【龔成問答信箱】(Q22721-Q22740)
Q22721:
老師,上完你的堂,現在看報表,有些問題想請教
1)1310香港寛頻為什麼沒有銷售成本?
2)派息比率由141%至1054%,是否不太正常?有什麼implication on their business direction?
謝謝你
3) 另外偉易達303,初步指標同5年財務數據也好合格,現價是否合理價呢?謝謝你
龔成老師︰
1) 唔係每一間企業年報,都會列出銷售成本。因為有些企業係提供非實體產品,或者以服務為主,其實佢地好難去準備計算一個銷貨成本,所以在年報會見唔到這個項目。
其實除左香港寛頻(1310),福壽園(1448)由於佢賣地以外收入日漸增,佢係近幾年都開始唔出銷貨成本,都是這個原因。
2) 你要記翻到底派息比率係點計,佢係由"派出股息" / "純利"。而"純利"當中,係會扣除一些非實質支出,好以"拆舊和攤銷"就係其中一種。
以佢2020年純利9700萬計,但"拆舊和攤銷"就足足有成15億,如果加回這部份,你就會發現,其實佢只係派緊本身架純利,無任何不正常狀況。
出現大於100%派息比率,另一個可能性,就係佢用以往賺架錢,拿出來派。
當然,唔係每隻股票派息比率高於100%,都一定係這2個原因。你要每隻去深入分析,才好下結論。
3) 偉易達(0303)佢財務數據係合格,此股可以作為收息及平穩增長股,雖增長力就不算強,但適合你年紀。
本質正面,長遠投資價值有的。
以佢過往正常的經營環境來講,佢派息比率高達9成,成立於70年代,業務是電子產品,這麼高的派息,反映管理層明白這公司已過了最高增長的年代,之後只會是平穩增長。
公司已不需要每年投資發展,反而管理層、大股東,偏向想收息,因此這是重派息多過重發展的公司。
雖然佢係某些業務做得不錯,但發展心不強,同時大環境並不是高速增長,故相信佢之後都會平穩。近年這公司的生意,都是平穩增長,如果比較幾年前的盈利,都是差不多。
此股係收息,再加些平穏增長力。現價合理,可投資,但不能太過大注。
------------------------------------------------
Q22722:
老師你好
一萬股941
一萬股66
一萬股17
二十萬股 3988
10萬股 386
1000股 1113
500股 9988
現在總金額負50萬。不知道應該繼續收息抑或再轉組合?
龔成老師︰
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
你現時持有股票,全部都係有質素,長線持有係無問題。
有無需要轉換組合,就要因應你年紀和投資經驗,再作出調整。
我地投資會運用「先增值,後現金流」作方法,初期應投資較多增值類資產,較後期則應投資較多保守類項目。所以係分配投資項目時,會因應番你的人生階段。
如果你年青,可以「平穩增值股」(0066, 0017, 1113)+「潛力股」(9988)。中年人士,可以較集中翻係「平穏增長股」。當你已近退休之年,就應集中在「收息股」(0941, 3988, 386),去創造平穏現金流。你可以睇翻自已年紀,去作出配置。
另外,你唔好太集中係幾隻股票身上,你要配置一個平衡性高組合。當中包含不同行業,同時個別企業和行業,不要佔組合15%和30%以上。
以下係一些優質股票,你可以參考下,將適合你的股票,加入組合當中。
潛力股︰安碩恒生科技(3067)、比亞迪(1211)、中生(1177)、福壽園(1448)、港交所(0388)、阿里(9988)、騰訊(0700)、舜宇光學(2382)、小米(1810)、GX中國電車基金(2845)、三星FANG ETF(2814)。如果有投資美股,可投資QQQ。
平穏增值股︰指數基金、港鐵(0066)、煤氣(0003)、恆基(0012)、中銀香港(2388)、長建(1038)、粵海(0270)、領展(0823)、希慎(0014)、太古地產(1972)。如果有投資美股,可投資VOO。
收息股︰港燈(2638)、香港電訊(6823)、工行(1398)、恆生(0011)、置富(0778)、陽光(0435)、深高速(0548)。收息基金(3110),都可以。
但你要留意翻,平穏增長股和收息股,現價都合理。但部份潛力股已有輕微過熱情況。只有安碩恒生科技(3067)、GX中國電車基金(2845)、 騰訊(0700)、阿里(9988)、中生製藥(1177)、福壽園(1448)、QQQ勉強算在合理區頂部,可分注入貨,其餘要等等。
你咁大負數,相信係你買入價過高所致。如果你對估值定平貴,唔係太了解。我建議你先用月供去儲股票,以減低買貴貨風險,相信對你會較有利。
------------------------------------------------
Q22723:
龔成老師你好!本人27歲月入3萬政府工,儲蓄大約有70萬,之前都有月供開1211同823,
想問依家想轉981或1347其中一樣。同1928加405。
可以比些少意見點睇981同1347嗎
龔成老師︰
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你27歲,應以增值為主,建議你用「平穏增長股」 + 「潛力股」作組合,去創造一個增值平台。
先前月供的比亞迪(1211)和領展(0823),都是合適的。但由於比亞迪(1211)現價偏貴,暫時不宜月供,就回到$180才好再考慮。
越秀房產信託基金(0405)只係收息股,增長力唔高,唔係太適合你。
中芯國際(0981)業務有增長力,質素係有,但未到最高質素。
睇翻佢過往的業務情況,雖然仍每年的生意都有增長,但盈利就有波動,反映雖然大環境的市場在增長中,但佢的成本與售價,就未必在佢掌握的範圍,最後造成盈利波動的結果。
雖然這股都有前景,但以佢面對的情況,但好難將佢定義為最優質的股票。
加上此股近年升了不少,就算有所回落都唔算平,加上之前熱炒過,股價大上大落,投資要注意風險。這股唔建議大注,回翻D較合理。
月供都可以,但不宜太多,小注好了。
華虹半導體(1347)有質素,發展不差。
佢主要從事半導體產品的生產及貿易,開發及提供晶圓工藝技術組合,包括嵌入式非易失性存儲器及功率器件,以及RFCMOS(射頻互補式金屬氧化物半導體)、模擬及混合訊號、CMOS圖像傳感器、電源管理及MEMS(微機電系統)等多種其他技術。
佢客戶主要為集成器件製造商與系統及無廠半導體公司。中國因為想發展這方面的技術,政策在長遠會對這公司有利,增長正面。
這股長線持有無問題,但現時估值有少少貴,而且都比較波動。做月供的話,小注好了。
我地唔好成個組合,只集中係3,4隻股票身上。
最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能高於組合30%,同一股不能高於組合15%。要平衡,建立後長期持有,不是買賣賺差價,而是成為你財富組合一部分。
------------------------------------------------
Q22724:
你好,我32歲,現時持有股票
3690 200股 406.6平均價
0003 3150股 16.82平均價
3319 1250股 37.6平均價
9618 100股 392平均價
想問下應該如何調整投資策略
龔成老師︰
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
以你32歲年紀計,應先以增值為主。你現時持有股票,都係質素和適合你。但美團(3690)不確定性會較高,長線不宜持有過多。
但我發現你手上不少股票的買入價,跟現價都有相當距離,雖然可以守,但你要預起碼等一段較長時間。
其實你的情況,都是不少投資新手會犯的錯。其實很多人都是這樣,亦是投資新手必然經過的階段。
投資新手通常都有兩個主要錯誤,第一、買入當炒股;第二、在市況最旺(即是最多人認為市場好景的時候)以最貴的價位買入。
其實這些問題,係可以避免。方法其實好簡單,就是投資較穩健的股票,又或是盈富基金(2800),分注買入,例如透過月供股票方式,每月買些少,會是較好的策略。
未來時間,你唔好只集中係上述3,4隻股票,要加入更多不同行業,令組合更多元化和平衡。
由於你過往經常買貴貨,我建議你先集中利用月供模式,去建立一個股票組合,以減低買貴貨風險。
策略上,你可以投資「平穏增長股」和「潛力股」。你每月5成儲蓄做月供。其餘先儲起,用一邊月供一邊儲蓄的策略。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
餘下的另一半現金,我地就等機會,當大市出現較大回調,就加大力度掃貨,然後作長線投資。
------------------------------------------------
Q22725:
龔Sir你好,近期留意你嘅資訊買咗你本「大富翁」未開始睇,反而傾向聽你講多啲。
幾年前買入︰
電能(6)2000股平均價$56.25
匯豐800股平均價$66.89
瑞聲(2018)500股平均價$121.44
全部都好似2018年買入就係你講中晒嘅聽人講無分析胡亂唔睇價。以上股票值得長線持有嗎?
至於配置方面,買咗一筆過投資債券派息基金。
本人52歲,希望幫自己儲錢退休,想請問月供股票/基金分別?邊個相對穩陣?
樓按仲有$280萬左右,每月前夫會俾生活費連供樓$53000都用盡。09年後已經無工作照顧家人,而家仔女大晒結埋婚畢埋業有工作,現時負擔係雙親同自己。
可唔可以俾啲方向,人生交叉點。我已有醫保、儲蓄人壽(1份供完,1份舊式供到死不過固定保費$320)$50萬危疾$200萬定額壽險就係死雙親都要錢。
但人要正面睇如果仲係到生活都要錢靠MPF一定唔夠,醫療又年年加,感謝。
龔成老師︰
書本你都要睇,特別係初學者,最好睇左《80後百萬富翁》、《財務自由行》和《股票勝經》先。雖然平時睇我Q&A都可以,但書本上概念較完整,對你分析和解讀我Q&A或者POST架內容,係有幫助。
你以上股票,都係有質素和適合你,可長線持有。但問題係,你買入價有點貴,才會出現帳面虧損。
月供股票/基金,其實你現睇翻佢投資項目,才知有無投資價值。但我一般會較建議買優質股,因為基金都會有一定費用,長線係蠶食緊你回報。
你現時保險都係保障型多,這些可保留。而儲蓄保險,其實增值能力唔算高,現在一份可以保留,但唔建議加大投入。
以你52歲年齡,其實要開始為退休做準備,但同時,財富仍有增長力(但不是進取)。若單靠MPF,其實真的很難足夠應付退休生活,所以你要累積優質股,去加大退休生活支援。
選股上,你可以投資「平穩增值股」+「收息股」,作為增值目標。
由於你過往都成日買貴貨,相信你對企業估值,點去定平貴未必會太了解。所以你先利用月供模式,去做增值,可以減低買貴貨風險,對你而言會較理想。
策略上,你每月5成儲蓄做月供。其餘先儲起,用一邊月供一邊儲蓄的策略。
若你想進取些,可集中「平穩增值股」,相反你想保守少少,可以集中在「收息股」上。但比重要隨著年齡增加調整,慢慢增加收息股的比例。到退休時,你收息股比例,應提升至100%。
同時,可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。
------------------------------------------------
Q22726:
龔sir 您好,我係澳門既Fans~因為疫情的關係您應該需要一段長時間才能夠在澳門辦課程,但因為我和其他幾位朋友都一直很有興趣上您的堂
未知開辦網上課程我和朋友包堂未知這個方法您是否願意和行得通?
龔成老師︰
抱歉,由於擔心出現盜錄問題,所以我以往一直都唔會開辦網上課程。
而且,我都較希望可以親身,跟學員互動溝通,所以網上課程暫時不會開。
至於包堂這個方法,暫時都未能安排。因為要配合本身課程和工作時間安排,所以偏向一次教一大班學員會較。
你們放心,只要疫情一穏定,我就會盡快重開澳門班,到時就可以見到大家。
你或者可以預早留位,只要whatsapp 852-55457212我同事講,打「留位澳門班」就得。我地有具體資料就會 whatsapp你。
因為現時已有好多澳門人留左位。
此期間,你可以先睇我架《80後百萬富翁》、《財務自由行》和《股票勝經》,都適合初學者。
之後,你有時間,可以再睇埋《選股勝經》和《年報勝經》,對你課堂上掌握,會有幫助。
------------------------------------------------
Q22727:
龔sir 你好! 我上左你進階班,呢排摸索緊你教的估值方法。請問如果用你教的方法方析的話,比亞迪、信義玻璃、信義光能現價是否ok?
希望龔sir 你可以呢3間公司作用示範! 感謝
龔成老師︰
比亞迪(1211)貴。信義玻璃(0868)合理區頂至略貴。信義光能(0968)合理區頂至略貴。
係估值方面,你建議你主力用市盈率比較法,去先做一個估值。
但比亞迪(1211)佢潛力較高,其實較難分析。佢現時市盈率去到200倍以上,我地可以參考佢預測市盈率,現時大約140倍。
以佢增長力,去到50-70倍左右,其實都可以。所以,你預佢回幾成,才算較合理區較頂位置。當然,佢業務不斷增長,因此企業價值正向上。
信義光能(0968)你可以睇翻佢行業市盈率,大約係11-24倍。而佢係行內有一定質素和優質勢,故你可以給予較近上部位置,作其合理市盈率。
之後,你再用我教的方法,找出一個有代表性的每股盈利。由於2021年受疫情影響,參考2020年會較好。以信義光能(0968)計,你預HKD0.65左右。
計算出來的合理區約HKD11-14,當然,企業增長中,有可能有少少調整。
信義玻璃(0868)同樣可以先我上堂教的方法,找出合理市盈率區間和代表性的每股盈利。但由於佢同信義光能(0968)一樣,近年增長力高左,所以都要自行上調。
緊記,近期中央政策都出較利好綠色能源股份,故計算信義光能(0968)和信義玻璃(0868)時,用較近期數據,會較能反映實況。
------------------------------------------------
Q22728:
龔Sir你好,本人40歲公務員,已婚,有一小朋友,月入$45,000 ,可以每月用一萬蚊投資。
2019年6月以4,400,000萬購入一個220尺單位深水埗、6年樓放租,現在每月放租一萬蚊。但同年出咗林鄭Plan,令到細單位吸引力大減。請問:
1. 當夠三年的時候我應該繼續持有放租定還是出售?
2. 我每個月有一萬蚊可以用嚟投資,暫時月供股票盈富基金、中銀香港、港鐵,有咩其他建議?
謝謝龔Sir
龔成老師︰
1) 我偏向建議你出售,因為你這個單位太細,連一個基本家庭需要的呎大小都無,投資價值係會大打折扣。
2) 當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時40歲去計,可以投資「平穏增長股」和「潛力股」。你現時選擇股票,屬於「平穏增長股」,都係適合你。
你每月5成儲蓄,即是用$5000做月供。其餘先儲起,用一邊月供一邊儲蓄的策略。
但我建議你都加少少「潛力股」,去提升組合增長潛力。
潛力股可選安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)、三星FANG ETF(2814)。如果有投資美股,可投資QQQ。但佢地波動性和風險會較高,你要自己平衡。
如果你現時無太多投資經驗,潛力股這類風險較高的股票,你就不要持有過多,最多佔組合2成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約4成,視乎你現時投資經驗多寡和了解這些股票程度而定。
餘下的另一半現金,我地就等機會,當大市出現較大回調,就加大力度掃貨,然後作長線投資。
------------------------------------------------
Q22729:
你好,龔sir。9988 269均價 / 9618 330均價,係咪要沽好d
9988 1000股
9618 750股
1339 3.02 5000股
1398 5.8 10000股
1086 1.83 10000股
175 22 4000股
2127 2.56 10000股
806 5.89 10000股
有3分2是股票,有3分1是cash。
輸左10幾萬了,中美咁,係咪清倉好。謝謝龔sir
龔成老師︰
國際關係風險,近1,2年的確係高左,但我地分析一隻股票時,最主要都考慮翻佢本身質素。如果無對佢長線本質造成影響,咁就無問題。
阿里(9988)和京東(9618)最近受國家政策和相關風險影響,質素係弱左,但又未算好嚴重,估值會有少少調整。但由於核心價值無大變,從質素上計,依然值得長線持有。
但問題係,佢佔你組合比重好高。個別企業和行業,不要佔組合15%和30%以上,銀行業更加不要高於組合20%,否則會有過度集中性風險。
現時這2隻股票,從個股和行業(科技類)計,都係超左標,故你要沽出部份,換至其他優質股,咁會較好。
而且這2隻都係潛力型股票,若你偏年青,持有係可以。但如果你係中年至退休人士,就不宜太大注。
至於你虧損咁多,主要唔係股票質素出問題,而係你買貴左。如果你不太懂得估值,定平貴,我建議你未來時間,轉用月供或分注模式去儲貨,來減低買貴貨風險。
另外,中國人民保險(1339)、匯森家居(2127)、惠理基金(0806)和好孩子國際(1086)質素唔算好強,長期的投資價值只算中等,不宜持有太多。
現時大市在合理區,你現時股票和現金比例,係合適的。餘下1/3現金,你就等大跌市出現,才加大力度掃貨。
------------------------------------------------
Q22730:
請問龔成老師,若想定期買入股票,而自己又有時間可跟進的話,是否就非必要設定月供,自己定期買入即可?
主要是因月供有費用的支出,自己買入是否可節省這方面的成本?
龔成老師︰
簡單來說,月供股票就是你每月將現金,買入某一隻或多隻股票,慢慢咁樣儲貨。
月供股票每月投入的金額相同,因此當股價上升時,買入的股數自然減少,而當股價下跌時,就自然會買入較多股數,如同自行調節一樣,去減低價格波動的風險。
其實一手手買都可以做到以上效果,你現金只要平均地慢慢投入股市(如保持住每月定額買一手)就可以。
2個方法都可以,正如你所講,一手手買更可以節省月供費用成本,但你必需確保自已可以有自律性地進行﹐咁就無問題。
------------------------------------------------
Q22731:
龔sir,想問你對美股PDD點睇,有乜建議
龔成老師︰
由於之前估值貴,加上監管因素,令股價向下,中短期仍有一定的風險,但長線不差。不過,這刻只建議小注好婺。
拼多多(PDD)本質不差的,佢將娛樂與分享的理念融入電商運營中,由用戶發起邀請,與他人等拼單成功後,能以更低的價格買到所有商品。
同時也通過拼單了解消費者,通過機器算法進行精準推薦商品,這個商業模式不差,長遠其實有發展,只是行業的賺錢能力,存有不確定性。
------------------------------------------------
Q22732:
30萬本而加得番吾夠20萬
持有:
港股:京東,中海油,平安,網易,理想。
美股:360數科,ARKX,樂信,好未來。
龔Sir,想問而加應該點算好?由2020年all in投資至現在-30%
龔成老師︰
首先你要明白一個概念,我地持有一隻股票與否,關鍵位是企業質素、前景,不要被買入價影響。因為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心,照持有就可以。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
你現時持股,大部份都係有質素,雖然你帳面有虧損。但有質素企業,長線會慢慢成長,令股價回升。
持股當中,中海油(0883)只係商品類股份,價格自主能力弱,投資價值只係中等。而京東(9618)、網易(9999)、理想汽車(2015)、ARKX這類股票,不確定性都較大,不宜持有太多。
TAL Education Group 好未來(TAL)業務主要為內地中小學生提供課後輔導課程。該公司主要為幼兒園至十二年級(K-12)的學生提供輔導服務。
其業務正正是近期中央打擊對象,雖然長線會否再次放寬相關要求,我地唔知。但中短期一定好弱,因為政策影響到其核心部份。
若你持貨不多,可以守,博佢之後政策重新放寬對校外課程的限制。但持貨較多,最好沽出部份,換至其他股票去減低風險。
另外,我地投資係會因應大市平貴,去定策略。現時大市只係合理區,其實不宜資金盡用。所以,你再有新資金,最好先儲起,等大跌市機會。
如果你投資經驗不多,擔心好似之前咁買貴貨,你可以考慮用月供股票去做投資,透過平均價格買入法,去平衡買貴貨風險。
------------------------------------------------
Q22733:
老師你好,我29歲月入1萬5,每月可存4千左右。想問問我持有以下股票應該止蝕嗎?要放部分還是全放好?最近見到係咁跌,心好慌。
6618京東健康 109.3有1800股
3888金山軟件 49.6有1400股
謝謝老師
龔成老師︰
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
其實金山軟件(3888)和京東健康(6618)唔係無質素,但佢地不確定性都較高。特別係現時都未有盈利的京東健康(6618),波動性就更高,你預佢地會大上大落。
以你年29歲年紀,持有這類潛力股,係無問題。但若果佢地佔你組合比重,係比較高,我就建議你沽少少,平衡下個風險,咁會比較好。
另外,你可以用每月儲到資金,去做供股票,加快你財富增長速度。
你29歲,可以用「平穏增長股」 + 「潛力股」作組合,去創造一個增值平台。
現在你每月先用5成儲蓄,即$2000做月供。其餘先儲起,用一邊月供一邊儲蓄的策略。
月供方面,你可以選擇投資在平穏增長股︰盈富(2800)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)。如果有投資美股,可投資VOO。
或潛力股︰安碩恒生科技(3067)、比亞迪(1211)、中生(1177)、福壽園(1448)、小米(1810)、港交所(0388)、舜宇光學(2382)、阿里(9988)、騰訊(0700)、GX中國電車基金(2845)、三星FANG ETF(2814)。如果有投資美股,可投資QQQ。
但由於你現時資金不多,可以先集中盈富(2800)。以你年紀,如果無特別負擔,建議儲蓄比例最好去到收入一半。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
------------------------------------------------
Q22734:
阿sir, 你好呀!我睇了一段時間futu, 近排才試進買了$110,$108,同$118,平均價$110.5,越買越跌,有100股,真係跌到驚,請問跌完未,值唔值得溝,還是忍痛割?
救你比啲指引,謝謝你。
唉,早上又輸晚上又輸,正宗韮菜
龔成老師︰
首先,我想你清晰翻溝貨概念。我地決定加注(即溝貨)與否,要睇幾個因素,記住,並不是「拉低平均買入價」為目的。
第一,要分析這股的質素,如果無質素,就再跌都唔加。
第二,這股的類別,如潛力或增長或收息類等,是否與你的財富組合匹配,比例是否適合。
第三,你要先計算加注後,這股佔你股票組合的比例會否太多,因為同一行業,同一股票。不能佔股票組合的比例太多。
第四,現價是否有投資價值率,要平,或起碼合理,不能貴。
第五,你要在加注後,仍有現金剩。
記住,重點不是「拉低平均價」,而是組合比例與配置。
因此,我地先有睇這隻股票,到底有無質素。
富途(FUTU)有增長力的。佢係一家在線經紀公司,提供一站式在線投資服務,騰訊(0700)為股東。該公司通過網上平台提供服務,其中包括香港、中國大陸,以及美國股市的市場數據、交易服務和新聞源。
佢以經紀佣金,以及手續費服務的形式產生收入。這企業雖然有發展,但現時市盈率好高,股價變化大,要留意風險。
此股你長線持有係可以,但由於不確定性都較高,不宜持有太多。如果你現貨只係佔組合好細比重,可以守。但較多的話,最好沽少少,去平衡風險。
另外,每注最好分開10-15%,會較為理想。
------------------------------------------------
Q22735:
sir早晨,我隻285原本已有20%利潤,依家要倒蝕!
龔成老師:
建議你減少睇股價,多睇企業年報。
你要平常心睇股價,我隻比亞迪(1211)之前都是這樣,$88賺錢跌到$12蝕錢。希望你唔好停留在一般散戶思維「著短期短期股」,你要提高層次「著重將來價值」。
------------------------------------------------
Q22736:
龔sir,我今年38歲,自己做小生意,所收入不穩定(每月3-8萬都有可能),我既資產組合,龔sir可唔可以比下寶貴意見
現金大約50萬(當中37萬係政府低息貸款),另有50萬左右股票
領展 60.5@700股
金沙27.9@4400股
福壽園7.23@15000股
平安好醫生81.6@2000股
阿里228@400股
雅生活服務29@1500股
中生制藥 6.52@10000股
唔該龔sir
龔成老師︰
以你38歲年紀,應以增值為主,你現時組合中的股票,都係有質素,而且係有增長力,你長線持有係無問題。
但留意平安好醫生(1833)雖有質素,但佢現時尚未有盈利,不確定性比較高,不宜持有太多。但佢現時郤佔你組合最大比重,建議你估少少,換至其他股票去平衡風險。
另外,你組合都比較偏向潛力股(1448,1833,9988,1177,未來時間要加翻多少少平穏增長股,以免組合風險太高。
平穏增長股︰指數基金、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)。如果有投資美股,可投資VOO。
最後,相提多你一點。因為你本身有生意,故餘下現金﹐應優先用來支援你業務。因為一盤生意做得好,其實增長力可以比優質股高好多。
當然,如果出現大跌市情況,你都可以動用這筆資金,去掃平貨。
------------------------------------------------
Q22737:
咁龔sir 可唔可以提議我如果$6000月供比例應該如何?例如領展,比亞迪,3067月供比例幾多,盈富仲供唔供好,thx
龔成老師︰
要睇你年齡、風險度。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
因此,你在選擇應該投資那一類股票時,會係因應你人生階段、投資經驗和風險承受能力,去做決定。
假設你係年青至中年人士,你可以用「平穏增長股」 + 「潛力股」的組合。如果你係偏年青,比例大約可以去到各一半。
但由於「潛力股」有一定波動性,較適宜年青和有投資經驗人士。若你投資取態較保守、經驗較淺或者較接近中年,「潛力股」比重就要相對下調。
現在你每月先用5成儲蓄,即$3000做月供。其餘先儲起,用一邊月供一邊儲蓄的策略。
如果你年齡較輕,可供3067及領展(0823)。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
比亞迪(1211)就暫時唔建議月供住,因為太貴,回到$180才好考慮。若你好想月供新能車股,可以先用GX中國電車基金(2845)代替。
安碩恒生科技(3067)由係單一行業,若你投資要控制係組合3成以內,否則會有過度集中性風險。
------------------------------------------------
Q22738:
龔Sir, 小妹有十幾萬積蓄, 現時放銀行定期/活期儲蓄都是沒有利息, 想買些收息股, 及作長線投資, 希望所買的股亦有升值的潛質,
因我從未買過股票, 所以無從入手, 最近有留意到以下幾隻股, 但不知那個獲利較高, 你可給我一些意見嗎?
股號 股名
6823 香港電訊
3988 中國銀行
2388 中銀香港
0939 建設銀行
00386 中石化
1398 工商銀行
龔成老師︰
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
所以﹐投資那一類股票,要先睇翻你年紀和投資取向。
若你係年青至中年人士,應以增值為主。你上述股票,都係收息股(除了2388),增長力不高,就不宜持有太多,但質素都有的。
策略上,你可以投資「平穏增長股」和「潛力股」。
大市現處於合理水平,那1X萬資金,你可以先用4-6萬,以"分注"形式慢慢入貨。餘下資金,就等你學到一定投資知識,或者大跌市出現,才大力度掃貨,並長線投資。
------------------------------------------------
Q22739:
2809,2846,3097,3134,3175,9845
最建議買那兩隻,這兩星期炒596和2160上落市
(唔知點解我買股票成日輸)
最後想問1357,如在1.45-1.5水位,是否已很合理價錢,這股是否也可以買
龔成老師︰
我建議你,真係唔好再做短炒。你自己都識講,你之前輸左好多錢。
如果你唔改變你投資方法,就算比你選中好股票﹐長線都可以係輸錢收場。你要記住,真正投資方法,應該係長線去持有優質股。
浪潮國際(0596)投資價值不高,而微創心通醫療科技(2160)雖有投資價值,但就好波動,不宜投資太多。
你講的ETF,都係有投資價值,但大多在合理區頂區。若現價投資,只宜小注或月供。
Global X 標普原油期貨增強型 ER ETF(3097)投資於WTI期貨合約。目標係追蹤標普高盛原油增強額外回報指數(指數)。
F三星原油期(3175)基金之投資目標為追蹤標普高盛原油額外回報指數之表現。2隻ETF都好類似,表現都係睇油價發展。
但短期油價,好難分析,至於中期,相信會由於全球經濟轉弱,表現只會一般。
這2隻基金唔易玩,因為好難準確捉到個位,就算投資都最多只宜好小注。
美圖公司(1357)佢過左最差時期,但始終業務有風險。算是有危有機類的股票。
佢主要從事提供在線廣告及其他互聯網增值服務;以及開發、製造及銷售智能硬件產品。
見佢財務數據改善,這企業仍有發展力,有長線投資價值。不過業務變化始終大,不建議大注投資。
------------------------------------------------
Q22740:
老師,1299可作穩定增長股嗎?
另外,我想問股票派息揀捽股,那捽股的買入價是如何計算?
龔成老師︰
友邦保險(1299)不差的,企業有一定的質素,有品牌、有規模,生意雖然做到較大,但仍有增長力,不過就不是高增長,只是平穩增長。
不過盈利就有少少波動,但這都正常,因為保險公司有投資相關收益,所以這亦會令股價略為波動。
前景方面,正面的,佢保持不同市場的發展,利用本身的品牌去加強新市場業務,而長遠的市場仍有增長潛力。
這股有長線投資價值,算係平穏增長股類別。現價就處合理區頂,長線持有無問題。
至於"碎股",其實買入價同一般完整一手,唔會有分別,你都可以用網上投資平台的股價作參考。
主要分別是,你將碎股做買賣時,有機會買賣差價較高。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
「友邦人壽會倒嗎」的推薦目錄:
- 關於友邦人壽會倒嗎 在 龔成 Facebook 的最佳貼文
- 關於友邦人壽會倒嗎 在 龔成 Facebook 的最佳貼文
- 關於友邦人壽會倒嗎 在 龔成 Facebook 的最讚貼文
- 關於友邦人壽會倒嗎 在 2022三商壽會倒嗎-運動賽事熱門討論及分析,精選在PTT ... 的評價
- 關於友邦人壽會倒嗎 在 標籤: 友邦人寿ptt - 翻黃頁 的評價
- 關於友邦人壽會倒嗎 在 南山人壽倒閉的情報與評價,CNYES、PTT 的評價
- 關於友邦人壽會倒嗎 在 國泰人壽ptt 的評價
- 關於友邦人壽會倒嗎 在 AIA - Publicaciones | Facebook 的評價
- 關於友邦人壽會倒嗎 在 友邦人壽評價ptt - Educationalday 的評價
- 關於友邦人壽會倒嗎 在 友邦人壽評價ptt - Nelli arpogaus 的評價
- 關於友邦人壽會倒嗎 在 友邦人壽評價ptt - Noteperformer 3 torrent 的評價
友邦人壽會倒嗎 在 龔成 Facebook 的最佳貼文
【龔成問答信箱】(Q22681-Q22700)
Q22681:
龔老師,我一直同股票談戀愛, 聚咗唔少老婆。
煤氣9095股,
九倉2000股,
匯豐2514股,
恆地8700股,
港鐵5032股,
港交所1254股,
騰訊744股,
領展1500股,
建行69700股,
中移1333股,
友邦2200股,
九倉置業3000股,
平保3087股,
中銀香港9000股,
2382(300股),
9988(300股),
京東(100股),
2269(1000股),
981(1000股),
6060(500股),
2588(500股),
285(1000股)
241(4000股)
我想在收息同新經濟股中取得平衡,未來應該會到英國生活。打算多用約1-2球重新執好個倉。想多d股息
望指點迷津,打攪老師了。by the way. 請問老師有冇開班
龔成老師︰
最緊要分析「企業質素」,如果企業無質素,就要賣出,如果有質素,就可以長線,當然,如果個人需要,就有可能要賣出部分。
首先,你現時股票太多,你會好難定期管理。建議你長線集中翻係10-15隻,咁會較好。
我假設你短期內,都唔會去英國,或者就算去英國,現有資產都可以保留。(如果短期要走,又要清空香港資產,現時就不要投資,反而要開始分段沽貨。)
你現時48歲,投資要開始保守少少。
港交所(0388)、騰訊(0700)、舜宇光學科技(2382)、阿里(9988)、京東(9618)、藥明生物(2269)、中芯(0981)、眾安(6060)、中銀航空租賃(2588)、比亞迪電子(0285)、阿里健康(0241)這些股票,不確定性和風險較高,不宜持有太多。
你可以考慮將部份,慢慢換至以下股票。
如果你想收息之餘,維持一定平穏增長力,可較集中平穏增長股。如果想保守D,只係收下收就算,可以集中係收息股。
以下股票,現價都合理,可以分注。但由於大市未算平,你最多投入多30-50萬資金好了,餘下部份等大跌市才動用,會較理想。
收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。
最後,我建議你定期審視組合,睇下有無出現過度集中情況。
任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
特別係銀行業,佢營運模式較特別,風險會比一般行業為高。必需堅守30%這個準則,如果可控制在20%以內,會更好。
現時依然有開班,你可留意。
------------------------------------------------
Q22682:
阿sir 你好!本人41歲,本人嘅股票投資組合如下
( 現時市值約337萬)
股票No 買入股數 平均買入價
2 500 81
( 2 )月供 200 74.1 - 82.4
3 4515 14.94 - 15.56
12 7200 34.8 - 37.45
27 3000 44.1 - 51.1
66 9066 44.4 - 46
388 300 238.6 - 253.4
(388)月供 157 248.3 - 509.7
823 12000 59.1 - 70.2
1038 1500 51.3 - 57.4
(1038)月供 335 38.7 - 54.9
1211 1500 37.5 - 70.4
(1211)月供 776 42 - 235.6
1928 2800 32.8 - 36.7
(1928)月供 611 30.9 - 40.5
2388 2000 25.8 - 34.2
(2388)月供 625 21.9 - 27.4
2800 5500 26.1 - 30.95
(2800)月供 2119 24.5 - 28
3033 1400 7.8
9988 1400 176 - 206.2
我暫時每月可儲蓄$7000, 其中$4000係...喺今年8月份開始月供兩隻新加入嘅股票 , 分別係...1810 & 1177 各月供 $ 2000
另外4年後即係我45歲這年,便可增加儲蓄至每月2萬
我想問我選了以上這16隻股票作長線投資ok嗎 ?
資金比例合適嗎 ?
需要改變比例嗎 ?
我最想問現在這 337 萬嘅股票組合比例...及我 41 - 45 age 其間,每月可儲蓄 $7000 & 45 age 開始每月可以儲蓄 $ 20000 , 這種情況
其實我需要用幾多年嘅時間,才能增值至 1000 萬呢 ?因為本人想每月有 5 萬現金流
本人與另一半 2人一同於今年9月份,已成功報讀了成哥你嘅投資倍升股基礎班課程。
本人買了成哥你六本書
50優質潛力股 2017 - 2018
50優質潛力股 2020 - 2021
大富翁致富藍圖
80後3百萬富翁
80後千萬富翁
年報勝經
不過年報勝經好深,唔係太明白,還要多加研究
一直去閱讀成哥你嘅書獲益良多,現希望上完投資倍升股基礎班課程會有更多嘅得著
龔成老師︰
你現有持股,係適合你長線投資。但16隻其實有少少多,最好長線維持係10-15隻水平,否則你會好難定期管理。
月供股票中,比亞迪(1211)現價偏貴,建議回到$180左右,才重新開始月供。此期間,可以用GX中國電車(2845)暫時代替。
現時大市在合理區,你保留太約3-5成現金左右,去等大跌市機會出現,咁就可以。
我假設年均回報率有10%,以你現時計劃,大約50歲左右,就可以增值至1000萬,當然要視乎到時大市實況而定。
其實書本上,<<年報勝經>>係深少少。如果你係初學者,我比較建議先睇我架《80後百萬富翁》、《財務自由行》和《股票勝經》。這幾本書,對你吸收上堂知識,都會有幫助。課堂上見!
------------------------------------------------
Q22683:
我以前買了2888 和 698 揸了很久,跌左好多,都唔知點算好?
想請教下
龔成老師:
渣打集團(2888)質素只是一般。
雖然未到劣質,但質素不高,但本地銀行股中,賺錢能力算是較弱。加上銀行業近年的環境不及過往,賺錢能力不及以前咁好,相信佢之後,都只是好基本增長,不要對股價有太多期望。
投資價值只是一般,如果持貨不多,就當守住先。
如果持貨多,我會建議考慮將部分貨,轉其他更有質素的銀行股,或其他優質股。
至於通達集團(0698),算是不過不失。
佢主要從事電器產品(包括手機、手提電腦及其他電器產品)零部件生產;為電子產品及電器提供金屬外殼及其他五金部件;及提供塑膠機頂盒及生產體育產品。
現價合理,勉強可長線。但就唔值得持有太多,始終質素唔算好高。如果持貨多,就減。
------------------------------------------------
Q22684:
老師,純收息,及有增長收息,邊個風險度會高啲?應該投資那一個?
龔成老師:
其實好睇你的投資目標,如果單是收息,佢股息一般會高d同股價穩定d。而增長,雖然佢潛在波動會高d,但股價增長,以及往後增長,長遠會好d
------------------------------------------------
Q22685:
龔成老師,我想請教你,之前放了大部分股票。 只剩下9988 200股 平均價$258, 3手ibond 。 另外手上還有一堆美股 市值大約5000美金。
對於9988 我應否耐心持有或在合理價位再加倉? 謝謝老師
龔成老師︰
我地做財富增值,最重要不是睇「賺蝕」,不是睇「買入價」,而是睇質素。質素不好,增長力弱,就有可能賣出,蝕都要賣。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?即是你想設計一個怎樣的投資組合?長期、優質、平衡、適合你。
因此,係你已沽出大部份股票前題下,阿里巴巴(9988)相信佔你組合比重唔細。
個別企業和行業,不要佔組合15%和30%以上,銀行業更加不要高於組合20%,否則會有過度集中性風險。所以,我建議你唔好再加持住,反而你加入其他不同行業股票,去進行平衡配置。
另外,我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
如果你係年青至中年人士,阿里巴巴(9988)這類潛力股,係適合你。但如果你係退休人士,這股就風險太高,只宜好小注。
而ibond則是現金流產品,增長力唔高,同樣只適宜近退休人士。
你要因應自己人生階段,去作出相應的配置。
------------------------------------------------
Q22686:
龔Sir,你好! 我現在52歲,剛剛賣走了一個車位,所以有一些現金在手,經過一輪的研究準備 買入以下的股票作長期持有,到退休時把這些股票轉再為收息股。
請問我選出來的股票組合對我這年齡的人來說是否風險過高? 或者對以下的組合有什麼改善的建議。當然我唔會即刻買晒下面的股票,要等好價才會入貨。 謝謝!
招行(15%),石藥(5%),騰訊(15%),港交所(15%),比亞迪電子(10%),完美醫療(15%),信義玻璃(15%),舜宇光學(15%)
龔成老師︰
先增值,到退休時慢慢換成收息資產,去幫自己創造現金流收入,支援退休生活。這個方法,係正確的。
但由於你年紀,係比較近退休之年,係增值組合的選股上,不宜過份進取。
你現時選股都有質素,但潛力股佔比重太高(0700,0388,0285,1830,2382)。佢地雖然有增長潛力,同時風險都較高,不宜持有過多,大約佔2成好了。
你應以平穏增長股,作為你組合主力。佢地增長力不及潛力股,但都有平穏增長,而且有若干股息,整體穏定性較強,相信會較適合你的情況。
平穏增長股:金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)。如果有投資美股,可投資VOO。
------------------------------------------------
Q22687:
龔成老師你好,現時持有:
4400股 00005 平均$65
1100股 00012 @$47
100股 00700 @$505
900股 00939 平均$7.8
4000股 01177 @$7.5
7000股 02628 平均$27.7
200股 09988 平均$273
以前只懂買銀行股收息股,之後先開始買其他股票。最近打算買樓,想賣咁D股票,係咪應該賣5,939,2628
請指教一下,謝謝
龔成老師︰
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
你現時組合,算係一個有偏向增長型組合,若你係年青至中年,係適合。但當中匯控(0005)、建行(0939)、港燈(2638)是收息股,無太大增長力,若你較年青,就不宜持有太多。
另外,個別企業和行業,不要佔組合15%和30%以上,銀行業更加不要高於組合20%,否則會有過度集中性風險。
你現時銀行股、匯控(0005)、中國人壽(2628)明顯係超標,你要調整一下個比例。其實中國人壽(2628)近年增長力都明顯弱左,本身都不宜持有太多。
若果你需要套現買樓,而你又係年青至中年人士,你可以優先沽出匯控(0005)、建行(0939)、港燈(2638),順便調整埋個組合比例。
未來時間,你可以加入多一些平穏增長型股票,去令組合更平衡。
平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)。如果有投資美股,可投資VOO。
------------------------------------------------
Q22688:
請問平保2318 仲有冇前景,收購方正之後股價一直跌
龔成老師︰
中國平安(2318)有質素的,佢有規模,有品牌,近年的發展都不差,不過,股價有時會有少少波動,這主要受投資市場表現影響。
近期佢股價下跌,除了因為大市氣氛較弱外,其本身數據都唔係太理想。
但我地審視一間企業投資價值時,會睇長線。只要中短期因素,對佢長線投資價值無影響,這些中短期波動,我地就唔需要太在意。
這股有長線投資價值,是平穩增長型。現價算係合理區中間至中下位置,分注投資就可以。
------------------------------------------------
Q22689:
hi成哥,我打算在股災時動用15萬買這些股票.
A .3738[30%]
B. 2013[30%]
C. 708 [20%]
D.1585 [20%]
我不怕高風險,點睇這組合?
另外,等股票升晒之後打算用150萬購買這些收息股.
A.3988
B.1883
C.1382
D.2777
E.1628
Sir,這組合如何?應該點分配資金?
再另外想問下1628點解咁高息?高息既背後有咩風險?現價1.68,但PE有成1566,姐係好貴?再問下尼隻野收息穩定嗎?佢長期都係咁高息?幾錢是便宜區?
謝謝成哥解答!
龔成老師︰
我地投資,唔好盲目追求高增長,要先知風險,才想增值。
我明白你風險承受能力好高,但你這4隻股票,不確定性的確好大。特別係恆大汽車(0708)本身母公司財政有大問題,而佢本身到現在,一部汽車都無出產過,投資風險唔細。
我地唔好成個組合,只集中係3,4隻股票身上。最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能高於組合30%,同一股不能高於組合15%。要平衡,建立後長期持有,不是買賣賺差價,而是成為你財富組合一部分。
恆大汽車(0708)、雅迪控股(1585)同是汽車相關股份,我地就不要持有太多。
我建議你調整翻4隻股票比例,再加入適量平穏增長股,去將個風險拉低翻少少。
你要明白一點,高風險唔一定係高回報。若這些高風險企業發展理想,回報當然好。但發展不似預期,損失幅度會比一般平穏增長股高好多,你要明白這個風險。
你這個組合,會不會升到150萬,要多久才升到150萬,無人知,因為不確定性好大。如果升到150萬,你是否轉至收息股,你要再用你人生階段作考慮。
如果你依然係年青至中年,建議保持投資一些有增長力股票。若你已退近退休之年,換成收息股係可以。
你收息股組合中,大體上都有質素。
富力地產(2777)業務上是有質素的,股息好高。
佢本身負債高,相信會對佢有一定的影響。股價會因此較為波動,所以唔好只睇股息。你預佢中短期都會一般,但如果只是小注投資,都可以。
禹洲集團(1628)主要於中國廈門、上海、福州及合肥從事物業開發、物業投資、物業管理以及酒店業務。
佢係新加坡、香港、上海、合肥、福州、廈門等地均設有分支機搆。
整體質素都有,但未算好強,佢在行業中,未算有好大的規模與優勢,另外,負債較高都對這股造成風險。加上業務有點波動,這股唔建議投資太多。
現價合理,但不宜持有太多,長線投資價值都有,但未去到最高質類別。
佢PE去到過千,主要係因為過去一年,盈利大幅下跌所致。如果你用翻佢上一年盈利計,佢PE係個位數,所以係正常。
雖然佢上年收入下滑,相信主要係受疫情影響。疫情過後,會慢慢回復較正常水平。但始終佢質素唔係好高,唔建議大注。
最後,希望你記住財不入急門,一個平衡和合理風險的配置,增長潛力未必最高,但對你長線投資增值,相信會係最有利。
------------------------------------------------
Q22690:
龔成老師,我一直都是你的小粉絲,默默地跟住你的教導月供股票,最近家人強力推薦重資買入2448,請教老師對2448的前景分析如何? 十分感謝
龔成老師︰
首先,好多謝你一直支持。
恆宇集團(2448)業務主要係在澳門,以承建商身分承接澳門私營物業項目的裝修工程及樓宇建造工程。
集團於上年年末,開始想發展金融服務業務,今年7月更與總資產逾千億的國企青島西海岸發展集團就「青澳數字經濟產業園」及相關基金項目簽訂戰略合作框架協議。
市場或預期集團未來,會因為加入金融服務業分部,對盈利起到極正面作用。
但我地作為理性投資者,要學識客觀分析事實。新分部和協議框架,的確係有佢發展潛力。但問題係,佢只是剛剛開始,會發展到幾大,會否成功創造盈利,幾時才有盈利,都係未知之數。
只能說,佢潛力股係提升左。但根據現有業務和過去業績,此刻係好貴。
這代表佢現時股票,很大程度係建基於"未來"新業務的發展。若新業務發展不似預期,股價很大機會出現較大幅回調。
而且,佢雖然多年來都係有盈利,係經營現金流欲維持負數,代表佢表面係有錢賺,但實際上落到公司袋架錢,係負數。
我無仔細研究佢財務數據,有機會係正常,但都有機會係有問題,我一般見到這個情況,都會較有保留。起碼要仔細分析過當中數年數據,真係無問題,才會考慮。
所以,你投資此股係可以,現價唔平,加上投資風險唔細,你要自己衡量。佢有一定不確定性,投資時要控制注碼。
------------------------------------------------
Q22691:
你好! 本人年50 有屋(供完) 铺(供完) 收租$6500 屋企人给每月$10000 零用 〈 一半用來交保險 〉尼一 。二年 在網上才真正認識股票
伹股齡有十几年(短炒 不分析公司 跌市心驚) 近尼一年 才把蝕去 有(30萬几) 慢慢 賺回來 约20萬 持有以下股票 有部分已持3年 有的3個月
現在見有錢赚 想沽出部分 請問 那些可以長楂 謝謝解答
3993 (平圴價$4.2) 2萬4千股
716 $0.8 4萬股
189 $6 2千股
1177 $7.08 2千股(打算月供)
788 $1.52 2萬股
728 $2.33 2萬股
2198 $3.68 1萬股
451 $0.28 5萬股
520 $8.69 4千股
1357 $2.82 1萬股
769 $0.9 2萬股
1787 $15.8 2千股
1250 $0.113 20萬股
6885 $3.68 1萬股
1024 $85 1百股
龔成老師︰
我地投資股票,係希望買入一些優質企業,透過佢自然增長,達至財富增值目的。重點係長線持有優質股﹐唔係去做短炒,因為中短期走勢無人知。但長線持有,企業質素一定會反映在股價當中。
所以,你首先要改變自己過往十多年錯誤的投資方法,改為以長線投資作為策略。
投資前,一定要知道該企業質素、行業前景、財務狀況等,才去投資。如果你連間公司點賺錢、行內有乜優勢、點解未來有發展和增長潛力,都答唔倒自已,咁就要停一停,唔好投資住。
同埋,你唔好停留係「賺差價」的想法。當你一直持有這股,企業長期價值向上,就會帶動我地的財富有最大增長。成個效果,一定比你經常出出入入好。
你現時財富組合當中,已有一個住宅物業和一個收租舖位,比重都幾偏重左係物業類。故未來時間,應較集中累積優質股,令財富組合更平衡。
以你50歲年紀,都可以進行適度增值,但由於較近退休之年,選股上要保守少少。
中國電信(0728)係有質素收息股,可持有。
洛陽鉬業(3993),中國三江化工(2198)、協鑫新能源(0451)、呷哺呷哺(0520)、美圖公司(1357)、山東黃金(1787)、北控清潔能源(1250)、金馬能源(6885)質素較中等或波動性太高,唔建議持有太多。
中生(1177)、中國鐵塔(0788)、快手(1024)都有質素,但係是潛力股類,你可以照持有。但這類潛力股風險較大,以你年紀計,佔組合最多2成好了。
其餘無提及之股票,建議沽出較好。
未來時間﹐你可以以「平穩增值股」+「收息股」作為投資目標。若你想保守些,或預期自己距離退休年期不遠(5年內),可以較集中收息股。
相反,你依然有一定時間增值,想進取少少,可以集中在平穏增長股上。
但緊記,要隨著年齡增加,慢慢增加收息股的比例。到退休時,你收息股比例,應提升至100%。
平穩增值股,例如指數基金、金沙(1928)、長建(1038)、中銀(2388)、港鐵(0066)、恆基(0012)、平安(2318)、粵海(0270)、領展(0823)。如果有投資美股,可投資VOO。
同時,可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。
------------------------------------------------
Q22692:
老師9618 9988 長線仲值得投資嗎? 感覺冇咩起色
手上冇咩貨 9618只得2手 均價$328
9988 4手 $240
要點應對宜家嘅情況?
龔成老師:
仍值得長線,有兩點你要注意,第一,唔好太著重短期股價,你預科網類仍政策影響,中短期仍弱,要平常心面對。第二,都唔好太集中在同一行業,因此,要睇你持貨佔組合比例%,如果不多,就無問題,可長線。
就以阿里(9988)來說,佢有質素,中短期一般,但長遠仍有增長力,之前貴,現價去翻合理區。
係業務層面,擁有相當的優勢,不少業務處於壟斷狀態,同時增長理想。加上正不斷發展延伸業務,這都會成為企業增長的潛力,預期增長會持續,這是阿里最大的賣點。
以企業的長期發展計,這股的確優質,但股價都有一定的波動,現價算是合理翻D,但都不是大手時候。
始終將面對內地監管可能收緊,因此風險度增加左,不過,我相信佢的整體優質度仍在,內地不是不想佢賺錢,只是想規管佢。佢已建立好完善的業務,因此本身是無得輸,只是賺多賺少問題,現時監管多左,點都會影響賺錢能力。
對於這類優質、有發展,預佢現價約合理區中間,長線持有就得。
------------------------------------------------
Q22693:
老師點睇隻百度同B站?
內地科網股 一直探底
應否換股投資?
龔成老師:
你預中短期因政策風險,股價表現仍會弱。但本身仍有質素,只要耐心持有就得,除非你持貨過多,否則不用減。
以百度(9888)來說,有質素,有獨特性,長遠發展不差。
佢係全球最大的中文搜索引擎「百度」的營運商,係內地用家搜尋資訊主要對口,用戶規模突破10億,百度App日活潑用戶超過2億,多個指標都處中國第一。
業務上,佢擁有好強大互聯網基礎的領先AI公司。自2010年起一直投資AI以提升搜索及變現能力,並使用核心AI技術引擎「百度大腦」開發新AI業務。
我睇翻一些報告:
1. 佢擁有中國最多的AI專利數量以及AI專利申請數量。
2. 按累計拉取請求計,百度的深度學習框架飛槳居中國深度學習框架榜首,全球排名第二,僅次於Facebook Pytorch。
3. 按開發者數目計,百度開放式AI平台擁有超過數百萬名開發者,係中國最大的開放式AI平台。
4.按開發者數目計,係百度雲基礎設施上運行的Baidu OSChina是中國最大的開源活動開發平台,全球排名第三。
百度核心業務(唔包括愛奇藝)由AI驅動,為其貢獻超過70%的總收入,主要提供基於搜索、信息流及其他在線營銷服務,以及來自AI新領域的產品及服務。
並廣泛使用AI技術開發創新營銷服務(例如動態廣告),為各搜索用戶推薦最適合的營銷客戶產品。
現時佢坐擁不少資訊和客戶群,就可以利用佢地去發展很多不同業務,可以話係一個好大的優勢。佢收入不差,長遠有發展,但由於本身有相當規模,因此,未必是高速增長型。
百度在規模和質素上,一定係有。但近期科網股波動,風險高左,同時到上市一刻不確定性高左。如果持貨多,先要減,否則可守。
------------------------------------------------
Q22694:
想問下,维他奶的管理層令我失望,就是一間大企業,危機意識管理没理由那麼差,由於問題出自管理層,所以長遠好難返到身。
维他奶根據購股權計劃發行43萬股,每股發行14.792,較上一个營業日的每股收市价21.45,折讓约31.04%
另外,龔sir, 我好明白2800對散户最安全,出面啲人成日話你叫人買2800。
龔成老師︰
其實維他奶(0345)能否返身,都係言之尚早,要觀察。因為消費者,好多時都係好善忘。
至於佢發行新股,其實不少公司會發放一些購股權給員工作獎勵,如果該員工行洗權利,就會發行新股給該員工。
由於發行了新股,所以現有股東每股盈利會被分薄左。但這些購股權未必一定會行洗,所以你係年報會見到,每股盈利有2個。
一個係"基本",另一個係"攤薄"。前者係當期的實際每股盈利,後者係假設這些購股權(除了購股權,都仲會有其他金融產品,會影響這個數),全部被行洗後,每股盈利會分薄至那個水平,給投資者一個預算。
現時维他奶已發行10.6億股,43萬股只係一個小數目,對股東影響唔大。
而盈富(2800)係一個唔錯組合,所以我經常推介,特別係推比一些投資初學者。
因為如果你係一個數學教援,對著一個小學生,你會刻意教微積分嗎?有需要為表現自己的知識,教他不明白的方法嗎?
當我比理財意見時,最重要是「適合」,如果強行叫網友買風險過高或他不明白的工具,我認為有點不負責任。
其實好多年前已經有評論話我只懂叫人供盈富(2800),但我咁多年都照樣叫人買盈富。
其實我一直都明白,盈富(2800)並不是最高回報的投資,但這是一個組合,當中有58隻質素不太差的股票,對本身不懂選股的投資者來說,是一個很好的選擇,加上有平衡組合風險的效果。
就算對無乜選股能力的投資者,提供一個穩健,收息及平穩增長的組合。
至於我叫人月供,都是同樣道理,對於不懂掌握買賣時機的投資者來說,月供股票是最好的方法。
------------------------------------------------
Q22695:
Thank u!! How about 2828 vs 2800 le?
龔成老師︰
恒生中國企業ETF(2828)是追蹤恒生中國企業指數之表現,即是中國的企業,當中不少都有一定的質素。只要中國經濟長遠增長,而這些企業合理增長,就能帶動價格保持上升。
由於這些國企的股價較為波動,你最好以長期的模式去進行月供,每次供的金額不用太大,以較長時期去平均價格,自然能減少風險。
長遠來說,中國仍不差,你可以進行月供。但就要每月留些現金,因為這刻未到平宜區。
盈富(2800)是包括58間質素不錯上市公司股票的組合,這些股票有升有跌,但長期計,都有不錯的回報。
買入盈富主要有兩個回報(分別是股價升幅,加上股息回報),股息不多,大約只有3%,而股價升幅,其實有升有跌,每年都會波動,但長期平均計,都有5%-10%,當然,這是不一定的。
同樣地,若你以月供股票,買入的價格就能平均,不用擔心一次過在高位買入的風險。
2隻ETF都係有質素,但風險度2828會高少少,你要自己衡量。
------------------------------------------------
Q22696:
你好,本人月可儲5-7萬,積蓄因買了可購公屋只剩30萬,沒有投資經驗,有可能在1年後買到樓嗎?因看見一個粉嶺心儀地盤,
想盡可能在建築完成前,即2022年底有可能上車,而穩定女友又可夾大約50萬,本人做貨運收現金的,女友開鋪的,又大概要預多少做首期可過壓測呢?謝謝
龔成老師︰
如果從投資角度,其實1年係一個好短時間,就算再優質股票,都會有波動,令最終回報不確定性大增。因此不宜做任何投資增值﹐最多只可以做定期。
以你現時可動用資金,1年後大約150萬。若以你7萬收入計,買800萬以下物業,做9成按揭,供30年的話,應該都可以。
但當然,這個只係好初步計算,實際按揭是否批出,要視乎相關銀行準則。加上你工作係收現金,而且可能相對不算穏定,銀行計算你供款能力時,或會有調整,你最好向銀行問清楚,以免失算。
------------------------------------------------
Q22697:
請老師看看先父的股票,有沒有兩三隻可保留,謝謝
00536 貿易通 20000 股
00687 泰昇集團 70000 股
00737 灣區發展 12500
00889 連達科技控股 20000
00927 富士高實業 70000
00987 中國再生能源投資 88000
01080 勝利管道 21000
01123 中港照相 50000
01165 順風清潔能源 10000
01222 WANG ON GROUP 300000
01265 天津津燃公用 20000
01395 強泰環保 50000
01560 星星集團 100000
01685 博耳電力 20000
01900 中國智能交通 30000
02014 浩澤淨水 30000
02389 北京健康 54000
03332 中生聯合 20000
03882 天彩控股 20000
06161 泰加保險 10000
00596 浪潮國際 8000
00723 信保環球控股 3125
01041 林達控股 1000 (停牌)
00261 GBA集團 400000
00575 壽康集團 97379
00612 中國投資基金公司 8000
00831 利亞零售 10000
01142 西伯利亞礦業 50
02222 雷士國際 50000
87001 匯賢產業信託 15581
市值大約50萬
以上乃先父留下的股票,應該大部份是劣質股,我不知買入價位 ,現打算沽出,換入優質收息作媽媽養老之用,老師可否幫忙看-下 ,以上有沒有兩三隻可以留低不賣,謝謝你
龔成老師︰
其實買入價位,係你買入股票後,已經唔重要。持有與否,最重要係睇佢有無長線質素。
貿易通(0536)、灣區發展(0737)、匯賢產業(87001)、利亞零售(0831)係質素的收息股,適合你,你可以保留。
連達科技控股(0889)、富士高實業(0927)、中國再生(0987)、星星地產(1560)質素較一般,保留係可以,但最好只留下小注。
其餘股票,都係質素較弱,或者係不適合你這類退休人士持有,你可以沽出。
------------------------------------------------
Q22698:
日日已習慣係fb閱讀老師文章分析,遲來的學習。
我想入2800盈富,港燈,,價合理嗎?想各入5手,月供定現價入貨?用老師分析用1/5現金放入股票上,慢慢買入。勞煩老師百忙抽空教導。
另外開富途牛牛買賣,安全嗎?
龔成老師︰
富途牛牛做買賣,無問題。
除了盈富(2800)和港燈(2638),其他我之前講的收息股,全部現價都合理。但由未到平,所以投資股票的1/5資金,都要再拆細。
現價先用大約一半,分注慢慢入貨。餘下一半,等大市有明顯回調,就再慢慢加大入貨力度。
另外,唔好只加這2隻股,可以再加入多少少不同行業收息股,去令組合更平衡。
只要個別企業和行業,不要佔組合15%和30%以上,銀行業更加不要高於組合20%,以免出現過度集中性風險,咁就可以。
------------------------------------------------
Q22699:
龔sir,想問下澳門規管賭業既政策(吾俾資金向外流),對銀娛,金莎會係正/負/冇長遠影響?我地要點分析好呢?感謝老師
龔成老師︰
這個情況,相信主要係想限制一些人,利用貴賓廳便利,去轉移資金。
長線計,貴賓廳收入有機會因此而少左,但影響程度有多大,就要再觀察。
中短期,貴賓廳佔收入比重較高企業,會較受影響。銀娛(0027)和金沙(1928)都並非好集中係貴賓廳,故影響唔算係嚴重,同時近年已減少貴賓廳比重。
------------------------------------------------
Q22700:
老師,可以問下你對騰訊的睇法嗎?是否長遠來說都機會大升返$650左右呢?數碼人民幣會唔會取代它的電子錢包呢?
龔成老師︰
騰訊(0700)依然有投資價值,最近受中央政策和大市氣氛影響,出現較大回調,但整體質素唔見明顯轉差。
但集團已經好大隻,發展唔會好似以往咁快。要回至$650唔係無可能,但要點時間。
至於數碼人民幣會唔會取代它的電子錢包,係一個未知之數,2者有可能係並存。現時數碼人民幣都係試驗階段,好多野都未清楚。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
友邦人壽會倒嗎 在 龔成 Facebook 的最讚貼文
【龔成問答信箱】(Q21601-Q21620)
Q21601:
Hi 你好,睇咗你個page好耐,本人一路想做中低風險投資,只係未開始落手做,因為我知道好大部份財經資訊同新聞都唔係真係教人投資令讀者得到回報同被動收入,
而係好似龐氏騙局咁,呢個觀察令我大學揀商科都選擇咗marketing and pr,冇揀banking and finance,到而家我都係做嘢然後儲錢,冇投資過。
我想由頭開始學正確嘅投資方法,唔係投機或者賭博,我唔想做個啲無基礎知識扮識個類人,請問我可以點做?
如果係咁,我minimum應該預幾多本金慢慢累積呢?
多謝你睇我個msg!期待回覆。
龔成老師︰
你要分清甚麼是「龐氏騙局」,原理就是一個無任何經濟價值的項目,只利用新加入的投資者資金,令初期投資者得益,以這模式一支滾存。
但如果一間企業,本身有實體價值,對社會有長期正面影響,就不是騙局,你要分清「價值」的概念。
其實,坊間你會接受到好多投資資訊,但並不是全部有用。你要學識分辨那些"有用的客觀資訊"和"主觀的個人意見"。
前者係一些你值得參考的資訊,後者對你係無任何意義。
投資絕對唔應該係賭博,因此你需要有相關知識和經驗,去助你判斷每個投資機會。所以,你係投資前,一定要增進投資知識。
我自己會看好多有關投資、理財、股票、成功、激勵、心靈、致富等各方面的書。
我一開始,對投資一無所知,當開始睇,就發現自己過住的投資方法都是錯,更發現坊間的所謂「專家」、散戶,投資方法都是錯!
之後,我開始明白點解香港有9成散戶,投資股票都是輸多贏少,因為佢地無知識!
當我愈睇書,就愈明白真正的投資道理,同時自己的投資實力大升。由多年前輸多贏少,到現時贏多輸少。唔少散戶,可能憑短期市況好而獲利,但如果要做長勝將軍,就只有靠知識。
巴菲特的閱讀就更多,他多年來,絕對不是「睇住個市」,而是不斷睇書增加知識,睇年報了解企業。
我最初睇得好廣泛,到後來會睇較多「分析企業」、「價值投資法」、「巴菲特」類的書。
以下是我認為適合初學者睇的書,部分要到圖書館找的:
《我十一歲,就很有錢》
《經濟蕭條中,七年賺$1500萬》
《富爸爸,窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪?》
《人性的弱點》
同時間,你都可以睇我架《80後百萬富翁》、《財務自由行》和《股票勝經》,都適合初學者。
至於開始投資,你唔需要預好多本金。其實只要每月有一定閒錢,就可以用月供股票,去做財富增值。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
若你係偏年青,應以增值為主,建議你用「平穏增長股」 + 「潛力股」作組合,去創造一個增值平台。
現在你每月先用5成儲蓄做月供。其餘先儲起,用一邊月供一邊儲蓄的策略。
由於你投資知識不高,因此可較集中ETF。到你有一定知識,對這些股票又有一定了解,才考慮加入其他股票,咁會較好。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
------------------------------------------------
Q21602:
龔sir你好,3年前接觸你的fb及書籍,見你一直推介1211, 思量後跟你買了少少,現在還持有著,真的萬分感激你!
講一講我背景,42歲,月入4萬,單身,與1位退休家人同住居屋(已供完),屋企所有開支我全負責,每月儲1.3萬。手上現金1百萬,但當中30萬要撥備以防不時之需。
因投資知識不足,股票分得太散,成19隻,當中不乏高位買入。曾經看過阿sir說8-9隻股票組合就夠了,所以想向阿sir請教一下我該如何整合出一個平衡及適合我歲數的組合
以下是手上股票數目及買入價-
銀娛,1手,$52.2
金沙,3手,$35
港鐵,1手,$41.2
粵海,2手,$12.28
比亞迪,3手,$40.6
福壽園,2手,$7.5
小米,2手,$22.9
阿里巴巴,2手,$215.8
騰訊,2手,$610
中生,1手,$7.72
平安好醫生,2手, $84.8
京東健康,1手,$112
金界,2手,$7.7
郵儲銀行,1手,$5.82
中行,1手,$2.95
中銀香港,3手,$29.81
中國人壽,1手,十幾年前買忘了價位
長和 及 長地, 各1手多,當年和黃重組換成的,和黃$68買入
今年4月剛開始月供 恆地$2000 及 中生$1000
想請教阿sir-
1)19隻股票內哪些該集中保留?
2)中銀香港,金沙,郵儲,一來高位買入,二來好似增長不大。是不是等到升回買入價後該優先舍棄呢?
3)手上股票市值8x萬,可動用的現金70萬,比例約一半一半。是不是全部現金都留待大市在平宜區時才入貨較好呢?
如果現在想慢慢入10萬貨,該加注哪隻較好?
謝謝你的時間及解答!Thank you very much!
龔成老師︰
1) 你現時有股票,都係有質素和適合你年紀,不需沽出任何一隻,照長線持有就可以。
中國人壽(2628)賺錢能力弱左,質素只算中等,現貨可持有,但不要加注。
但長線計,你要集中翻係10隻以內,否則你好難定期去審視佢地質素。
2) 首先你要明白一個概念,我地持有一隻股票與否,關鍵位是企業質素、前景,不要被買入價影響。因為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心,照持有就可以。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
這3隻股票都有質素,佢地增長力無潛力股咁高。中銀香港(2388)和金沙(1928)有平穏增長力,加一定股息。而郵儲銀行(1658)主要係派息。
雖然佢地增長力唔高,但有助於你平衡成個組合,建議保留。
3) 現時大市只係合理水平,現金佔比重大約3-5成。餘下資金,就等大跌市出現,才加大力度掃貨。
你想再動用10萬,去分注入市,都係可以。
由於你現時組合,潛力股較多,再加上不少潛力股都在略貴水平。我建議你這10萬,集中係一些平穏增長股身上。現價都算合理水平,可分注儲貨。
另外,你月供組合都可以。但我建議加大月供供款,最好用每月一半儲蓄去做($6500),餘下一半儲起,等大跌市機會。
------------------------------------------------
Q21603:
龔成老師,本人一直有追蹤你的FACEBOOK和YOUTUBE頻道,雖然你我不曾認識,但對於你想提升大眾的財務知識水平的大任,我實在深感佩服。
而當中的一些觀點,我卻出奇地認同,所以我想寫信給你。感謝你寫了80後千萬富翁這書,也希望藉此告之你有知音,認同其致富之道。
其實我和龔成老師的背景有點相似,自小在公共屋村長大,家境非常一般,讀書也不是特別擅長,會考只有十五分,大學也是剛剛好的進去,畢業成績也是非常一般。還有一點相似的是,我們畢業後都從事銀行業。
龔成老師在很早便明白為富者,有很多道理並非一般中小大學課程所傳授,反而更多是躲在日常生活中的潛則規。我贊同推廣財務教育,畢竟金錢是我們所有人一生中用得最多的工具,但現今竟缺乏學科教授。
然而現在的教育制度也僅僅是培養年輕人成為一個出色的僱員或專業人士,而絕非是一個創業家或投資者。
我和龔成老師也有一點很似,就是很早已經讀了很多金融及理財書藉,可能在潛移默化下走上一個銀行家之路。
可是現今的銀行家大多變成跑數的代表,亦只是公司的其中一個齒輪,即是離不開僱員的命運,你所有的付出和努力說穿了也只是為公司的盈利貢獻。
你所分得的其實很少,但付出了最寶貴的時間,這點我非常明白,但我之前 沒有老師當初的勇氣逃脫這命運之輪。反而沉醉在大公司所給予的看似亮麗的職位和不高不低的收入。
當然後來我真的離開了創立了一隊銷售團隊,單純為了持續而穩定的被動收入和可持續的事業發展。
所以我看到龔成老師所提及成為富翁的五大範疇時(全職股票/商業投資者,全職物業投資者,知名專家,企業家,擁有強大銷售團隊)突然發覺自己一路走來方向是對的。
雖然我和所有一般大眾一樣不是天才,也不是特別聰明。但我天生對所有學問的追求和強大行動力,令我創造了很多人認為的不可能。
在我29歲時買下第一層物業。在35歲,在銀行事業正處高峰時離開選擇一條不一樣的路。在於39歲時重返中文大學修讀全職MBA,主修創業家精神。
在40歲時選擇創立銷售團隊不再為大公司拼命,而是為自己而作選擇。回顧到此,再看看你寫的書,便明白有知音,所以非常感激你可以將你的想法匯集成書,以簡潔的方式表達出來,激勵大眾。除了堅定了我的信念外,你的點子也給我和同事們訓練的重要材料之一,我實在感激。
你在書本中提及銷售能力的重要性,年少時的我曾對銷售員有種不屑之感。
我不知道是大眾的刻版印象影響了我,還是成長中有植入錯誤觀念。到我認真反思為富者應具備的能力時,我真的認為銷售技巧和投資知識非常重要,
其實每一個人也需要作銷售,包括是向股東或潛在投資者解說的CEO,以及是提出論點和協議的大律師,本質上也是銷售。所以愈快掌握和深入研究當中技巧對將來致富之路會更為輕鬆。
最後,我花了二天時間讀完80後千萬富翁,在此我鼓勵其他人。龔成老師所說的並不是提供股票號碼,而是確實地,有系統地說明致富的潛則規和在正常書本中學不到的論財知識,所以我非常推薦這書。也希望在不久之將來可以和老師好好交流一下。謝謝你。
你的追隨者
龔成老師︰
多謝你的支持!其實我希望將正確投資理念,和一些過往經驗和方法,跟大眾分享。
希望為一班有理想,但未找到方法的人,提供一條可參考的道路。
同時,也為一班對投資理財有誤解,因而到處碰壁的朋友,引領佢地重回正軌。
成個財富增值之路,要透過不斷學習,令自己保持進步,才可以令我們走得更高,更遠。
其實當我寫書、教班時,我除左想賺錢外,同錯會一定想「怎樣貢獻到社會」,這是一個好大的核心,我相信只要這個大方I向正確,所做的事就正確,而錢就會進來。保持努力,加油~
------------------------------------------------
Q21604:
老師,你好呀。最近岩岩睇完你講樓市既書,
有一章講到地區性。我想問最近有好多新樓盤既位置都係新開發。
我想問問老師點睇屯門掃管芴一帶既新樓盤。
呢一區會唔會受惠到屯赤公路,駁去港珠澳大橋。
發展潛力大唔大呀?好唔好係果區上車
龔成老師︰
屯門是大型的住宅區,商業活動少。而且地理位置上,較遠離市區,因此樓價與市區有距離。
但隨屯門港鐵通車,屯門區交通會較以前便利。屯赤公路,可能都會係一個利好因素。
但始終屯門跟市區有一定隔離,而掃管笏雖在屯門﹐但隔離港鐵站較遠,未能明顯受惠。
因此,掃管笏升值潛力係有,但唔會話好高。因為所有利好因素都反映左,預期掃管笏配套,未來都唔會有好大提升。
------------------------------------------------
Q21605:
想請教,我五十歲,看了你的幾本著作!先想學買股票!
(我份工六十歲要退休,我只剩十年時間有收入去投資!)我應該用月供買邊D股票?
(我每月得4000可運用)手中儲蓄有18萬(但唔係太咁動用)?謝!
龔成老師︰
以你50歲的年齡計,其實已開始為退休做準備。你離退休尚有10年,只要好好把握,都可以做到一個合理增值效果。
但財富增長同時,我地不能過於進取。因此,你可以投資「平穩增值股」+「收息股」。
現時的$18萬,暫時只能動用$7-10萬,因為大市唔算平,你要分注投資,同時留下大約一半資金,等大跌市時入平貨,作長線投資。
當然你覺得自己風險承受力唔高,你保留多一點現金,都係可以。但就會令你財富增值效率,會慢左少少。
月供股票方面,你可以先用$1500供盈富(2800)和供2隻收息股(各$750)。餘下$1000就儲起,同樣等大跌市機會。
但就隨著年齡增加,你要慢慢增加收息股比例。到退休時,收息股佔組合100%。因為你到時,需要透過收息股的現金流(即係股息),去支持你退休後日常開支。
以下是一些適合你的選擇,你可以從中參考下。
收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
------------------------------------------------
Q21606:
你好,想請教你一些意見。我今年47歲單身,同家人同住公屋,自己有銀行儲蓄大約39萬,股票大約11萬,MPF大約55萬。
想自己搬出來住有私人空間,買樓但又唔想全部銀行儲蓄用晒,唔知好唔好租樓 。
又諗過海外買樓會平啲,再放租出去,再在香港租樓。
你有什麼意見?我頗煩惱。
謝謝!
龔成老師︰
如果置業後,會令到你資金儲備盡用,再無閒錢去買優質股,去保持投資增值,係唔理想。
至於租樓,會令你可投資資金減少,減低左財富增值能力。如非必要,我都唔建議咁做。
當然你可以用買海外樓收租,再租香港樓的方法,去平衡個支出。
但你必需對海外樓投資,有全面的認知,才好實行。我地投資的其中一個關鍵,是你有多認識這項目,「不認識就不投資」,如果你真的已了解當地的物業市場、租務市場、法例、經濟發展,那可說是過了第一關。
土地是有限資源,所以長期一定上升,但你都要分析這地方的長期土地供應。另外就是匯價如何,就算物業有穩定租金,以及樓價上升,但若然匯價不穩,都會對你的投資造成打擊,這方面不能忽視,你應該了解當地貨幣過去的變化,以及將來的強弱分析。
若你不懂,就不要去投資了。
以你47歲,要開始慢慢為退休做準備。在財富增值上,你可以集中係優質股身上。投資目標,可以用「平穩增值股」為主。
現時的$39萬,建議動用多$5-10萬,因為大市唔算平,你要分注投資,同時留下約一半資金。長線投資。
如果你每月有閒錢可以儲,你可以做埋月供股票,供「平穩增值股」。比例上都係用一半,餘下儲起,等大跌市機會。
------------------------------------------------
Q21607:
龔sir, 我是一位50歲嘅未婚女士,有男友但未有結婚打算,現獨居在與父親合資的自住物業。
2008年以198萬買入,市值約750萬,按揭尚餘107萬還清,每月用$6,600供樓。
我現時喺政府做合約職員(今年內可能轉制成為公務員),月入5萬,每年約滿後有一筆約滿酬金,佔全年收入15%,收入算穩定。
做呢份工之前一直不懂投資,亦沒有太多儲蓄。入職5年後到現在儲到約55萬現金,另有30萬股票,同埋下年就供完嘅基金投資保險(現值約24萬)。
股票資產分佈如下:
388 (100股)@$362.7
823(571股)@$78.9
1211 (517股)@$168
1810 (1200股)@$27.3
2800(1774股)@$26.8
6618(100股)@$165
9988(107股)@$250.5
每月扣除按揭供款,所有開支和供養父母的費用後,每月大約儲到$15,000現金。
早前follow你嘅post得到啟發,亦都很認同價值投資法,所以用其中$5,000月供2800和823至上述數量,供咗3年左右直到去年因某些原因停咗月供。
現有數個問題希望你指點一下:
1. 根據現時嘅工作狀況,我預算65歲退休,希望用餘下嘅工作年期可以盡快儲到更多錢做退休儲備。如恢復月供股票應該怎樣分佈較適合我?
2. 你對我現時嘅股票組合有什麼評價?由於有啲股票於較高位買入,現時股價回落,是否應繼續持有抑或應趁低吸納更多?
3. 現時嘅資產應怎樣配置才有機會達到每月$30000現金收入嘅退休目標?
4. 明年供完嘅基金投資保險,到時應全數提取作其他投資,抑或繼續存放滾存比較適合?
感謝你嘅耐性及期待你嘅回覆。謝謝。
龔成老師︰
1) 以你的年齡,其實要開始為退休做準備,但同時,財富仍有增長力(但不是進取),因此,你可以投資「平穩增值股」+「收息股」。
現時的$110萬(連同將贖回24萬基金),可動用多20-30萬,因為大市唔算平,你要分注投資。同時留下一半資金,等大跌市出現,用來買平貨,作長線投資。
月供方面,你可以供「平穩增值股」+「收息股」。每月先用$8000供款,餘下$7000就儲起,同樣用來等大跌市機會。
如果你風險承受力較高,又想進取D,可以較集中係「平穩增值股」。相反,你較保守,可以較集中係「收息股」。
但你要留意,隨著年齡增加,要慢慢增加收息股的比例。到退休時,收息股應佔100%。
平穩增值股,例如盈富(2800)、金沙(1928)、長建(1038)、中銀(2388)、港鐵(0066)、恆基(0012)、平安(2318)。
收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
緊記,月供係一個長線計劃,唔好供下停下。咁樣會影響到平均價格風險的效果,會對你造成不利。
2) 你組合的股票,都係有質素。除左京東健康(6618)真係買入價偏貴外,其他都唔係太貴,算係貴左少少。
部份投資,雖然帳面上有虧損,但由於企業係有質素。長線佢地價值,都會慢慢提升,所以你長線持有就可以。
盈富(2800)和領展(0823),未來再有明顯回調,你可以考慮加注。
但其他持股,因為風險較高,以你年紀不應持有太多。故只建議你持有現貨,不要再加注了。
3) 由於你自住問題已解決,也算持有一物業。故未來增值上,都係集中係優質股,令成個財富組合更平衡。
如果你希望退休後,每月有3萬蚊現金流,以股息率6%計,你需要本金600萬。
我假設投資回報有8%(連股息再投資),你每月投資$15000 + 現有110萬資產,15年後大約會增值至830萬,故這樣安排相信很大機會達至你的財務目標。
4) 你要睇佢扣除費用後,回報係多少。如果佢整體係優於大市,而風險又唔算過高,你可以考慮繼續存放滾存。
否則,你就按以上計劃。將贖回資金,分注咁慢慢投入「平穩增值股」和「收息股」中。
------------------------------------------------
Q21608:
龔sir,感謝感謝,你之前的回覆得好詳細好用心,老公說很有參考價值,我一直都想供盈富。但考量澳門銀行手續費問題所以未實行,聽您說完更安心了。
我真的要盡快決定投入同開始草貨了。
我老公說:
1.上堂時您提出的‘佐丹奴、粵海投資、大快活、六福‘,當時係優質股,依家隔左咁多年還值得投資嗎?想您俾點點意見,因他說這幾隻文中冇提到。
2.佢見組合內沒有內銀股,如滙豐,這些股票適合繼續持有嗎?
3.科技ETF市面上還有幾隻,是否因為呢隻手續費平D所以選呢隻?
4. 另外是關於我自己的,當時藍月亮發行抽新股時,我抽中左一手,那時睇中它是獨市生意及大陸龍頭,所以冇放,在$13蚊多時更入多了一手,現在這情況你認為適唔適合溝貨或繼續持有?
5. 之前我幾心儀想入手必瘦站,5蚊既時候吾敢入貨吾識睇位,最終沒有持有,必瘦站您認為之後喺邊個位我可以入手?
感謝感謝。
————
我近日開始去看股票勝經,但現在我既level睇會卡住唔太明白,老公說睇左再上您既堂效果會更好。如果老公再上多一次堂,有沒有優惠?
我們2個都會一起上,因有他在我應該會更好學習。
龔成老師︰
1)以上4隻依然係有質素,你投資係無問題。佐丹奴(0709)主要係收息,增長力不高,唔係咁適合你年紀。
粵海投資(0270)和大快活(0052)則平穏增長+股息。而增長力,會係六福(0590)較高,這3隻你們都可以投資。
現時都在合理區,可分注。
2) 大型內銀股和匯控(0005)都有投資價值,但由於已經好大隻,未來增長力唔會高,主要係收息。
以你年紀,應以增長為主,這類收息股就唔係咁適合你。
3) 安碩恒生科技(3067)每年收費和追蹤誤差,都係幾隻當中較低,暫時睇會係較好選擇。
但你要留意,由於幾隻恒生科技ETF都係初上市,追蹤誤差只能作參考,實際誤差未必一樣。
4) 藍月亮(6993)有質素的。
佢有「中國P&G」之稱,成立於1992年,擁有衣物清潔護理、個人清潔護理和家居清潔護理三大系列共73個品種的產品。
佢係中國洗衣液有龍頭地位,加上毛利率高,賺錢能力強。睇翻佢之前的資料,以零售額計算,藍月亮在洗衣液市場、濃縮洗衣液市場及洗手液市場的市佔率均為第一,分別為24%、28%、17%。
整體有質素與發展力,若持貨佔你組合不高,長線持有就可以。
近期雖然回左唔少,但都只算係合理區頂,唔建議現時加注。最好回多1,2成,才考慮。
5) 必瘦站(1830)長遠有發展,本身有一定的質素。
睇翻之前的疫情,佢身處的行業受影響,但佢的現金流及財務數據都唔算差,這點可以想象到,當正常的經營環境,佢的生意一定唔錯。
加上佢的野心愈來愈大,本身有一定的技術,同時不斷將香港的業務模式複製到其他海外地區,我見佢加強了發展其他地方,因此發展不差。
這股有長線投資價值。
業績前計佢$4是合理區頂,業績後股價升左好多,雖然我之前好大機會會調高佢合理價值,不過,現價都有少少貴。
所以,如果無貨,又真係好想入。你可考慮回少少,先小注,然後等跌多d先正式分注投資。
6. 上堂前,你先睇左股票勝經,的確係有助吸收課堂知識。但唔明都唔緊要,到時課堂都會再仔細解釋,當中的概念。
如果你基礎不足,可以上多一次基礎班,同時當你地2人一同上,可以有互動作用,增加了學習的進度,打好基礎後,再上進階。
你重讀初班,可以比個優惠價你,你whatsapp 55457212我同事講翻。
------------------------------------------------
Q21609:
阿sir 我25歲,係疫情低下 3月頭我決定祼辭左一份我覺得毫無進升和學到野既工作!
我自知呢份工如同書入面星期一捱 想等星期五,毫無激情,繼續向呢個公司只係浪費時間(我覺得時間好寶貴)我已經考慮半年,
但身邊朋友同事都勸我騎牛搵馬,都唔太認同我辭職,話呢個時勢有咁既工已經算好,但最尾諗左半年決定辭 因為我唔知前面會點 但我知總會接觸新環境新事物
而且想趁冇負擔年齡試多啲 至少收入冇呢份工高 但我辭左好肯定都有兼職收入 經過兩個月一直好積極揾全職 一邊睇書 一邊兼職 奈何疫情下難揾全職
開始質疑自己夠竟係未岩同焦慮呢兩日睇左書阿sir 本書 覺得完全觀念同我想法一樣!令我更加相信自己冇揀錯,得到肯定!
因為我覺得我花更多時間黎睇理財知識 運動 學野是值得的!多謝阿sir !
龔成老師︰
其實,我地做決定,一定係睇長線。
好多人一直安於現狀,唔肯試下離開舒適圈,就永遠只能停留係現時階段。
恭喜你,能突破自己舒適圈。你才25歲,還很年輕,應該把握這個負擔較少的年紀,去作出不同的嘗試。
現時你就要好好計劃將來,到底自已未來10年、20年目標係點樣,想自己變成一個點樣架人。點做,才會一步步接近你想的人生。
你現時把握未有全職工作的時間,去學習、做運動,努力投資在自己身上,這個態度係非常正確。
相信你將來,一定可以找到理想的人生。
------------------------------------------------
Q21610:
龔SIR 你好~本人是投資倍升股課程學生,剛上了第一課,感謝你在課堂上釐清了一些錯誤的投資觀念。本人今年35歲,通常會每儲蓄到一筆錢就會買股票投資, 增值財富。
這個投資組合有沒有問題? 還是需要再執一執?
00388 $478.6 @200-
0003 $14 @3707-
0005 $33.617 @ 1200-
02202 $27.3 @200-
03988 $2.4 @3000-
09988 234.8 @100
另外,知道澳門政府在珠海哪邊建立一個新街坊項目,在橫琴哪邊建立一個屬於澳門的新區。(橫琴「澳門新街坊」項目)
位置鄰近澳門關口, 在此發展中的新區對面亦有新樓盤開賣, 你認為值不值得投資?樓價大約為33平方, 值港幣110 萬左右, 租大約每月可收4000-5000元。
龔成老師:
你上述持有的,基本上都有質素,不算差,但可以優化組合。
你年齡35歲,其實可以著重增值多少少,所以,你持有的煤氣(0003)、匯豐(0005)、中行(3988)只是收息類別,不應佔你組合比例太多。
至於港交所(0388)及阿里(9988)無問題。而萬科企業(2202)負債較高,不宜持有太多。
你在之後的財富配置,可以投資平穩增長股+潛力股。
至於澳門新街坊,我無仔細研究在,但我自己對橫琴是正面的,這地方是中央其中一個重點發展地區,加上澳門地方細,一定要想方法延伸經濟圈。
同時,中央會對澳門的信任度會大過香港,所以會加強澳門周邊地區發展。
當然,你最好實地考察下先,上述只是簡單意見。
------------------------------------------------
Q21611:
老師,我亦很仰慕股神巴菲特,所以我亦有投資brk.b,持有1個半月已有7.5%回報,再加上佢財報穩健,令我更有信心持有。
不過,畢竟他年時已高,有佢隨時退休令股價下跌的隱憂,亦不清楚接任的人會不會處理伯克希爾如股神一樣穩妥。
你又對此有什麼看法?
龔成老師︰
其實巴郡已經係一間大型企業,雖然股神巴菲特真的退下來,很難找一個有咁高能力的人取代。
但由於企業已係好成熟,就算係其他人掌舵,相信大方向唔會差好遠。
此股依然係具有投資價值,值得你長線持有,
不過,回報率點都會比過往略減,但仍然是不差的。
------------------------------------------------
Q21612:
想問老師,一年只買1/2隻股票,是否次次都是賺錢。
如果我這樣做,我心理上會害怕。如果睇錯,整年的儲蓄,會就此蝕了。
暫時都想分散投資,如果不夠資本,可能3067/2833/QQQ/VOO/ARKK便算
請問我的想法是否可行?
此外,你為何會有信心,果1/2隻會是眾多公司中,成長最快的一兩間?
龔成老師︰
唔係,就算股神巴菲特投資,都唔會隻隻都係賺錢,佢都試過不少失敗投資。
但由於佢成個組合做得好,整體成績都有唔錯表現,這就是我成日強調,組合要優質和平衡的原因。
其實只要你有一定經驗,細心分析,加上係合理價或以下,才買入優質股,長線虧損的機會,唔會好高。
至於點解有信心,個1,2隻係眾多公司中,成長最快的一兩間。除左累積不少分析經驗外,我都分析左好多企業,從中作比較,才會知道個別企業,優質度如何。
你5隻股票都有質素,3067/VOO/ARKK係潛力型股票,波動性較大。如果你係偏年長、投資經驗較少、或者風險承受力唔高,就不要持有太多。
現時大市在合理區,記得資金唔好用盡,要留部份等大跌市,才出手。
------------------------------------------------
Q21613:
老師,有評論話如果完美醫療(1830)無左過期套票,必瘦站會蝕錢,可信嗎?
龔成老師︰
完美醫療(1830),這個所謂過期套票,其實是指一些客人已付費,但顧客於合約服務期內並無使用服務確認的收益。
預繳收入其實在不少行業都存在,是一種對企業甚為有利的營運模式,利用折扣價向客戶出售預繳套票,藉此推廣纖體美容服務,多年來令集團收入提升不少。
而這些過期套票,大致維持佔每年入帳之套票2-3成。至於出現原因,可以係客人計錯數買多左,或者好多其他因素,無人知。
但這部份一直多年恆常地存在,佔收入比重每年都大致相同。基本上,佢已經算係恆常收入一部份。
這部份收益,無話好定唔好。但我地計算企業盈利時,考慮這部份收益,才算正常。因為佢真係成個生意模式中,其中一個收入部份。
其實,你試從顧客的角度去想想,當你買產品時,你不會假設自己不會用,而最終總會有一部分客無用,有部分客只用到部分。
正如你食一個飯,都會食剩,如果將食剩的%要退錢,要按比例從收入扣除,相信好多食店都會虧損。
這些「用不到」「食剩」,其實是產品收入的一部分,所以,做生意不可能強行將「過期套票」數目折去的。
------------------------------------------------
Q21614:
龔sir你好,今年33歲。早兩年賣左樓,賣咗樓之後大概有5,000,000現金,現在跟屋企人租緊樓,全家五人,爸爸媽媽啱啱退休,我同老公同細佬做嘢
大家都係搵萬幾蚊,每個月租金$29500,屋企人覺得都係買返樓好啲,自己都有買下股票,手上持有3690,3993,6969,6618,291,都係短炒為主
因為都想幫補租金,每年要供三份合共大約120,000保險,3年前供的,包括一份基金($50000每年),基金已經供咗3年可以隨時停供
一份儲蓄($50000每年)另外一份危疾($26000每年),想你俾啲意見我,啲錢點樣可以運用同埋投資得好啲,可以40歲達致財務自由
龔成老師:
你地首先要決定,是否買翻買,如果買樓,就要預留部分資金,然後餘下投資增值。
如果唔買樓,就可全部用作增值。
如果現時完全無物業,我會傾向買基本的自住樓,但就作高成數按,餘下資金投資增值。
如果想40歲財務自由,你可以投資
平穩增長股:潛力股
7:3
(如果你投資實力較強,可增加潛力股比例)
好好利用7年時間,去進行財富增值,利用股票投資。現時現金,計好多少會買樓,餘下的「可長線投資金」,現時已可分注買入(當然要有一定的現金留低)。
另外,唔好再短炒。至於現時持有的其他理財產品,都可以繼續進行。
------------------------------------------------
Q21615:
老師你好....自己依家嘅方向好迷惘,自己有工作,但債項實在太多,呢個時候我真係唔知點做好.....
我好想去重新好好開始,已經31歲嘅我仲係一事無成,我依家應該要點做好....
龔成老師︰
我明白你此刻,可能有太多不如意事情,同時間圍繞在你身邊,令你好氣餒和無奈。
但其實所有問題,都總會有解決方法。在好多問題圍繞自己時,我地要努力去保持一個正面心態。有系統地,將問題逐一拆解。
首先,我相信你最大問題,係債務方面。你先集中去清理這部份,優先處理利息較高債項。或者可以將較高息債務,先轉到較低貸款利息的地方。
我地先減少你長線還債負擔,再慢慢被這些負債消滅。
至於,人生目標,每個人都不同。唔一定要做到家財萬貫,才算係事業有成。
你要清楚知道,5年、10年、甚至20年後,希望自己變成點。之後,再想下,點樣先可以一步步咁達成。
記住,這個世界無問題係解決唔到。只要你定好計劃,按部就班咁實行,問題總會解決。而你人生目標,都總會達到。
------------------------------------------------
Q21616:
Hi 龔sir! 我年紀2X, 每月都儲到幾千蚊加上本身有少少閒錢,所以想由月供股票開始投資。
我有3個問題希望龔sir可以指點一下。
第一:就係月供股票嘅回報。我傾向長期投資,但係唔知道長期係幾長。簡單啲講月供股應該供幾耐(5年10年?),或者供到有幾多手先夠? 雖然成本平均咗,但回報係咪同時會平均(拉低)咗?
如果股價合適係咪直接(或儲夠錢)買一手長渣好啲?
第二:我諗緊月個股票包括0027 0293 0823 3690
前三隻我覺得喺疫情之下已經係低谷,未來幾年都會升。3690就潛力而言,現時股價係咪屬於合理/便宜區域,或者bottom line (市場消化完美團負面消息)?
第三:揀月供股嚟講成交量應唔應該係重要考量? 抑或其他因素比容易賣碎股更重要?
謝謝
龔成老師︰
1) 如果你定平貴能力不足,一手手買,會有買貴貨風險。月供可以平衡價格波動風險,所以較適合你這類初學者。
月供係一個長線計劃,月供最少維持3年,並持有這些股票5年以上,才會有較理想效果。當然,更理想係一直做,一直維持累積優質股(優質資產)的習慣,對你會最有利。
用月供方法,成本會拉平均左,但同時間,平均回報都會有機會被拖低左。
所以,若你用估值方法,直接1手手係合理區,甚至平宜水平才入貨,的確回報一般會比用月供儲貨為高。
但問題係,用估值方法去入貨,對投資知識要求較高。初學者我唔建議咁做,反而會增大你買貴貨的風險。
記住,我地投資唔係想賺到盡。而係在合理風險下,賺取最大回報。
2) 國泰(0293)的質素只是一般。其中一個風險,是油價,睇翻佢過往多年,油價對佢成本影響好大,令佢盈利十分波動,就算佢利用對沖,都唔係好成功,反而試過因對沖而蝕大錢。
另外,航空業對經濟週期較敏感,收入不穩,同時唔算係一個好賺錢的行業,因此這股的質素只是一般,此股不宜作為月供目標。
其餘3隻,用來月供都可以,美團點評(3690)有潛力的,但不確定性都高,只可小注月供。
3) 成交量,參考價值好低。有無碎股,其實都唔重要。
你要記住,我地係長線持有一些優質股,而唔係短炒。我地著眼點,應該係企業質素、行業發展、財務狀況等。
我建議你,可以睇我寫架"80後百萬富翁"、"財務自由行"和"股票勝經",都適合初學者,可以令你更深入了解成個財富增值的理念。
------------------------------------------------
Q21617:
龔成老師你好!本人(31歲)與丈夫(34歲)共月入7萬,育有1子,現金大約有50萬,持有股票價值約12萬,依家持有友邦、盈富、小米、安碩恆生科技,買左一層公屋自住。
仲有3年供完,市值大約300萬。依家每月大概有3萬蚊流動資金可以用黎投資。
想問下老師,如果想係10年內做到每月被動收入有3萬,可唔可行?應該點先可以做到?
龔成老師︰
由於你已有自住物業,因此在你之後的財富配置上,不用太急增持物業部分,可以利用股票去進行增值,而現時自住公屋,基本上狀態不用有特別變動。過3年供樓完成後,你可以再加大力度投資股票,令財富進一步增值。
要做到每月有3萬蚊現金流這個目標,以股息率6%計,你需要本金600萬。
以你31歲,可以選擇一些「平穩增值股」+「潛力股」作投資目標。現有持股,都係有質素,適合用來增值,可長線持有。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,即先用$15000月供,另一半就先儲起架策略。
如果你投資經驗唔算高,可以先集中係平穏增長股,潛力股只小注(少於3成)。若你有一定投資經驗﹐可以加大潛力股比重,最多佔組合3-5成,視乎你投資經驗多寡和了解這些股票程度而定。
現時大市只是合理區,你現有50萬資金可以先投入多10-20萬,用"分注"形式,慢慢買貨。餘下資金和每月所儲倒的資金,就等大市出現一定程度的下跌,才大力度掃貨,然後長線投資。
我假設投資回報有10%(連股息再投資),你每月投資$30000 + 現有資產62萬(現+股票),10年後大約會增值至720萬,故這樣安排相信很大機會達至你的財務目標。
------------------------------------------------
Q21618:
老師你好,小弟現年31歲手上有20萬資金想入市投資股票。
最近有留意0002, 0003, 0012, 2800, 6823想從中開始投資,不過有部分股黎緊都會除淨,理解到一般情況下股價係除淨日後會回調,
如果我目標係長線持有以上股票的話,請問我係唔係應該等除淨日後先開始入市?多謝老師指教。
龔成老師︰
你對除淨派息的運作,似乎有少少誤解。
如果你要收到股息,必需在「除淨日」前一天,依然持有股票。「除淨日」,其實就是用來確認那些股東收到這權益的日子。等到「除淨日」當天才買,派息就唔會有你份。
「除淨日」那天,股價就會扣除派息部份,例如原來股價$10,派息$1。那麼「除淨日」就會將股價,從$10下調至$9,以反映派息動作。
所以,假設不受其他市場因素影響,單係除淨這個因素,除淨日股價下跌,係正常。
而「派息日」,就係這班合資格股東,正式收到股息的日子。
由於「除淨日」股價會下跌。而下跌比重同收到息係一樣,所以只係左手交右手動作。因此,你唔會在此期間前後做買/沽貨,而出現任何著數。
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時31歲去計,應先集中做好增值部份。你所講的股票都有質素﹐但中電(0002)、香港電訊(6823)增長力較弱,主要係收下息,不建議你持有太多。
策略上,你可以較集中投資在「平穏增長股」和「潛力股」上。如果你覺得自己經驗尚淺,想先保守少少,用中電(0002)、香港電訊(6823)都係可以。
現時大市只在合理水平,你20萬可以先用一半,以分注形式,慢慢入貨。餘下的另一半現金,我地就等機會,當大市出現較大回調,就加大力度掃貨,然後作長線投資。
由於「潛力股」係需要一定經驗,你投資經驗較淺,建議你先小注,大約佔組合3成左右。此期間,你要努力提高投資知識,到有一定水平時,你可以慢慢將佢調升至5成比重。
------------------------------------------------
Q21619:
你好,我由2020年中開始到今年5月在不同的日子持有的股票比例:
00941 10,000股
02628 10,000股
00003 10,000股
03988 5000股
700 100股
另有現金200,000
以上比例會唔會太不平均,比例太重放在0941?
呢幾隻都係股息很不錯的股票我才選上的,但其實這個想法是否錯誤?求解答!謝謝!
龔成老師︰
你現時持有的股票,大體上都有質素,可以長線持有。
但中國人壽(2628)增長力,近年明顯係弱左,你可以考慮沽少少,換去其他優質股。
另外,任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
你現時中國移動(0941),佔成個組合一半,明顯係嚴重偏高。你必需慢慢減持部份,換至其他優質股,去平衡風險。
至於以上股票是否適合你,要睇你年紀、經驗和風險承受能力。
好以騰訊(0700)這類潛力股,增長潛力大,但同時間波動性都較高。比較適合年青、有經驗的投資者。否則,不宜持有太多。
至於中國移動(0941)、中行(3988)這類收息股,增長力好弱,但勝在有穏定的派息,風險較細。適合較年長、或者投資取態好保守架人士。
而中國人壽(2628)和煤氣(0003)算係2者只間,有一定增長力之餘,都有一定派息,風險度相對係中等。
你現時組合,算係一個偏向保守的平穏增長 + 收息組合。
若係較接近退休之年的人士,或者投資好保守,想以收息為主。941和3988係合適,但其餘幾隻,就未必太適合。
以下是一些優質收息股,給你參考。
目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
------------------------------------------------
Q21620:
小妹我已經35歲,工作13年,穩定,但無特破,對炒樓有興趣,想做地產經紀,但家庭有負擔,兩難,但我這年齡又是出去衝的最後機會,點算?
我想做有錢人,但呢刻又好多限制!
同埋我唔夠勇氣呀!
龔成老師︰
要成為有錢人,就不能安於現狀,要有勇氣去突破,你已經存在了第一個條件,因為你已懂得對不理想的現象不滿。
地產代理是成為有錢人的5大方法之一,建立銷售團隊之路。
但從事這條路,不確定性一定比你現時工作高。而且開頭時,收入有機會比你現有工作少。如你選擇好這條路,就要有一定決心,一直走行去。
否則,好大機會會令你成個事業發展,變得進退失據,你要明白這一點。
較好的方法,就是你一邊做現時的工作,一邊尋找一些可以「不辭工但又能創富」的模式(因為我從你的文字,已見到你勇氣不足,如果這刻不足,只能暫時留在原工作先)。
例如你利用投資,好好滾大資金。
然後,到了資金有一定的水平時,你在負擔上較安心,而你又有足夠的勇氣,到時才跳出去。
同時,你可以在這段時間,結識一下地產代理,多了解佢地的工作。(甚至做兼職,當然,你要了解現時正職是否容許,或當中風險,所以你自己衡量,如果真的做兼職,當見到自己這方面真的有發展時,先全力去做。加油啦!
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
友邦人壽會倒嗎 在 標籤: 友邦人寿ptt - 翻黃頁 的推薦與評價
OO人壽會倒嗎?快來檢查保險公司的狀況! - 《MY83 保險專欄》. 2020年4月9日- 資本適足率. 蘇黎世人壽. 29502%. 康健人壽. 1458%. 合作金庫人壽. 1078%. 法國巴黎人壽 ... ... <看更多>
友邦人壽會倒嗎 在 國泰人壽ptt 的推薦與評價
在職培育:專業證照輔導,領先OO人壽會倒嗎?. 快來檢查保險公司的狀況!. 金管會宣布接管XX人壽以及標售引發 ... 友邦人壽wldi:終身險,保費較貴,但老了較有保障2. ... <看更多>
友邦人壽會倒嗎 在 2022三商壽會倒嗎-運動賽事熱門討論及分析,精選在PTT ... 的推薦與評價
宏泰人壽會倒嗎Re: 推文說政府不敢讓保險公司倒的,應該要先研究一下2025年要接軌的 ... 友邦人壽裁撤台灣所有業務員800人(沒有要撤出台灣又沒有業務. ... <看更多>