*嚴禁劇透*
*粗口自行過濾*
*可瘋狂話戲屎但免外表批評人身攻擊*
[1230隔夜超短劇評][TVB][鐵探EP03]
[讚] 全劇最後嗰部分，Madam Lo同埋黑哥真係冇得頂。Madam Man帶嫻姐去探Bingo，嫻姐一開始認唔到Bingo，Bingo自己講返細個嘅嘢嗰時，黑哥已經做得好好睇。點知Madam Lo仲出色，最後佢認得出Bingo時，嗰幾句Bingo真係叫入心扉痛入心扉呀。
[彈] 上一集彈完飛車場面，今集真係唔可以唔提槍戰駁火。我已經自己原諒咗佢哋啲玻璃一塊都唔會爆，只係想講佢個鏡頭攞位。嚴世孝自己一個人拎住支自動步槍（有錯請指正）對付垶Sir、Matt Sir嘅時候，明明應該係好緊張，但依家除咗個車頭玻璃係超級防彈連花都唔會之外，就連兩位阿sir推架車過去一步步咁迫近嚴世孝嗰吓都變得好笑。點解一個咁緊張重要嘅場口，花咗咁多錢咁多力，但就唔拍多幾個tight啲嘅shot，或者剪緊啲，令到件事緊張啲呀？好嘥呀…
另外，快活谷審嚴世孝嗰度又係冇氣氛。明白全套劇唔會個個位都爆起，但當個劇情係靜態啲嘅時候，演員出咗力，剪輯同埋拍攝都要配合呀，如果唔係就好似呢場咁，有種死唔斷氣嘅感覺。我明重點係想講兵賊都好，都係家人最重要，但喺審犯呢一場真係好弱。仲有佢哋成班人調去NB時嗰啲奇裝異服，笑位我唔識笑可能係我個人問題，有觀眾或者會覺得好笑，但需要咁長篇幅？之前喺大牌檔嗰場就好啲，起碼營造到佢哋齊上齊落嘅感情，但係裝束嗰part表現到佢哋唔係與別不同，而係勁騎呢。我明要佢哋同其他警察有個對比，講佢哋成team人都唔似一般警察但都可以做到嘢，不過呢個表達透過呢個場口去做，會唔會奇怪咗啲？
我愈來愈覺得Madam Man只係一個唔知點解做到去高層嘅師奶。為咗個仔報仇其實佢咁亂嚟我可以理解，但佢喺其他方面完全冇大將之風，點解要設計成咁呢？
Madam Man 同 阿進 阿傑、嫻姐 同 Bingo、垶Sir 同 晴晴，三段親子關係點樣去影響警察理智，希望之後愈寫愈好，係可以好好睇。
仲有呀各位父母，請你哋唔好喺仔女面前討論爭辯同埋互相指責你哋點樣影響個仔女，因為對小朋友嚟講真係會好大影響。
[演員表] 惠英紅 飾 萬晞華 / 袁偉豪 飾 尚垶 / 姜浩文 飾 游秉高 / 蔡思貝 飾 招喜悅 / 王君馨 飾 楊曉怡 / 許紹雄 飾 簡國曙 / 楊明 飾 邱勵傑 / 梁競徽 飾 谷永正 / 林偉 飾 山狗 / 林利 飾 大威 / 方紹聰 飾 發瘟 / 盧宛茵 飾 張麗嫻 / 泰臣 飾 嚴世孝 / 謝可逸 飾 老總 / 謝東閔 飾 陳國城 / 余德丞 飾 莫世超 / 張寶兒 飾 程美茵 / 潘姿善 飾 尚晴 / 洪永城 飾 邱勵進
#1230隔夜超短劇評 #無綫 #TVB #鐵探 #惠英紅 #袁偉豪 #姜浩文 #蔡思貝 #王君馨 #許紹雄 #楊明 #梁競徽 #謝東閔 #余德丞 #張寶兒 #潘姿善 #林偉 #林利 #方紹聰 #盧宛茵 #泰臣 #謝可逸 #洪永城
