度—垃圾桶。
經歷九年奇幻冒險，一件訂情信物，始終都係「垃圾筒見」。
當時嘅誓神劈月，咩一生一世，原來都係霎時衝動，今日回想都好魯莽。
甚至乎，如果呢家喺街度撞到，我亦冇信心認得佢。
到第十九張相，展示一雙老舊且皺皮嘅手。
我諗係垃圾站嘅婆婆，似乎下一張就係焚化爐啦。
但係最後一張相，髮簪冇去到堆填區，而係一個地攤。
我好好奇，所以睇咗GPS位置。原來去咗天光墟。
天光墟係啲半夜開門，天光收檔嘅地攤。開工嘅係一班為「兩餐」嘅老人家。
佢哋唔係賣啲咩高級嘢，全部都係舊嘢，賣麵包皮都見過。
今日，我支髮簪成為其中一份子。
到埗之後，我依照GPS提示，終於見返十年前嘅禮物。
寒風之中，我問老人家：「點賣呀？」
老人家話：「1蚊件，10蚊12件。」
我自顧傻笑，估唔到曾經珍而重之嘅禮品，今日標價1蚊。
「你知唔知呢支簪以前幾錢呀？」我拎起髮簪，帶笑相問。
老人家答我：「重要咩？同回憶一樣，一旦舊咗，就係廉價貨。」
我再問：「即係回憶都唔值錢？」
佢答：「對待回憶，同對待一盒就過期嘅特價飯盒一樣，盡快食，食完盡快掉。」
我笑一笑，冇再問，擺底一蚊，買走廉價嘅回憶。
「禮物追尋使」呢個服務，我諗冇人會幫襯第二次。
因為禮物嘅作用就係一剎那間嘅喜悅，
等待住禮物嘅殘酷結局就係呢種喜悅嘅副作用。
你深究太多，就好似將過期飯盒留喺身邊一樣。老土亦都冇益。
回頭時間，並唔應該太長。
十字路之上，我哋依然與唔同人擦身而過，冇起點、都冇終點。
「你份禮物，最尾會去咗邊度，你知唔知？」
你唔知，但你唔會想知。
唔知道係一種幸福，醒唔起係一種祝賀。
-------------------------------------------------
其他不存在的職業系列Album：https://goo.gl/xh4bbt
如喜歡可以輕輕一Like~
其中推薦：
《死亡剪片師》https://goo.gl/le9re9
《超人身後的救災重建小隊》https://goo.gl/1HcJq6
《Facebook生死冊(上)》: https://goo.gl/TpJFWi
《Facebook生死冊(下)》:https://goo.gl/1mggQc
Ig:cheungson88
*會慢慢Up嘢上去
