［用家報告］ 而家我好似啲鳳姐咁，share返啲用家報告。目的當然係等更多人幫襯。講真錢事小，有數得計，一本我分到幾錢？上星期我同埃汾太食餓媽卡些，一人兩千幾，你計下要賣幾多本書。唔係暴發而係話你知賣書真係搵唔到錢。但滿足感嘅嘢（即係自high係大嘅），「唔係樣樣都講錢」。況且我已寫完本書，所有marginal嘅滿足感，都係冇成本嘅。
TLDR：呢位仁兄就係在信報獲獎無數嘅「高天佑」。
＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
1. 講返，姿色改變命運。有人賣相，有人賣身，我冇色相賣，只有賣勞力賣時間賣文。雖然我不一定同意「沒有誰比誰高尚」（賣身都有好多種，當匪都要當最大，竊鉤者誅，竊國者侯嘛），但的確本質上唔係好大分別。
2. 賣身嘅對家打個冷震就搞掂，一炷香貨仔（視乎你炷香有幾大，係黑木香定王蓮香），我寫本書打到手都痛。之但係人地工作嘅厭惡性高好多，況且你買咗書我就錢已收，你有冇精神高潮同作者完全無關。
3. 賣相嘅，就掂都唔使畀人掂，仲開心。但始終我地生存在一個高度金融化嘅社會（成日講，我本書都講咗好多次）。搵到錢自然就有競爭，你有波人地冇？你有青春人地冇？你識著制服人地唔識？況且，同足球員（？！）一樣，生涯好短暫。相反，寫文嘅，真係玩到七八十歲都仲得。
4. 講得太遠，但我想講，我呢篇用家報告，同啲鳳姐貼嘅報告有一個好唔同嘅地方：我呢篇係真報告，絶非一人分飾多角，又唔係中介人（出版社/扯皮條/網站）職業寫手，更唔係免費餐然後叫用家寫。寫報告嗰個，真金白銀去買本書嘅。
5. 雖然其實，我原本係諗住送本書畀佢的，「慳返」。當然仲有機會，佢可以拎多本書送畀人，或者拎去轉貼，拎去包腸粉都得。或者拎一本嚟抄，當買個長期價外option，萬一我第成出咗名，呢個初版書就好珍貴，好似《伊利亞德》Iliad初版咁珍貴（＊）
6. 講返，做乜會送書畀佢？因為本身識佢。佢就係在信報獲獎無數嘅「高天佑」。我本書都有特別鳴謝佢，況且，內文中有提過，我早排睇嘅《蕭條CULT片爆炸力：那個低潮期的香港電影》亦係佢寫，但唔係用「高天佑」筆名。
7. 「高天佑」在信報嘅文寫得相當好，我自己日日睇，之前返工時亦都推介畀啲小朋友下屬睇。嗰時仲識咗個女記者，內地出世（重慶佳麗，幾靚的），香港讀書，香港工作，都問我應該睇咩人寫嘅文，我都係推介「高天佑」。呀女記者一度視「高天佑」為夢中情人咁滯。
8. 然後？機緣巧合下，我認識咗「高天佑」。佢同我講：我細細個就睇你啲文啦！「都係跟你學嘢」。搞到我好不開心（你睇男人幾易呃）
9. 成件事就係咁，生命影響生命。一方面「高天佑」嘅文都啟發我不少，但原來佢話我知，佢嘅文都係跟我學嘢，深受我影響，「即係我睇返有自己色彩嘅嘢」「唔怪得覺得咁正」。
10. 我亦推介大家睇「高天佑」在信報嘅文，或者買佢嘅書《中產必須死》。我當然都有買。
11. 佢在信報嘅專欄，並唔係篇篇都極好。但，你試下日日寫文丫，你就知有幾難。冇咁好嘅都合格有餘，然後好嘅令人擊節讚賞，已經好難得。
12. 我朋友嘅whatsapp group，偶然都有人貼佢嘅文。有時其他朋友覺得「條友外行」。事實如此，咁佢的確好多嘢唔係「內行」。但呢個亦係我地年代嘅一個問題：佢當然係「外行」，正如我寫巴塞唔會熟得過一個忠實球迷，更唔會熟過一個加泰隆尼亞人。
13. 問題係，人地日日寫，寫唔同嘅嘢。好簡單：你試一次，你做得到先好講。日日寫唔同嘅行業，當然就會「外行」，但佢係通才。同時間佢亦有佢專嘅領域，胡適話齋，為學要如金字塔,要能博大要能高（雖然我唔係好明同金字塔有乜關係）。你通才嘅地方，瓣瓣識得6-7分，唔使好叻，但叻過average people小小。然後專嘅領域有8分，至少真專才唔會覺得你乜都唔識，咁就已經夠橫行天下了。
14. 係喎，明明係分享佢食用我嘅報告，而家變咗寫我食用佢嘅報告。文人嘅嘢，互相吹捧嘛。但我覺得都好，因為文人另一特點係行家相輕，似乎華人特別係咁，醜陋之極，互吹不如單打。
15. 最後，都係講返「生命影響生命」。固然我講過，只要哥哥長得好，一句在嗎我就倒。每次遇到啲新朋友，特別係後生女，話我知「我有睇你啲文」，嗰下陶醉真係緊要。不過，即使唔係客套，就算人地真係有睇，「我有睇你啲文」同埋「我覺得好好睇」係兩回事。「我覺得好好睇」同「深深影響咗我」，又係兩回事。
16. 唔止一次講過（放心，未來十年我會不停講），「馬蘭頭獎學金」嘅trigger，就係我在台灣隔離14日時，睇咗兩本關於誠品創辦人吳清友嘅書（＊＊）。（BTW．亦都有睇《蕭條CULT片爆炸力》）。
17. 但呢個係導火線。遠因我都講過，我冇仔女，想有人傳承我，加上自覺一身資本主義嘅肥肉，要買啲贖罪券。
18. 但近因呢？近因就係近十幾年，我睇wikipedia（我經常睇，返工都睇），見到啲名人學者，畫家之類嘅介紹。會列出佢地受乜人影響，又影響咗乜人。呢下嘢我就覺得極之beautiful！
19. 當然呢啲都係Vanity（世上有乜唔係？），背後折射係人對死亡嘅恐懼。「生是一個等待死亡的歷程」。但即係，我就似乎成唔到咩大事，但如果第日有個成大事嘅小朋友，會話人知「受我影響」「細細個就睇我嘅文」。成件事係咪好有型呢！
20. 又，仲有其他嘅讀書報告，有機會再貼。Instagram上都有，你可以去睇@bigcatreads。而我係唔知咩人嚟的。
（＊）這是一個gag，舊文講過。你真係唔好以為荷里活啲編劇就唔腦殘。（https://bit.ly/3jDeK6L）
（＊＊）我希望有一日，我對我讀者嘅質素，令我可以有信心唔再寫「誠品創辦人吳清友」。成件事十分之「沐浴巨星」
＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
竊國者侯 在 竊鉤者誅竊國者侯 - Facebook 的推薦與評價
竊鉤者誅竊國者侯. 6 likes. Sports & Recreation. ... <看更多>