在香港時嘅偽中產日子與在英國的真生活 (5)
做一個香港中產，我夠膽講，飯可以唔食，但係樓唔知點解一定要買。老實講，香港嘅樓真係好離譜，好癡線咁貴同細。
千其唔好同我講地小人多厘個concept，香港細啲，定係新加坡細啲？係個政府幫唔自己嘅市民諗嘅問題。亦唔好講因為香港係國際城市。London同New York就真係有中東，俄羅斯，東歐，中國同本地人去買樓投資自住。香港今時今日，除咗黃皮膚去買樓，大家覺唔覺個樓市有其它國籍嘅人有需求呢？
講黎講去，都係港英政府响當年簽完中英聯合聲明之後，玩高地價政策，去到今日都重要玩。但係我又覺得，我地厘班中產又唔扺幫嘅。當年沙士，樓價其實番咗去一個好低嘅水平。玩咗幾十年嘅抄樓呀，摸貨呀，之如此類嘅游戲，都玩夠啦。要死都死晒，要負資產嘅又負晒，個社會都要洗下牌啦。我記得當年，好多朋友，因為樓價低咗，真係可以買樓結婚喎。
點知個政府搞唔到其它經濟，又玩番高地價政策。啲地產商緊係開心啦，啲啱啱買咗樓同負咗資產嗰啲中產，又想啲樓去番未負之前個價，又跟著去happy。結果，唔洗我講啦。我好肯定，由政府至地產商，到有樓嘅中產，無一個人會想厘個游戲停。
其實，就算香港嘅樓真係升到永遠，結果咪又係中產自己受番。當樓價高過搵錢能力，同一間屋就只可以住到死嗰日，個仔16歲6尺高都唔好諗住換。除非無仔女，如果有的話，16歲讀醫都無用，個首期邊個比呢，又係靠上一代嘅水尾囉。
講番英國，就用London講，講貴，比香港更貴。講細，可以比香港更細。但係，有一樣好重要嘅嘢，作為中產，就係有得你揀。你要方便番工又要好區，代表你係搵得到，唔介意住細啲。如果介意住得細，只要一個鐘頭車內，就係另一個世界。香港呢？一個鐘頭車都重係個小小小世界。
講起London，有一樣嘢大家真係要知。就係千其唔好信嗰啲成世人，剩係識去London旅行，又未响英國生活過嘅人講（尤其是有仔女响英國讀書，懶熟英國嗰啲呢）。如果嗰啲人一開口，剩係識講Zone 1，Zone 2，又講唔出實際邊一區，邊一忽的話，一定唔好信！因為，唔好講London，全個英國都係，每一個區都分得好細，而London就分得更細，就算Zone 1，都有差嘅地方，Zone 5，都有好嘅地方（大家睇下唐人街同Regent Street個樣就明啦）。緊記。
响英國，無論租樓或者買樓，同香港唔一樣嘅。除咗區分，講價錢，主要唔係用面積黎衡量。係計幾多間房同幾多個冲涼房，繼而廁所。要知道英國嘅屋或者apartment，就算有三間房，都可以係得一個冲涼房嘅，最多係多一個廁所（剩係廁所！）。所以，例如兩房兩冲涼房（好小有）嘅價錢係會貴過三房一個冲涼房，如此類推。
另外，形狀亦會對價錢有分別嘅。當所有嘢同地區都一樣，apartment係最平，跟住係semi-detached，然後detached，總之分得越開就越貴。
唔計London（因為市場太複雜，我唔識），咁其實响英國，對於一個中產黎講，無論係兩房還是三房，一般家庭住屋嘅面積同香港比唔會大極多。用面積黎講，大概平均實用900至1200尺到。係去到三房三廁或以上先會開始幾何級數咁變大。
其實，我自己覺得厘個面積真係啱啱好嘅，第一，响無工人姐姐嘅情況下，唔洗做家務做到死死下。等二，英國係凍多過熱嘅地方，而heating係要錢嘅嘢，所以太大只會嘥錢。第三，而係最重要嘅嘢係，一個家，我覺得係要有空間得黎會有warm嘅感覺，而厘個size就係剛剛好！
#英國住屋 #香港無得比 #住幾大先係啱 #一個鐘頭車住另一個世界 #搵得到都要有得揀
